Ngoenzbauq youh heuhguh hawbauq、hoihbauq, dwg seiz Funghdangz Lingzsanh gvaqcieng aen vueddoengh dojsug vwnzva miz daegsaek ndeu. Ndawbiengz miz vahsug naeuz: “Gyanghongh coemh faexcuk gonq, haep duz fangz yak sanhsiuh deuz”, ngoenzbauq couhdwg daj aen sibsug neix bienq daeuj. Daj laengbyai Mingzciuz hainduj, ngoenzbauq cienz daengz seizneix gaenq ndaej 300 lai bi lo.

Gak mbanj cungj daeuj couciem, daj ndwencieng co’ngux daengz ngoenz ngeihsam, caeu daengz ngoenzlawz couh youq ngoenz de guh ngoenzbauq mbanj de. Seizde vunzmbanj dawz bauq hung valoeg haenx cuengq hwnj daizbauq, aeu “bauq” coux hek、gouz fuk、nauh cin. Gyanghaet, vunzmbanj caeuxcaeux cix bae daizbauq hwnjyieng aeu fuk.

Guh bauq、soengq bauq、caeq bauq dwg saeh hung laeng ngoenzbauq. “Bauqvuengz” caeuq “bauqvalwg” dwg senq guh ndaej, ngoenzbauq dwg co geij, couh guh geijlai aen bauqvalwg. Aen bauq aeu duknyaengq、ceijsenh、leizguenj guh baenz. San vunq、biuj ceij、veh doz daengj, bouhbouh cungj aeu miz naihsim. Gij bauq de mbangj lumj dujva, mbangj lumj aenlamz, lumj daengloengz……Gak cungj gak yiengh, aenaen hung dangq aen ndij, baihrog veh gij doz youh ndeiyawj youh miz daegsaek minzcuz, hawj vunz haenh mbouj dingz .

Baez vueddoengh, vunzmbanj siuyieng baij noh caeq Lungzsaenz gonq, gouz dajndaem ndaej baenz、haeujok bingzonj. Sat le bouxbauqcangj gingz geiz gaem laz byaij baihnaj hai roen, lwgbauqdoengz gingz bauqva hung, riengz laeng bae caeq cojgoeng, gaendwk gyoengqvunz soengq bauq caeuq bang foux saeceij riengz byaij gaxlaeng, con gvaq roen hung gyanghongh ndaw mbanj, hawj gak ranz soengq bauq soengq fuk. Aen doih daengz gizlawz, vunzmbanj gizde couh hainduj cuengq bauq angqcoux gyoengqde, angqcoux fukheiq. Youz mbanj sat le, aendoih couh dauqma daengz daizbauq, ram bauqva cuengq hwnj gwnzde bae, bouxbauqcangj baez hat, bouxdiemjbauq doq diemj yinx. Singbauq lumj byajraez nei yiengjrumxrumx, vunzmbanj deq singbauq dingz le couh buet hwnj daizbauq bae ciengj ceijbauq dauq ranz, cuengq haeuj ndawcauq、rungzgaeq、rungzbit daengj bae, gouz baenz bi ciengx doenghduz ndaej baenz、guh maz baenz maz、ngoenz ndei gvaq ngoenz.

Saedceij ngoenzngoenz bienq, daengz seizneix ngoenzbauq dem le haujlai doxgaiq, danghnaeuz aeu gij dauhleix gingq bouxlaux gyaez bouxiq、hauqswnh bohmeh daengj gya haeuj ndaw vueddoengh bae. Mbanj caeuq mbanj lij guh haw guh gaicawx, baij miz gaiqngoenzyungh、gaiqhongdawz、gaiqgwn daengj lai cungj lai yiengh; caiq miz dijyuz hozdung lumjbaenz dwkgiuz、foux goengfou、doxdax buet daengj; lij ndaej yawj doengh aen doih betyaem、doih ndaek gyongnyag、doih foux beizva daengj biujyienj cezmuz. Yienhciengz vunz angq vunz riu、vunz lai vunz daih, nauhyied dangqmaz.

Bi 2012, aen dojsug ngoenzbauq laeng Funghdangz Lingzsanh ndaej senj haeuj buek daihseiq swcigih gaep feihyiz mingzloeg. Bi 2018, Aen Dieggiek Cienzswenj Ngoenzbauq Funghdangz youq Funghdangz Cin Mbanjdaciz Vwnzdij Cunghsinh venjbaiz laebbaenz, yungh guh sonhag gij dinfwngz guh bauqva、cawjbanh vueddoengh ngoenzbauq daengj. Ngoenzbauq Funghdangz mboujdan dwg cungj daegsaek minzsug, lij dak miz gij maqmuengh vunz lajbiengz nyienh ndwenngoenz yied gvaq yied baenz、biengz bingz vunz an’onj.