Singbauq bumxbumx soengq cauqvuengz, lajbiengz ranzranz coux cin daeuj. Youq Guengjsae, daengz lab ngeihsam (mbangj dieg dwg lab ngeihseiq) ranzranz cungj yaek sauq ranz、caeq cauqvuengz、soengq cauqvuengz hwnj mbwn daengj, gouz binaj “baenz fouq baenz miz, gwn van daenj raeuj”, ndigah, ngoenzde vunz couh heuh- guh Cietcauqvuengz.

Goekgaen Ngoenzciet

“Ranz miz cawj, cauq miz vuengz, mbouj cawj mbouj vuengz saeh hoj guh” “Miz mbouj miz gwn cam cauqvuengz, ndaej mbouj ndaej sou cam cauqvuengz”. Gijneix dwg vahsug laeng Vujsenh. Vunzlai laihnaeuz, cauqvuengz dwg Yawhvuengz Daihdaeq baij roengz lajbiengz daeuj cazyawj、guenjleix gij ndeirwix、gwndaenj gak ranz, binaengz ndwenlab ngeihsam、ngeihseiq, de couh hwnj mbwn coh Yawhvuengz Daihdaeq bauqgauq, daengz haemhndaep dauqma lajbiengz. Yiengh le, vunzlai couh youq gwnzcauq nda daizyieng, roxnaeuz venj mbaw- siengq cauqvuengz daeuj buiz.

Nyeh Cauqvuengz

Ngoenz cietcauqvuengz, fungsug gak dieg laeng gih raeuz loq miz mbouj doengz: Hwngz- couh、Duh’anh daengj dieg guh ceizraemxrouh； Hozbuj daengj dieg guh dangzbeng; Cunghsanh daengj dieg duk ceizndek; Ginhsiu daengj dieg cawj haeuxdangzhenj; Denzlinz daengj dieg guh mba- haeuxnaengj; Laizbinh daengj dieg aeu dangzhenj、noh mou、di duhhenj he bae caeq cauqvuengz; Vuj- senh、Gunghcwngz、Yangzsoz daengj dieg cix aeu daeuhfouh、 dangzhenj bae buiz; Gveibingz、Yunghningz daengj dieg coemh ceijmax; dieg Gveiqsae caeq duz gaeqboux ndeu hawj cauqvuengz gwih hwnj mbwn bae. Vunzlai laihnaeuz, dangz、ceizraemxrouh、ceizndek daengj mboujdan feih, cix niu, cauq- vuengz gwn doengh gij doxgaiq neix lai, bak deng nem dwk, daengz gwnzmbwn couh mbouj ndaej naeuz gij rwix lajbiengz lo.

Bouxcuengh、Bouxgun laeng Bwzswz、Yinhcwngz、Hozciz、Dunghlanz daengj, youq ndaw geij ngoenz de lij aeu baetranz cawz- boenq. Gyoengqvunz naeuz, gij boenq bakcauq dwg “bonjgeiq” cauqvuengz, geiq gij ndei hix geiq gij yak. Yienghneix, haetcaeux ngoenzciet ranzranz couh nyaengq sauqranz, dawz boenq bok bae roensamca, hawj “bonjgeiq” cauqvuengz baenz “bonjlujlaj” ndeu, de couh mbouj ndaej bauq hawj Yawhdaeq cing liux lo.

Cietcauqvuengz Hozciz

Youq Hozciz Luzgyaz Cin, guh hozdung caeq cauqvuengz dwg saehhoengh dieg de. Ciuq dojsug, seizde goengdauh buiz cauq- vuengz、cingj cauqvuengz, youq gyang guengjciengz diemj bat cauq feiz, geij cib boux mehmbwk daj ndawbat aeu feiz, diemj dawz aendaeng valoeg ndaw fwngz, caeuq aendoih cauqvuengz lieb- yawj haenx doxcaez liebbyaij, baez ranz baez ranz soengq feiz cauq. Ndaw doih, gyoengq fouxlungz byaij bae gonq, gyoengq gaem geizvaloeg riengz byaij baihlaeng, gwnz mbawgeiz raiz miz cihsaw “rumz swnh fwn yinz” “doek duh ndaej duh” daengj, bet boux vunzsai ndangrengz cangxcangx, ram duzyou cauqvuengz byaij haeuj gyanghongh, con gvaq gyangdoengh. Vunz baihhenz angqfaengfaeng, cuengq bauq ciep feiz cauq, aeu fuk haeuj ranz. Ngoenzde, ciencien fanhfanh bouxhek daj gak dieg daeuj yawj Mbanjcuengh caeq cauqvuengz, daejniemh gij vwnzva daegsaek Mbanjcuengh daegbied neix. Ndwen 12 bi 2021, cietcauq- vuengz Hozciz ndaej senj haeuj aen mingzloeg feihyiz buek daihbet swcigih.

Lumj Luzgyaz Cin guh aen hozdung caeq cauqvuengz yiengh- neix, vunzmbanj mboujdan rox- nyinh cingsaenz rimhoz, gwnznaj miz rongh, hix ndaej hawj dojsug vwnzva Mbanjcuengh fat ndaej hoenghhwd, guh’ ok aen binjbaiz vwnzva caeq cauqvuengz ndeu bae ciepcienz vwnzva Mbanj- cuengh.