Sam beixnuengx iq bae gyaeuj- mbanj gwnzbya nyaeb makndoi seiz roeb goengsien ndeu, goengsien raek aen gyohgim ndeu, ndongqmyanmyan gig lwenqda.

Sam beixnuengx iq doxyaeng le, couh boenq goengsien yaek aeu aen gyohgim. Goengsien nyeux gyaeuj raen sam boux lwgnyez gaen boenq mbouj dingz, cam gyoengqde vihmaz boenq daeuj ne? Sam boux lwgnyez naeuz yaek aeu aen gyohgim haenx. Goeng- sien riunyumnyum naeuz:“Aen gyoh- gim neix dwg cienzgyabauj, dai cungj mbouj ndaej soengq hawj vunz.” De gienqnaeuz sam beixnuengx gaej boenq lo, vaiqdi doxdauq maranz, bohmeh ra gyoengqde mbouj raen yousim. Sam beixnuengx mbouj dingqgangj, baenzlawz cungj yaek boenq aeu aen gyohgim haenx. Goengsien ngeix hawj gyoengqde boenq geij ngoenz naiq le gag ienqhoij.

Sam beixnuengx iq boenq geij ngoenz le, Daegngeih caeuq Daegsam ienqhoij lo, hoeng Daegdaih mbouj fug, de naeuz song daegnuengx:“Siengj baema sou gag bae, boenq goengsien daengz laux gou hix aeu boenq roengzbae, gou itdingh aeu ndaej aen gyohgim neix cij gamsim.” Doeklaeng Daegngeih caeuq Daegsam dauqranz lo. Goengsien raen Daegdaih baenzneix gangj, gag ngauz gyaeuj riumbw, de ngeix caiq boenq geij ngoenz dem, Daegdaih caemh lumj song daegnuengx de nei baema lo. Daegdaih gag bae boenq goengsien, goengsien mbouj dingz gienqnaeuz, de cungj ngangz mbouj dingq haeujrwz. Goengsien naeuz Daegdaih:“Seizneix mwngz lij nomj, ienqhoij lij gib, deq daengz laux le cij rox ienqhoij, mwngz yaek daej cungj daej mbouj ok raemxda lo!” Daegdaih haeb heuj naeuz:“Vih aeu ndaej aen gyohgim mwngz, gou dai cungj mbouj ienq- hoij.” Goengsien dingq le danqheiq, caen dwg duzvaiz gyangq baenzlawz hix beng mbouj ndaej dauq!

Baez yaepda gaenq gvaq haujlai bi lo. Daegdaih gwnznaj mumh raez le cij ienqhoij, boenq goengsien yaek aeu aen gyohgim, dangq muengh gwnzmbwn ndaundeiq doek. De daej- nganga caeuq goengsien nyinh loek, caemhcaiq gaenq byaij gvaq cien bya fanh dah, roen gyae’gyanggyang, baenzlawz ma ranzmbanj ne? Goeng- sien naeuz:“Mwngz caensim dingq gou gangj, danghnaeuz ma daengz ranz- mbanj roengzrengz guhhong, caenhsim cauhgya, gou miz fapswt couh hawj mwngz doq ma daengz ranzmbanj.” Daegdaih doiq goengsien mieng naeuz:“Ndaej hawj gou ma daengz ranz- mbanj, daxgoeng gangj maz gou cungj dingq.” Goengsien youq angjfwngz Daegdaih sij geij aen saw, caiq daengq de bae daengz bouqhaeux yaek gwn maz, nam geij coenz caiq bek fwngz youq gwnzdaiz, ngaenz couh daj angjfwngz okdaeuj lo.

Daegdaih buenq saenq buenq ngeiz, danghnaeuz bek fwngz le angj- fwngz ndaej ok ngaenz, yienghneix mbouj beij ndaej aen gyohgim goeng- sien vanzlij ndei ha? De haeuj henz roen aen bouqhaeux, ciuq goengsien daengq gij vah guh, heuh boux- cawjdiemq baij byaek hwnj laeuj le, nam geij coenz le bek fwngz youq gwnzdaiz, aen ngaenzhau caen daj angjfwngz okdaeuj lo! De laihnaeuz dwg yawj dava, caiq guh mbat ndeu, angjfwngz bek youq gwnzdaiz le, aen ngaenzhau youh daj angjfwngz ok- daeuj. De sim’angq ndaej yaek fat- vangh, saet hwnjdaeuj heuh:“Gou fatcaiz lo!”

Ma daengz ranzmbanj, song daegnuengx cungj baenzgya miz lwg lan lo, raen de song fwngz hoengq- vatvat dauq couh cam:“Ndaej aeu aen gyohgim goengsien la?” De daek’eiq naeuz:“Aen gyohgim suenq maz doxgaiq dijbauj, goengsien son hawj gou fapswt, baezlaeng gou yaek aeu geijlai ngaenz couh miz geijlai ngaenz!” Song daegnuengx mbouj saenq, naeuz de byaij roen gyae naiq le uk luenh, conghbak luenhndau gij vah loqfangzhwnz. De heuh song daegnuengx cingj vunzmbanj daeuj, de loengh fapswt bienq ok ngaenz hawj caezgya yawj. Vunzmbanj baez dingq cungj gyonjcomz youq gyanghongh ranz de, yawj de baenzlawz loengh.

De raen daengx mbanj bouxlaux lwgnyez cungj daeuj caez, riuvauvau naeuz:“Gou gaen goengsien okrog bae geijcib bi, goengsien son hawj gou fapswt, baezlaeng gou ngoenz daengz haemh ninz ndwi hix miz ngaenz sai, yaek aeu geijlai ngaenz couh miz geijlai ngaenz.” De gangj sat couh nam geij coenz, baez bek fwngz youq gwnzdaiz, aen ngaenzhau couh daj angjfwngz de okdaeuj. Gyoengq vunz- mbanj caez doeksaet, mbouj rox de baenzlawz bienq ok ngaenz daeuj. De heuh song daegnuengx dawz aen loz cuengq henzdaiz, yaek aeu daeuj coux ngaenz. Aen loz baij henzdaiz le, de caiq nam geij coenz, bek fwngz gwnz- daiz, baez biengj angjfwngz, baezneix mbouj raen miz ngaenz. Dwg nam loek la? De caiq nam coenz, haenqrengz bek fwngz youq gwnzdaiz, lij dwg mbouj raen saek aen ngaenzhau. De simgip naj hoengz, mbouj dingz nam, mbouj dingz bek fwngz youq gwnz- daiz, bek ndaej fajfwngz ok lwed lo, cungj mbouj raen saek aen ngaenzhau.

Seizneix de fwt rox, goengsien daengq ndaej mbouj loek, goengsien cij bauj de bingzan ma daengz ranzmbanj, yaek aeu maz, baezlaeng couh baengh de song fwngz gag cauh. Lajbiengz baenzlawz miz ngaenz gag daj ndaw hoengheiq bienq okdaeuj ne?