2 nyied 12 hauh, Swcigih Dangj- veij suhgi、Swcigih Yinzda Cangz- veijvei cujyin、Swcigih Yizcingz Fangzgung Gunghcoz Lingjdauj Siuj- cuj cujcangj Liuz Ningz youq Nanzningz Si genjcaz vixyinx hong yawhfuengz guenjhanh binghraq, caemhcaiq bae diuyenz hong hwngfat canjnieb、hwnqguh hanghmoeg daengj. Liuz Ningz giengzdiuh, Nanzningz Si aeu haeujlaeg hag rox gij yiyi giendingh “song aen laebdingh”, gagrox demgiengz “seiq aen eiqsik”、 giendingh “seiq aen gagsaenq”、 guh daengz “song aen henhoh”， gohyoz dungjcouz yawhfuengz guenjhanh binghraq caeuq ginghci ndawbiengz hwngfat, cienzmienh gvancez doek- saed gij cingsaenz gangjvah youqgaenj “4·27” Siz Ginbingz cungjsuhgi cazyawj Gvangjsih caeuq gij iugouz cijsi youqgaenj baenzroix naeuz hong Gvangjsih, giengiet guh ndei gak hangh hong yawhfuengz guenjhanh binghraq, baujmaenh geiqdoh nduj ndaej “haidou onj” “haidou nding”, giet sim comz rengz cauhlaeb aen Gvangjsih gyaeundei sevei cujyi miz daegsaek Cungguek seizdaih moq, yungh hengzdoengh saedsaeh caeuq cingzcik maenhndei angqcoux Ngeihcib Daih Dangj hai ndaej baenz.

Youq Aen Cungsim Yawhfuengz Guenjhanh Binghvanh Nanzningz Si, Liuz Ningz nyinhcaen dingq gij bauqlwnh hong liuzdiuh caeuq yawh- fuengz guenjhanh binghraq Nanzningz Si, daengz dieg genjcaz hong niemh- dingh aeuyiengh hwzsonh binghdoeg sinhgvanh daengj. Liuz Ningz naeuz, gyoengq vunz guh hong guenjhanh binghraq cwzyin naek, aeu genhciz beksingq youq baihnaj、sengmingh youq baihnaj, caenh’itbouh giengzvaq cwzyin dangrap, cungfaen fatok cien- nieb ciznwngz caeuq gijndei gisuz, giengiet gatduenh diuzlienh cienzlah binghraq.

Gvangjsih Daihseiq Dicizdui Sahcingj Gihdi swnghhoz siujgih miz boux daj Bwzswz gvaqdaeuj baenz binghraq sinhgvanh gvaq, seizneix cingq fungguenj, Liuz Ningz daengz dieg genjcaz vixyinx hong segih guenjhanh caeuq gij cingzgvang bauj- cang vunzlai gvaq ndwenngoenz, yawjngonz gyoengq vunz guh hong yawhfuengz guenjhanh binghraq itsienq, muengh caezgya gyagiengz fuengzhoh bonjfaenh、baujmaenh ancienz, cietsaed ca ndei guenjleix caeuq fugsaeh diegguenjhanh caeuq vunzlai gekliz, caez sim caez rengz guh ndei hong yawhfuengz guenjhanh binghraq.

Youq Cwngzyui Gvanghyoz（Nanzningz） Mizhanh Gunghswh、Nanzningz Gozci Gunghgangj Cung- hab Gyaudoeng Suhniuj Hwzsinhgih hanghmoeg yienhciengz, Liuz Ningz ciengzsaeq roxyiuj doenghgij cingz- gvang gauhsinh gisuz giyez hwng- fat、Nanzningz Linzgungh Ginghci Sifangih caeuq hanghmoeg hungnaek guh ndaej baenzlawz yiengh daengj. Liuz Ningz naeuz, aeu caezcienz、cinjdeng、cienzmienh gvancez leix- niemh hwngfat moq, ciengjca hwngfat seizgei, haeujlaeg hengzguh aen canloz ak soujfuj, haenqrengz doi- caenh canjnieb saenqhwng, doedok hwnqguh hanghmoeg hangh neix, caenh’itbouh demgiengz rengzlaeng ginghci hwngfat.

Ciz Haijyungz、Couh Yigez daengj bae buenx diuyenz.

(Cinz Yizcwz)