(ciep geizgonq)

Bozgizswh naeuz: “Danghnaeuz nyaenma vat aen congh ndonj bya ndeu, daj gyaeuj wnq deuz okdaeuj guhlawz guh? Mwngz siengj mbouj daengz diemj neix, dwg mij?”

“Gou dang’yienz siengj daengz lo.” Bijwnh cang yiengh senq couh liuh raen naeuz.

“Baenzde, gangj roengzbae, lwnh dapanq hawj dou.” Bozgizswh naeuz.

Bijwnh daj ndaw rwz vat ok gaemz doxgaiq ndaemndat ndeu, yienzhaeuh yungh niuxfwngz ded de bae. “Ndaw ciengz dajciengx mwngz miz geijlai vunz guhhong?” De cam naeuz.

“35 vunz.” Bozgizswh naeuz.

“Gou miz 36 vunz.” Banghswh naeuz.

“Gou miz 37 vunz!” Bijwnh naeuz, “neix gungh miz 108 vunz lo. Raeuz minghlingh gyoengqde humx aen bya neix hwnjdaeuj. Bouxboux gaem diuz cungq caeuq aen dienh- doengz ndeu. Yienghneix nyaenma couh deuz mbouj ndaej lo.”

Yienghneix, ciengzdajciengx ciep ndaej minghlingh, haemh haenx couh miz 108 boux vunz humx baenz aen gienhumx ndeu humx youq goekbya lo. Gyoengqde yungh faexmbaenq、cungqraez、fagfouj、cungqdinj caeuq gak cungj vujgi yungh ndaej haenx dawz bonjfaenh vujcangh hwnjdaeuj. Yienghneix gaej gangj gaeb duz nyaenma ndeu, caiqlij naeuz duz doenghduz lawz cungj ndaej, cungj mbouj gojnaengz miz banhfap deuz ndaej ok aen bya iq neix bae lo.

Ngoenz daihngeih, gyoengqde laebdaeb souj youq gizhaenx, caj dwk. Bozgizswh、Banghswh caeuq Bijwnh naengh youq gwnz daengq, yawj bakcongh nyaenma dwk. Gyoengqde mbouj gangj geijlai vah, aeu cungq cuengq youq gwnz gyaeujhoq naengh youq gizhaenx ndwi.

Nyaenma sienseng nanz mbouj nanz ruenz coh bakcongh di ndeu, yungh ndaeng nyouqnyouq. Yienz- haeuh youh ruenz dauqma naeuz: “Gyoengqde lij youq gizhaenx.”

“Mwngz haengjdingh ma?” Maex nyaenma couh yienghneix cam.

“Haengjdingh dangqmaz!” Nyaenma sienseng naeuz, “gou youq baihrog yinghleix ndeu couh nyouq raen boux vunz heuhguh Bijwnh haenx, gwnz ndang de haeu raixcaix.”