Gausa dwg cungj gau conzdungj mizmingz gih raeuz, lumj gausa Yangzmeij、gausa Lungzcouh、gausa Fuzsuih、gausa Ningzmingz、gausa Sangswh daengj cungj gig mizmingz. Gyoengqvunz dieg de nyinhnaeuz, gvaq cieng gwn gausa cij suenq gvaq ciet. Gaiq gausa iqet ndeu, yo miz gij cingzngeih sim niemh ranzmbanj boux youq baihrog, ce miz gij maqmuengh gyaeundei vunzmbanj.

Baez daengz ndawcib ndawnyieb ndwenlab, gwnzhaw doengh dieg neix couh miz haujlai gausa baij gai. Seizde, mboujlwnh ndawsingz hixnaeuz lajmbanj, gyoengqvunz cungj guh gausa nyaengqfoedfoed. Daengx ranz bouxlaux lwgnyez doxcaeuq loengh, ceuj haeux、ceuj duh、muh lwgraz、muh haeuxbauq、cienq dangz、langh mba、gyaux mba daengj. Gij liuh gausa genjdanh, gak dieg cungj ca mbouj geijlai doxdoengz：Haeuxcid、begdangz、lwgraz、duhhenj、duhheu daengj. Lungzcouh、Ningzmingz daengj dieg guh gausa ndaej raen baenz caengz mingzyienj, lumjbaenz gausa lwgraz dwg song caengz mbahaeux gap caengz lwgraz youq cungqgyang. Saek hau gap saekhenj roxnaeuz gap saekndaem, baenz caengz baenz caengz, ndeiyawj raixcaix. Gij gausa Yangzmeij faen caengz couh mbouj baenzlai mingzyienj.

Doiq vunz Yangzmeij ma gangj, gausa caeuq haeuxsei doxdoengz, mwh gvaq cieng, ranzranz hohhoh cungj aeu guh daeuj gwn. Yangz Vwnzgaij dwg bouxciepcienz gij dinfwngz guh gausa Yangzmeij aen hanghmoeg swcigih gaep feihyiz neix. Ndaw cin haujlai bouqdiemq cungj daeuj laeng aen diengzhong de bued ma gai. De daj iq couh yawj bouxlaux ndawranz guh gausa, da raen rwz dingq, nanz le caemh sugseg baenzlawz guh gausa, yaek dawz gijmaz haeujsim. Deq de majhung, caiq daj ndawfwngz daxboh ciep aeu diuzrap hai diengzhong gausa.

Yaek guh’ok cungj gausa mbouj yeq、mbouj nem heuj, cawzok aeu genj liuh ndei, lij aeu rox cienq dangz、boiq liuh dem. Haeuxcid lwgraz (roxnaeuz duhheu、duhhenj) cimq raemx、langh raemx, aeu feiz iq menhmenh ceuj cug. Ndaej le couh muh baenz mba, daehbaengz coux dwk cuengq aen singhgiz ndeu（seizhah cuengq haj roek ngoenz, seizdoeng cuengq song sam ngoenz）, hawj mba bienq cumx, aeu bae guh gausa, gwn hwnjdaeuj mbouj nyan baenzlai. Doeklaeng couh hainduj cienq dangz, begdangz gyaraemx, menhmenh cienq baenz dangzliu, aeu ndau deih, deq dangzliu ndau hwnj raen baenz ndik yaek ok dangzsei bae couh daek hwnj. Cienq dangz yawj hwnjdaeuj lumjbaenz mbouj hoj geijlai, hoeng, yaek cienqok gij dangzliu ndei aeu baengh gingniemh, cienq mbouj gaeuq roxnaeuz cienq gvaqloengz ne, aeu bae guh gau cungj guh mbouj baenz. Deq dangzliu langh ndaej haemq caep, doq raix haeuj mbahaeux bae, dwk youz、mbalwgraz roxnaeuz mbaduh doxgyaux. Geijlai mba gyaux geijlai dangz aeu boiq ndei, mbouj miz gausa couh mbouj diemz roxnaeuz diemzwk lai. Gyaux yinzfwd le couh coq roengz vunq bae, aeu gaiq loekfaex cienmonz ndeu nienjnet, caiq aeu cax gat baenz gaiq baenz gaiq raezseiqfueng, hoemj youq gwnz dak, cuengq haeuj aen gvih cienmonz bae, hawj mbahaeux caeuq dangz ndaej doxnem. Seizdoeng aiq cuengq song diemjcung, fwngz daem dawz gij de mbouj heih sanq couh ndaej dawzok duk hwnj. Cungj gausa vunz gag guh neix gwn hwnjdaeuj saeqnaeh mbouj nem conghhoz、mbouj se, cuengq nanz lij unqnemnem、baenz gaiq mbouj sanq.

Gaxgonq, gausa dwg gvaq cieng aeu bae buiz bouxsaenz caeuq cojgoeng, doeklaeng caiq bienqbaenz gijgwn vunzlai dawz bae cunz caencik baengzyoux ndeu. “糕”caeuq “高” doeg hwnjdaeuj doxdoengz, soengq gau hawj vunz couhdwg muengh de ndwnngoenz engq vuenyungz, ngoenz ndei gvaq ngoenz. Aenvih gausa daibyauj aeu maz ndaej maz, ndigah vunzlai senj ranzmoq、haqsau aeubawx daengj caemh guh gausa ma gwn.

Gwn gaiq gausa youh unq youh diemz ndeu, cieng couh gyawj lo. Boux youq baihrog mbouj ndaej ma, gwn gaemz gausa, lumjbaenz lij youq ranzmbanj, mbouj caengz lizbae.