Daxboh ndeigyaez gou:

Mwngz ndei!

Mwngz haujlai nanz mbouj ma ranz lo, dwg mbouj dwg guhhong nyaengq lai？Mwngz yaek haeujsim yietnaiq ha! Gou youq ranz dingqgangj raixcaix, mwngz cuengqsim ha. Gou gig siengj mwngz, mwngz seizlawz dauqma?

Duenh seizgan neix gou caeuq daxmeh bae ranz daxdaiq baez ndeu. Youq ranz daxdaiq miz saeh haisim, hix miz saeh mbouj haisim. Haisim dwg daxmeh caeuq daxdaiq suk faengx, faengx gig ndeigwn, ndawranz lij miz haujlai, mwngz ma gwn lwi? Baezneix daxmeh lij daiq gou bae aen daemzyouzraemx ndeu, gizhaenx raemx daiq feuh, ngamq daengz gabi gou, mbouj ndei youz geijlai, hoeng gou youq gizhaenx youzraemx haujlai nanz. Daxmeh lij daiq gou bae cauhsi, de hawj dou moix boux ngeihcib maenz, gou caeuq gobiuj cawx le haujlai doxgaiq ndeigwn, hoeng gou cungj gwn caez lo. Daxboh baezlaeng mwngz dauqma， itdingh daiq gou bae cauhsi ha.

Daxboh duenh seizgan neix, gou gig nyinhcaen hagsib, bingzseiz hix gyaez yawj di saw rogdangz lo. Gou lij lienh sij cozvwnz, gaenq sij ndaej 11 bien lo. Gou doengxngoenz sij coz- vwnz, doengxhaemh youq ranz mehgux cau cozvwnz. Baezlaeng gou aeu lai yawj di saw rogdangz, lai sij ngoenzgeiq, lai lienh sij cozvwnz.

Daxboh, mehgux gangj gou sij saw mbouj ndei, gou aeu nyinhcaen lienh sij saw, aeu lienh ndei sij Sawgun Cungguek.

Daxboh sien gangj daengz gizneix ba. Maq- muengh mwngz ma ranz caeuq gou guhcaemz ba.

Cuk mwngz:

Ndang cangq rengz hung! Guhhong swnhleih!

Lwg: Cinz Cihsan

Bi 2021 ndwen 12 ngoenz 11

(Sanglinz Yen Dafungh Cin Cunghsinh Hagdangz seiq nienzgaep Cinz Cihsan boux lauxsae son’gyauq Mungz Cwngzgen)