“Duz Gyauhyinz daj ndawraemx daeuj, dozyouq ranzvunz, ngoenzngoenz gai baengz, yaek lizgyae seiz, cam bouxcawj aeu gaiqdajcoux, daejswdswd, raemxda loenqroengz couh baenz caw, yaep ndeu couh rim buenz, doq dawz buenz caw soengq hawj bouxcawj.” Neix dwg ndawsaw gaeuqgeq geiqsij. Daj gij goj neix ndaej yawjok duz byavunzgyaeu simsoh gyoh bouxgungzhoj. Neix couhdwg aen cienzgangj haidaeuz gven- daengz byavunzgyaeu guek raeuz. Gij vwnzva aenhaij Bwzhaij naekna, dieg de caemh miz gij cienzgangj byavunzgyaeu, cawjdaeuz riuz youq ranghdieg henzhaij Bwzbuvanh. Bi 2012, gij cienznaeuz byavunzgyaeu Bwzhaij ndaej senj haeuj buek daihseiq swcigih gaep feihyiz mingz- loeg.

Raemxda Byavunz Loenq Baenz Caw

Cienzgangj, Bwzhaij miz daegmbauq dwkbya ndeu heuhguh Linz Yinj. Ngoenz ndeu de ok haij dwkbya, bungzdaengz duzhaijgvaiq, duz de boenq Linz Yinj mbouj cuengq, langh hung lai, daeg neix couh doek haij deng sieng yaek dai lo. Seizde Dahhaij dahlwg aenhaij raen le aeu cawrongh hoenxdeuz duzhaijgvaiq, gaeuq hwnj Linz Yinj youh bang de yw sieng. Songde ngoenzngoenz guhdoih, nanz le couh doxgyaez, giet baenz gvanbaz youh dauqma gwnzbiengz. Dahhaij vunz gyaeu simsoh、roxsoq coengmingz, vunz ndaw- mbanj cungj haengj de. Hoeng, aenvih ceh cawrongh gyaeundei lwenqda, gyoengq vunzrwix dieg de foenfoen baij vunz bae ciengj aeu. Gvanbaz neix mbouj lau vunzrwix, buek dai dwk vunzdig, hoeng doeklaeng Linz Yinj deng gyoengqde gaj dai. Dahhaij siengsim dangqmaz, aeu cawrongh gaj dai gyoengq vunzrwix, bouxdog dauqma ndawhaij. Aenvih de sim niemh bouxgvan, ngoenznaengz daejsebseb, raemxda rih roengz ndawhaij Bwzbuvanh bae, duzbei gyan gij raemxda de, couh majok gij caw ronghsag lwenqda. Ndigah gij caw Hozbuj luenzled rongh ndei, ndaej gai daengz seiqgyaiq gak dieg.

Lungz Sanhmei Simsoh Gaeuq Vunz

Hozbuj Yen Sahdenz Cin caeuq Bwzhaij Si Mbanjbwzlungz lij riuz miz aen goj byavunzgyaeu mbouj doengz ndeu. Cienzgangj cwngzsieng duzfw laeng Lungzgoeng Namzhaij gwncienz lai, Lungzvuengz boenq de ok goeng. De daengz ranghhaij Aencingzcaw Bwzlungz ciu le bang bing gungq cieng baeu guh saehrwix, gvat aeu cienzngaenz doxgaiq vunzmbanj, gyoengqvunz mbouj miz fap le couh haenqheiq fanjgang. Cwngzsieng duzfw ndatheiq lai couh bongj rumzhaen, bongj dwk vunz mbin ranz doemq, gizgiz cungj deng vaih, dauqcawq cungj dwg vunzdeuznanh. Dahlwg daihsam Lungzvuengz （Lungz Sanhmei）rox gij saeh neix le, couh aeu cij swhgeij bang beksingq yw sieng, bang gyoengqde dap bungz guh ranz、coih ruz bouj muengx, dauq hwnq ranzmbanj, caiq siu le gij fap cwngzsieng duzfw, gyoengq bing gungq cieng baeu caemh douzyangz liux. Gyoengqvunz gig gyo’mbaiq de simndei gaeuq bouxyaekdai、yw bouxsieng, couh hwnq aen miuh bae buiz de. Bouxgunghcuj neix roxyiuj vunzlai guhhong dwgrengz, ngoenznaengz couh youq ranghhaij Bwzlungz caeuq Sahdenz youz bae youz dauq, bang beksingq ndaem naz、daemj baengz、doq ruz、san muengx、ra caw daengj. Vunz daihlaeng cungj naeuz, duzyuzgwnq ndawhaij couhdwg Lungz Sanhmei bienqbaenz, dwg gij saenz henhoh vunzdwkbya henzhaij.

Gij Gyaciz Cienzgangj Byavunzgyaeu

Gij cienzgangj Dahhaij caeuq Lungz Sanh- mei dwg gij daegsaek vwnzva henzhaij, aensim Dahhaij gyaeundei ronghsag lumj caw nei; Lungz Sanhmei cix aeu cij gaeuq bouxmiznanh, eiqsei naeuz sengmingh dwg daj ndawhaij daeuj, caiq haenh bouxgunghcuj neix coengmingz simsoh、gyaezmaij beksingq. Gyoengqvunz cienz doengh gij goj neix seiz, lij ndaej daj ndawde hag ndaej dauhleix, ngeixngeix swhgeij aeu yienghlawz guhvunz、guhsaeh, baenzlawz vih aenbiengz huzndei、mwnhoengh ok faenh rengz swhgeij.

(Swhliu daj Bwzhaij Deihfuengceiq Bien- conj Veijyenzvei Bangunghsiz aeu)