“Mwngz mbouj rox, gij saejdaeuz gwnzbya beij ndawsingz lij lai ne, duzroeg、duzngwz、duzgoep、duzsaehaexma、duzcanqnam、duzndwen……”

“Ai! Doenghgij haenx baenzlawz gwn ndaej?”

“Daengz mbouj miz haeux byaek gwn seiz, dauqfanj ndeigwn raixcaix!”

“Gvaiq mbouj ndaej mwngz hix rox gaeb ngwz.”

“Hei, gij saeh gou rox miz moengj ne.”

“Mwngz youq lajfwngz ‘Vangzvaizgvaiq’ suenq mbouj suenq boux ciengq hung he?”

“Ai—— Dwg bouxbing mbouj miz giz ndwn ndwi.”

“Yienghneix baenzlawz deng guenbing gaemhdawz ne?”

“Ndaw mboenj gyu miz duznon.”

“Gou mbouj rox, maz dwg ndaw mboenj gyu miz duznon?”

“Mwngz mbouj rox engq ndei, raeuz ngoenzneix gangj ndaej daiq lai lo.”

Lungz Byauh fwt rag dawz de, mbouj hawj de bin dauqbae.

“Caiq gangjgoj yaep he ba, gyaeuj mwngz mbouj in luba?”

“Gyaeuj mbouj in le, hoeng gij vah ngoenzneix gangj gaenq mauhgvaq le gij cungjsoq doenghgij bi neix gangj lo, gou mbouj ndaej caiq gangj lo.”

Bouxfamhlaux neix naeuz mbouj gangj couh mbouj gangj lo, caih Lungz Byauh baenzlawz lox de gienq de gouz de, de hix cij bibi gyaeuj.

Couh yienghneix, baez haepbak couhdwg geijcib aen hwnzngoenz.

Aiq dwg Lungz Byauh lauxsaed caemhcaiq simndei, bouxfamhlaux miz di gyaez de lo, mwh mbwn daj nit bienq raeuj, daj raeuj bienq ndat seiz, moix ngoenz gyanghwnz de couh gag daeuj ra Lungz Byauh gangjgoj, de gangj le haujlai saeh gwnzbya, baugvat gij mimiz bang caeggeq “Vangzvaizgvaiq”, hawj Lungz Byauh dingq ndaej youh doeksaet youh gaenjcieng. Haujlai saeh liuh mbouj daengz haenx, gingqyienz daj ndaw bak de mbouj daengx mbouj caenh gangj okdaeuj. Caemhcaiq lij lwnh hawj Lungz Byauh gak cungj bonjsaeh ra’gwn ralix, daegbied dwg gij bonjsaeh gaeb duzngwz、gij fap re duzngwz caeuq gij ywdoj yw deng ngwzdoeg haeb, de gangj ndaej daegbied nyinhcaen sijsaeq, Lungz Byauh hix dingq ndaej gig mizyinx.

(caengz sat)