It

Guz Yij hajcib lai bi, vunz mij roek sang, ndang haemq biz, ranz de youq roek laeuz, ngoenz hwnjroengz geij baez, de raen miz di dwgrengz.

Daxmeh Guz Yij betcib bi, gaen Guz Yij gwn youq, de bouxgeq ngoenz youq ranz mbwq lai, maij okbae byaijbyaij, ngoenz he hix aeu hwnj- roengz geij baez. Guz Yij couh naemj: Yienghneix roengzbae mbouj baenz lo, vunz geq le, cungj miz ngoenz naet ngoenz bingh, danghnaeuz miz saek ngoenz daxmeh roxnaeuz swhgeij ninz mbouj hwnq, roxnaeuz byaij mbouj ndaej, baenzlawz daj roek laeuz hwnj- roengz?

Guz Yij gietdingh ra gan ranz iq youq it laeuz ndeu, bwh ndei ngoenz daxmeh byaij mbouj ndaej seiz, hawj daxmeh youq, yienghneix de couh mbouj yungh hwnjroengz roek laeuz lo.

Aen siujgih Guz Yij youq neix miz samcib ngeih doengh laeuz, caengz daih’it cungj dwg ranz- cuengqci. Guz Yij caen ienq, mwh de ngamq cawx ranz seiz, gij ranz- cuengqci neix miz daihbaj, gyaqcienz lij haemq cienh dem, seizneix vunz cungj cawx bae caez lo, couhdwg miz vunz doiq, hix dwg gan beij gan bengz.

Guz Yij youq ndaw siujgih baenq geij hop, mbouj raen miz ranz iq gai, miz geij gan ranzcuengqci dwg gai lo, vunz heuh cibseiq cibhaj fanh maenz cij gai. Guz Yij mbouj naemj aeu aen ranz baenzlai bengz, caiq gangj aen ranz baenzlai bengz de hix aeu mbouj ndaej.

Ngoenz ndeu, Guz Yij youq ndaw siujgih ra ranz seiz, boux mehmbwk seiqcib lai bi ndeu byaij gvaqdaeuj coh de, mehmbwk cam Guz Yij ra maz, Guz Yij naeuz ra ranz iq hawj daxmeh youq. Mehmbwk miz di doeksaek, naeuz songde naemj daengz giz ndeu bae le, de hix dwg ra ranz iq hawj daxmeh youq. Songde couh yienghneix yied gangj yied doxdeng lo.

Mehmbwk heuhguh Cinz Liujliuj, de ndang loq biz, noh hau naj oiq vunz baenzsau. De naeuz daxmeh de ndaej betcib bi lo, baenz bingh gvaq, song ga byaij roen mbouj daiq fuengbienh, ranz de youq haj laeuz, ngoenz hwnj- roengz gig dwgrengz.

Cinz Liujliuj daengq Guz Yij naeuz:“Aen siujgih neix mbouj miz ranz iq gai, aen siujgih wnq miz gai hix ndaej, mwngz raen gizlawz miz couh bang gou aeu gan ndeu.”

Guz Yij naeuz:“Ndaej ndaej ndaej.”

Miz aen gietdingh neix, Guz Yij caen yunghsim, baez ndaejhoengq couh dauqcawq bae ra ranz, de naemj: Ranz iq dwg aeu hawj daxmeh youq, caeuq ranz youq doxliz daiq gyae hix mbouj ndaej. Guz Yij couh youq gij siujgih gyawj ranz swhgeij haenx ra ranz gonq.

Ngeih

Guz Yij cibroek bi seiz daxboh couh baenz bingh dai lo, daxmeh boux ndeu ciengx gyoengqde haj beix- nuengx, gwn geijlai sinhoj mbouj miz vunz rox.

Gaxgonq guhhong aeu goengfaen cij ndaej miz haeux gwn, daxmeh ngoenz hong he hix mbouj lauq, gyoengqde geij beixnuengx couh baengh mehgux daiq. Mehgux seizde ndaej cibgeij bi, de daiq Guz Yij hung le youh daiq lwgngeih, daiq lwgngeih hung le, youh daiq lwgsam, caj Guz Yij geij beixnuengx cungj majhung le, mehgux hix aeu bae guhhong aeu goengfaen lo, de mbouj ndaej haeuj hagdangz doegsaw gvaq.

Guz Yij lij iq seiz, ndangdaej cungj hwnj humz, baez haeuj haemh couh heuh vunz gaeuhumz. Miz haemh ndeu, mehgux baeg lai, de bang Guz Yij gaeuhumz seiz ninz ndaek lo. Guz Yij raen yienghneix, dawz faggvix mehgux aeu daeuj ding haiz haenx gvaqdaeuj, haenqrengz coeg haeuj gwnz mbaq mehgux bae, in ndaej mehgux swenj dai swenj lix, yaep ndeu, geu buh mehgux lwed lae dumz liux.

Doeklaeng mehgux mbouj fad de, aeu daeuhyieng dwk baksieng le, couh naeuz de gvaqlaeng mbouj ndaej caiq baenzneix sieng vunz lo, mboujnex couh deng gungh’anh gyaeng hwnj- daeuj.

Mehgux coengmingz、baenzsau、rox dajsuenq, bohgo yaek bae dangbing seiz couh coux mehgux gvaqbae. Bohgo mbouj youq ranz, mehgux okhaq le de couh bae ranz bohgo guhgya lo, Guz Yij liz mbouj ndaej mehgux, ciengzciengz daej bae ranz mehgux, mizseiz lij nauh aeu caeuq mehgux ninz dem.

Bohgo dangbing doxdauq, anbaiz youq yienhsingz guhhong, mehgux hix buen gya daengz yienhsingz youq. Guz Yij baez daeuj yienhsingz couh haeujok ranz mehgux, mehgux dawz Guz Yij dang guh lwg caenndang nei, lwg ndang de gwn maz Guz Yij couh ndaej gwn maz.

Mehgux ciengzciengz naeuz Guz Yij, raeuz seng youq ndawrungh, guh hoj gwn hix hoj, aeu siengj banhfap okrog daeuj guhhong cij ndaej. Guz Yij mbouj doegsaw le, de couh daengz yienhsingz ra hong guh. Mbwn miz lwgda, lwggyax hix baenz vunz. Guz Yij youq yienhsingz guhhong geij bi, ra ndaej di ngaenz he lo, de naemj ma ranzmbanj guh ranzlaeuz, mehgux rox le, gienq Guz Yij naeuz:“Raeuz vunz ndawrungh, mizrengz hix mbouj rox bae gizlawz ra ngaenz, seizneix mwngz miz di ngaenz lo, youq yienhsingz cawx ranz youq, caj daengzcog rom ndaej ngaenz caiq bae ranzmbanj guh ranz hix ndaej.”

Seizhaenx ndawsingz diegranz cienh, fanh lai maenz ngaenz couh cawx ndaej diegranz, mehgux raemh bae raez dauq, gangj liux mbouj noix dauhleix, Guz Yij cij gietdingh cawx dieg hwnj ranz. Couh yienghneix, Guz Yij dwg ndawmbanj boux daih’it ndaej youq ndawsingz cawx dieg hwnj ranz. Gvaqlaeng de youh cawx dauq ranz daihngeih, caencaen cingqcingq baenz vunz ndawsingz lo.

Sam

Guz Yij youq Cinghsanhyenz Siujgih ra ndaej ranz lo, dwg sam gan ranz iq, song gan caemh baiz, gan he vang youq baihlaeng, sam gan ranz rangh youq giz ndeu, Bouxgairanz heuhguh Luz Siujgenh, dingqnaeuz geij bi gonq de youq yienhsingz dajhong, cawx ndaej sam gan ranz iq neix, dajsuenq daengzcog youq neix an’gya, gvaqlaeng de haq daengz diegrog bae, yungh mbouj daengz ranz iq lo, de couh dajsuenq gai okbae.

Ranz dwg sam gan, Luz Siujgenh naeuz naemj cawx couh sam gan baez he cawx liux bae, baez gan baez gan cawx de couh mbouj gai lo.

Guz Yij caeuq Cinz Liujliuj doxnaeuz, songde guhdoih cawx sam gan ranz iq neix roengzdaeuj. Ranz iq mwhnduj dwg gag aen gag aen, vihliux guh baenz dauq ranz ndeu, Luz Siujgenh heuh vunz doemq ciengz hai song aen dou, hawj sam gan ranz doxdoeng. Couhdwg naeuz, mwhnduj sam gan ranz mbouj doxdoeng, seizneix sam gan ranz cungj doxdoeng lo.

Guz Yij caeuq Cinz Liujliuj doxyaeng naeuz:“Ranz aeu boux gan boux gan, mwngz aeu gan baihgvaz, gou aeu gan baihswix, gan baihlaeng faen guh song, aeu daeuj guh ranzdajcawj caeuq rugdajcaemx. Cinz Liujliuj naeuz:“Ndei ndei, song boux vunz geq youq hix mbouj aeu youq geijlai gvangq.”

Sam gan ranz iq, bet fanh maenz ngaenz, Guz Yij caeuq Cinz Liujliuj boux seiq fanh maenz couh cawx roengzdaeuj lo.

Ndaw ranz iq gaenq miz dienh, lij aeu cang raemx dem cij ndaej youq. Guz Yij bae cam Vuzyez cang raemx aeu banh maz soujsuz. Bouxvuzyez naeuz:“Bouxcawjranz raiz sinhcingj daeuj, Vuzyez gaep gunghcangh, doeklaeng gyau sinhcingj bae gungsuij gunghswh, vunz daeuj cazyawj hab cang le, couh ndaej cang lo.”

Seiq ngoenq gvaqbae le, Guz Yij ndaej dunghcih naeuz geij gan ranz neix mbouj ndaej cang raemx. Guz Yij miz di doeksaet, Baenzlawz mbouj ndaej cang raemx ni? Mbouj ndaej cang raemx baenzlawz youq vunz, mbouj ndaej cang raemx cawx aen ranz neix couh beg sai ngaenz lo. Naemj daengz neix, Guz Yij couh daengz gungsuij gunghswh bae cam, vunz naeuz de nyi, sam gan ranz iq neix, bouxcawj gag doemq ciengz guh dou, vunz gaenq gauq hwnj baihgwnz bae gvaq, baihgwnz hix baij vunz roengzdaeuj cazyawj, doemq ciengz guh dou, dwg saeh loeng lo, mbouj ndaej cang raemx.

Guz Yij roxnyinh gyaeuj hung liux, de lwnh gij saeh baedauq hawj Cinz Liujliuj nyi, Cinz Liujliuj hix doeksaet hwnjdaeuj, song boux yaep seiz hix mbouj rox baenzlawz guh.

Seiq

Guz Yij youq baihrog buenq ciuh vunz, aen ukgyaeuj de lainoix hix rox di baenzlawz guh saeh. De heuh bouxgairanz Luz Siujgenh gvaqdaeuj, geij boux naengh roengzdaeuj dox- yaeng baenzlawz guh. Guz Yij naeuz Luz Siujgenh:“Ranz dwg mwngz guh loeng gonq cij mbouj ndaej cang raemx, seizneix vunz gaenq mbouj ra mwngz aeu saeh, danghnaeuz dou gangj okbae, mizgven bumwnz itdingh caiq daeuj ra mwngz, daengz seiz- haenx, mwngz bienqbaenz mbouj miz saeh gag miz saeh bae, mwngz yawj baenzlawz guh ndei ba.”

（1）