“U——U——”, hojceh daengz camh lo. Aen hojceh neix dwg daj Gunhmingz hai bae Gvangjcouh, seizneix gvaq Camhbaksaek, cingq daengx hawj vunzokloh hwnjroengz.

Geij ngoenz neix dwg gyajgeiz, vunzokloh lairaeuh. Ndaw ci vunz rimfoedfoed, diegnaengh rim liux lo, lij miz haujlai vunz ndwn, caenx youq diuz roen cungqgyang iqet.

“U——”, hojceh youh haidin lo.

Daxgoeng aiq miz caetcib bi ndeu, naengh henz cueng, de cingq caeuq bouxnden gangj baez dapci neix caijsoq de miz gig ndei.

Laxlawz, de dwg bae Namzningz, cawx ndaej biuqfouznaengh. De caeuxcaeux caenj hwnj ci, raen aen diegnaengh neix hoengq, couh naengh roengzbae lo. De ngeix, gou sien naengh gonq, miz vunz daeuj gyaep couh hwnq, mbouj miz couh naengh.

Caijsoq de caen ndei dahraix, ci hai bae yaep ndeu lo, lij caengz miz vunz daeuj gyaep de aeu diegnaengh, ndawsim de caeg angq.

Gyoengq bouxndwn caenx youq roen cungqgyang, hojceh baez bibuengq, gyoengqde couh riengz bibuengq; hojceh baez danhhwnjroengz, gyoengqde gaenriengz danhhwnjroengz, yawj daeuj mbouj miz saek boux ndwn ndaej maenh.

Youq henz ceiq gyawj daxgoeng ndwn miz dahsau ndeu, yawj daeuj miz ngeihcib bi baedauq, ndang byom vunz nyieg. Yienznaeuz baihlaeng dahneix ndaej ing bangxhenz eijnaengh, ndaej suenq miz di baenghndang, hoeng de hix ndwn mbouj maenh, lij ngaiz gij vunz baedauq nyaenj ndaej nengh bae nengh dauq, miz geij baez, de yaek laemx dem, caen hojlienz.

Daxgoeng raen le naeuz:“Dahlan, mwngz yienghneix ndwn, souhcoih lai lo.”

“Goeng, gou mbouj youqgaenj law.” Dahsau naj riunyum han.

“Mwngz bae gyawz?”

“Gou bae Gvangjdungh.”

“O, aeu ndwn seiq aen lai cungdaeuz bw, doekcaw mwngz ha.”

“Mbouj youqgaenj law.”

“Mwngz wnggai lumj gou nei, caeux di hwnj ci daeuj ciemq diegnaengh.”

“W, baezlaeng hag gvai lo.”

Daxgoeng nyinhcaen cim dahsau da ndeu, dahneix ndangnyieg ndaej rumz ci yaek laemx.

Daxgoeng ngauzngauz gyaeuj, sim you dahsau.

Yaepyet, daxgoeng youh naeuz:“Yienghneix ba, gou daengz Namzningz, yaep dem gou roengz ci le, mwngz daeuj naengh diegnaengh gou.”

“Ndei! Gyo’mbaiq daxgoeng!” Dahsau sing mbaeumbeng han naeuz, gij riu gwnznaj de lumj dujva haiangj nei.

“Gwlwng, gwlwng”, hojceh bongh baenaj.

Daxgoeng laepda ninz lo.

Gyoengq bouxndwn couh riengz aenci bibuengq、doenghdanh.

Ci hai haemq nanz le, bouxgenjbiuq daeuj genj biuq lo.

Bouxgenjbiuq yawjyawj mbawbiuq dahsau, geizheih cam:“Mwngz mbouj dwg miz diegnaengh ma, vihmaz mbouj naengh?”

Dahsau aeu ronghda yinx bouxgenjbiuq yawj coh daxgoeng, singdaemq naeuz:“Baenzlai laux, danghnaeuz hawj de itcig ndwn, haengjdingh souh mbouj ndaej.”

“Mwngz caeuq de gangj lwi? De rox mbouj rox aen diegnaengh neix dwg aendieg mwngz?” Bouxgenjbiuq cam.

“Baenzlawz caeuq de naeuz? Mboujndaej caeuq de naeuz! De rox le couh naengh mbouj onj lo.” Dahsau naeuz.

Bouxgenjbiuq ngeuxgyaeuj dauq yawj daxgoeng gaenq ninz ndaek haenx,youh daj gyaeuj daengz din yawj dahsau baez ndeu, gaenriengz hawj mbawbiuq dauq hawj dahsau, naeuz:“Mwngz riengz gou bae dinggwnhaeux ba, gou ra aen diegnaengh ndeu hawj mwngz.”

Dahsau launyaenq lo, lij lawq dem.

Bouxgenjbiuq naeuz:“Lij lawq maz ne? Riengz gou daeuj.”

Gyoengq vunz ndwn henzndang dahsau haenx cungj ndaej nyi lo, gyoengqde lumjnaeuz doxyaeng gvaq nei, bouxboux cungj veqndang hai diuzroen hawj songde. Gwnznaj vunzlai cungj miz danqhaenh.

Dahsau raen yienghneix engq launyaenq lo, de riunyum coh daihgya, coh vunzlai ngaek gyaeuj.

Gaenriengz cij raen de gungjhwet daj lajdaengq dawz ok fouq faexdwngx ndeu. Fouq faexdwngx neix maqhuz gaeuq lo, hoeng ndongqrikrik. Dahsau dinfwngz riengjret dawz faexdwngx dingj haeuj song mbiengj lajeiq bae, de gaemh dwngx byaij bae. Yienzlaiz de dwg bouxga’gvez, song ga mbouj doxbingz, byaij roen ndoekndiengq, yawj hwnjdaeuj caen gwnrengz.

Gyoengqvunz seiqhenz caeuq bouxgenjbiuq raen yienghneix cungj doeksaet liux lo, bouxboux bak aj roengroeng.

Dahsau doq byaij doq doiq gij vunz vih de hai roen haenx sing daemq naeuz “gyo’mbaiq……”

Sawqmwh, ndaw cehsiengh sing dopfwngz goksasa……

Vunzlai baenq gyaeuj riengz baihlaeng dahsau yawj bae……

“Dah neix simndei!”

“Dahneix dwggyaez!”

“Dahneix guh saehndei lo!”

……

Vunzlai mwngz coenz gou coenz.

Daxgoeng deng sing dopfwngz cauz ndiu lo. De cam bouxnden ok maz saeh ne?

Seizneix dahsau caeuq bouxgenjbiuq gaenq byaij hamj aen cehsiengh neix lo.

Bouxnden yaemhywx yaep ndeu, doeklaeng naeuz:“Vunzndei, saehndei, mwngz ninz faenh mwngz ba!”

Daxgoeng raen vunzlai seiqhenz cungj yawj coh de, caemhcaiq ronghda linghyiengh, couh cam:“Sou vihmaz baenzneix yawj gou?”

Vunzlai mbouj oksing.

Daxgoeng roxnyinh saehcingz gven daengz de, youh cam bouxnden: “Dauqdaej ok maz saeh?”

Bouxhaenx gyajcang ngabrumz ngaungau, naeuz:“Dagaemh, haetneix hwnq romh lai, seizneix raninz lo. Ninz yaep he gonq. Mwngz hix ninz ba.” Gangj sat de couh laepda lo.

Daxgoeng gip lo, aeu gencueg nyoeg bouxnden, naeuz:“Mwngz naeuz, mwngz naeuz, dauqdaej dwg maz saeh?”

Bouxnden naeuz:“Dahsau haxbaenh ndwn henzgyawj raeuz、deng vunz nyaenj ndaej nengh bae nengh dauq haenx, dwg bouxndangcanz ndeu bw! Ga de canzcaed, byaijroen aeu gaemh daengx.”

“Nanzgvaiq de yaek laemx geij baez bae.”

“W, hojlienz lai lo.”

“Ga canzcaed lij gamj cawx biuqfouznaengh ha?”

“Biuq de dwg biuqmiznaengh.”

“Hauhneix de vihmaz mbouj naengh?”

“Mwngz naengh aendiegnaengh de lo, de baenzlawz naengh dem?”

“A!” Daxgoeng doeksaet, gaenriengz najmong naeuz:“De vihmaz mbouj heuh gou hwnq ne?”

“De naeuz mwngz dwg bouxgeq, nyiengh hawj mwngz naengh.”

“A,vihmaz dwg yienghneix!”

“Saehcingz couh dwg yienghneix.”

“Gou caen hab dai.”

“Mwngz caijsoq ndei!”

“Seizneix de bae gyawz ni?”

“Bouxgenjbiuq daiq de bae ra diegnaengh.”

Daxgoeng fwt ndwn hwnj, naeuz:“Gou bae ra de.”

“Lij ra de guhmaz dem, mwng yaek roengz ci lo.”

“Gou itdingh aeu raen de, ndi de boizleix, naeuz coenz gyo’mbaiq ndeu.” Daxgoeng gangj sat saemxsax byaij bae……