1965 nienz 9 nyied 15 hauh,《Yinzminz Yizbau》youq banjdaeuz fat aen siusik ndeu, couhdwg Gvangjsih cingj boux nungzminz gisuz ak laeng Cauzsan daeuj ndaem naz yienghbanj cienz gingniemh, caemhcaiq fat bien selun《Cungj Banhfap Ndei Hag Gingniemh Senhcin》, gangj daengz cungj banhfap neix“doiq gak dieg doxgyau swnghcanj gingniemh, daezsang swnghcanj suij- bingz, mizyungh lai raeuh.”

20 sigij 60 nienzdaih, Gvangjdungh Cauzsan digih dwg dieg daj Cungguek moq laebbaenz gvaqlaeng buek yienh daih’it moux reihnaz ndaej haeux cien gaen, miz gingniemh gengndaem lai, doengh boux nungzminz ndaej vunz cingj bae gak dieg vixyinx gisuz de heuhguh“Cauzsan laujnungz”, gyoengqde bae daengz Fuzgen、 Gyanghsih、 Huznanz daengj daengx guek 13 aen swngjgih, vanzlij Haijnanzdauj、baihsaebaek Gvangjdungh、Cuhsanhgoz daengj dieg, Gvangjsih dwg ndawde dieg ndeu. Miz Gvangjdungh ok rengz hung haeujcoengh, 1964 nienz 10 nyied, 760 lai boux gengndaem ak laeng Cauzsan couh daengz dieg caez gvaq, faenbied daengz Gvangjsih 6 aen digih、46 aen yensi haeuj swnghcanjdui cienz ging soengq bauj.

（Gvangjsih Minzcuz Yenzgiu Cunghsinh hawj gauj）