Luz Siujgenh aiq rox saeh mbouj ndei gangj gvaq, aiq de gaenq rox daengz mbouj ndaej cang raemx cij gai ranz dem. De naeuz de hix mbouj rox baenzlawz guh ndei, cam Guz Yij naemj baenzlawz guh. Guz Yij naeuz:“Yienghneix ba, it dwg ranz dou mbouj aeu lo, dou doiq ranz hawj mwngz, mwngz doiq ngaenz hawj dou. Ngeih dwg ranz dou ciuq aeu, mwngz mwhnduj cawx geijlai ngaenz dou couh hawj mwngz geijlai ngaenz couh ndaej, dou dang cawx aen ranz neix daeuj cuengq doxgaiq, ngoenzlaeng ndaej mbouj ndaej cang raemx couh mboujguenj de lo.”

Luz Siujgenh naeuz de mwhnduj cawx roek fanh maenz, de baenzlawz hix mbouj dauq neix youq gvaq, couh ciuq gyaq gaeuq gai hawj Guz Yij caeuq Cinz Liujliuj.

Luz Siujgenh doiq song fanh maenz dauq, gienh saeh gaicawx neix cungjsuenq guh ndei lo.

Cinz Liujliuj raen ranz iq miz saeh doxgveuj, sim mbouj net lo, de naeuz de mbouj naemj aeu aen ranz iq neix lo, heuh Guz Yij bang de rara, danghnaeuz miz bouxlawz yaek cawx couh gai okbae.

Gangj ngaih guh nanz. Gai ranz mbouj dwg gai bit roxnaeuz gai gaeq, naemj gai couh gai, gienh saeh neix cij ndaej cuengqcuengq gonq, caj miz vunz naemj cawx caiq gangj lo.

“Ai, angqangq riuriu cawx ranz, seizneix bienqbaenz bouxboux sim- fanz, caen ienq mwhnduj mbouj lai cam ndei cij hai ngaenz.” Guz Yij naemj.

Haj

Seizneix haeux ndip gaenq cawj baenz ngaiz, gangj lai vaih simgei, ngeix lai vaih ukgyaeuj. Guz Yij nyinhnaeuz baenzlawz hix naemj banhfap ciep raemx, mbouj miz raemx ranz iq couh begbeg cuengq hoengq dahraix.

Guz Yij daeuj ra boux vunz vuzyez doxyaeng baenzlawz guh, vuzyez lingjdauj naeuz:“Gawqyienz sou dwg aeu ranz hawj bouxgeq youq, nanz ndaej aen simhauq neix, mbouj miz raemx baenzlawz ndaej? Yiengh- neix ba, vuzyez ciep raemx daeuj rwed va rwed nya, sou couh ciep gij raemx vuzyez yungh gonq, yungh raemx bae geijlai ngaenz, sou ndwen he gyau baez ngaenz couh ndaej.”

“Baenz gvaq.” Guz Yij dingq daengz vuzyez lingjdauj yienghneix naeuz, angq ndaej yaek saet geij baez bae.

Ciepdaeuj, Guz Yij couh ra vunz daeuj ciep raemx caeuq an daeng, guh ndei caez de couh daiq daxmeh daeuj yawj ranz. Daxmeh gig rimhoz, de naeuz:“Seizneix gou lij mizrengz hwnjroengz, couh mbouj daeuj ranz iq youq gonq, caj miz saek ngoenz caen gwn ndaej hwnq mbouj ndaej seiz caiq daeuj youq.”

Guz Yij naemjnaemj hix dwg, de cam Cinz Liujliuj daxmeh de seizlawz daeuj youq, Cinz Liujliuj naeuz:“Seizneix yienznaeuz miz raemx lo, dwg ciep vuzyez aeu mbouj dwg ciep gungsuij gunghswh aeu, miz saek ngoenz vunz mbouj hawj ciep raemx le, couh sinhoj lo. Gou lij dwg mbouj naemj aeu aen ranz iq neix, miz bouxlawz cawx couh gai okbae.”

Cinz Liujliuj cungj dwg baenz- neix sim mbouj onj, Guz Yij naeuz:“Ranz cuengq hoengq hix dwg cuengq ndwi, mbouj hawj daxmeh mwngz daeuj youq hix ndaej, mwngz couh co okbae ba.”

Cinz Liujliuj naeuz:“Co okbae le couh nanz gai ndaej lo, gou lij dwg gai okbae ndei gvaq. Doengzseiz, gou caeuq mwngz guhdoih cawx ranz, lij doengzdoq ranzdajcawj ranzdajcaemx dem, daengzcog mehyah mwngz rox le, laihnaeuz gou caeuq mwngz yaek guh maz saeh dem.”

Guz Yij rox Cinz Liujliuj gietsim mbouj aeu ranz, de baez bungz vunzsug couh cam aeu mbouj aeu ranz iq neix.

Caen dwg boux gai caengq cingq bungz daengz boux yaek naengj haeux. Geij ndwen gvaqbae le, miz ngoenz ndeu boux baengzyoux Guz Yij daeuj ra de yaek cawx ranz iq neix.

Baengzyoux dwg guh seng’eiq, yawj ranz le, de naeuz baenz, lij naeuz couh suenq mbouj miz raemx, de couh aeu daeuj cuengq doxgaiq hix ndaej.

Guz Yij heuh Cinz Liujliuj gvaqdaeuj caeuq baengzyoux ciem cih, baengzyoux gyau sam fanh maenz ngaenz hawj Cinz Liujliuj le, gan ranz neix vuenh le sam bouxcawj, cungj- suenq andingh roengzdaeuj.

Roek

Bouxgeq naeuz, bwnda caeu, miz saeh daeuj. Guz Yij gwn caeuz seiz bwnda baihswix cungj dwg caeunwt- nwt. De rox couh yaek miz saeh lo, de gwn caeuz sat le couh mbouj okbae youzbyaij lo, seizneix soujgih yiengj hwnjdaeuj.

“Gobiuj, gwn caeuz mbouj caengz?”

Dienhvah dwg dahlwg mehgux dwk daeuj. Guz Yij naeuz:“Gwn gvaq lo, cingq naengh dwk, nanz mbouj doxraen lo, mehgux lij ndei lwi?”

“Gou dwk dienhvah hawj mwngz couhdwg vih gienh saeh neix lo, daxmeh gou mbouj dwg baenz bingh- ndokmaj ma, seizneix yied ngoenz bingh yied naek lo. Dou youq haj laeuz, ngoenz yaek daiq de okbae lienhlienh ndangdaej, hwnjroengz gig mbouj fuengbienh, dou couh naemj cawx aen ranz iq youq it laeuz he hawj de youq, mwngz okrog lai, vunzsug lai, bang dou yawjyawj gizlawz miz ranz iq yienghneix couh naeuz hawj dou nyi.” Dahnuengxbiuj naeuz.

Guz Yij dingq daengz neix, simfanz uk youh fonj. De gaenq haujlai nanz mbouj bae yawj mehgux lo, mehgux gaenq bingh baenzlai naek de hix mbouj rox. Bak gangj boiz cingz boiz youq gizlawz? Hawj de engq youq mbouj onj dwg ngoenzgonq de miz ranz iq youq ndaw fwngz, cien gienq fanh gouz cij miz vunz cawx, ranz ngamq gai okbae geij ngoenz, mehgux gaenj yungh lo. De naemj: Ai, dah- nuengxbiuj a dahnuengxbiuj, mwngz vaiq geij ngoenz caeuq gou gangj ndaej mbouj ndaej?

Seizneix ngwz bae cij mboengj namh, sau hamj cij ndwnj myaiz, miz maz banhfap dem. Guz Yij yied naemj yied roxnyinh youq mbouj baenz, yied naemj yied roxnyinh doiq mbouj gvaq dahnuengxbiuj, doiq mbouj gvaq mehgux.

Guz Yij hwnz he ninz mbouj ndaek.

Ngoenz daihngeih, de daiq dahnuengxbiuj daeuj yawj gan ranz iq baengzyoux ngamq cawx, gag naemj: Danghnaeuz dahnuengxbiuj yawj hab- hoz, de couh cam boux baengzyoux de, heuh de caiq gai gan ranz iq neix hawj dahnuengxbiuj, yienghneix le, daxmeh caeuq mehgux couh youq ranz it laeuz neix guhdoih youq lo.

Dahnuengxbiuj yawj le, ngaek- gyaeuj haenh mbouj dingz, naeuz:“Miz aen ranz yienghneix hawj daxmeh gou youq ni, dou sim couh onj lo, daxhmeh gou dai da hix laep lo.”

Guz Yij dwk dienhvah cam baengzyoux, baengzyoux naeuz de gaenq miz dajsuenq baenzlawz yungh ranz, ranz iq couh mbouj gai lo.

Mbouj miz banhfap, Guz Yij cimcim dahnuengxbiuj, naeuz:“Yienghneix ba, buen mehgux gvaq- daeuj aen ranz iq gou neix youq gonq, gvaqlaeng raeuz caiq menhmenh ra ranz, danghnaeuz cungj ra mbouj ndaej, couh hawj mehgux youq gizneix ciengxlwenx youq roengzbae, gou lingh ra ranz wnq hawj daxmeh gou.”

Dahnuengxbiuj naeuz yiengh- neix baenzlawz baenz, Guz Yij naeuz:“Mehgux dangq meh gou, baenzlawz mbouj baenz, couh yienghneix dingh.”

Caet

Dahnuengxbiuj sousib gij dox- gaiq mehgux, dajsuenq caj daeggvan roengzban dauqma couh buen mehgux bae ranz iq. Mehgux naeuz dah- nuengxbiuj:“Go Guz Yij mwngz caen miz simhauq, cawx ranz hawj gou youq dem, gou seizcoz guenj de, guenj ndaej dij lo.”

Mehgux gangj sat, daeg goyez dauq lo, raen ndawranz daeb miz daeh hung daeh iq doi doxgaiq ndeu, couh cam dahnuengxbiuj yaek guh maz. Dahnuengxbiuj naeuz baenzneix baenzneix.

Daeg goyez naeuz:“Mbouj ndaej hawj daxmeh bae ranz iq gag youq, sou naemjnaemj yawj, bouxgeq ciengx raeuz sinhoj, ngoenzneix de geq le raeuz doi de okbae gag youq, vunz mbouj naeuz raeuz mbouj hauq ha, caiq gangj bouxgeq bae gag youq, raeuz youh mbouj ndaej youq henz ndang de, de sawqmwh fatbingh baenzlawz guh? Mbouj ndaej, mbouj ndaej hawj bouxgeq okbae gag youq, raeuz sinhoj di mbouj youqgaenj, daxmeh lij dwg caeuq raeuz guhdoih youq.”

Dahnuengxbiuj naemjnaemj hix dwg, mbouj dajsuenq buen mehgux bae ranz iq lo.

Guz Yij rox daeggvan dah- nuengxbiuj mbouj hawj mehgux buen okrog bae youq le, simcingz youh fanfoek hwnjdaeuj lo, gag naemj: Hawj bouxgeq okbae gag youq caen mbouj deng, daxmeh hix mbouj hab buen okbae youq, mienx ndaej miz saek ngoenz de sawqmwh baenz bingh dai ndaw ranz iq hix mbouj ndaej rox dem.

“Aen ranz iq neix beg cawx lo, gvaiq mbouj ndaej cawx aen ranz iq neix miz saeh lai saeh daih.” Guz Yij bek goekga danqheiq naeuz.

（2 sat）