Lozswhfwnj(faenjlwgsae) dwg 20 sigij 70 nienzdaih satbyai caeuq 80 nienzdaih codaeuz youz doengh boux mehmbwk siujsoq minzcuz Liujcouh Gujbuzgaih cauh’ok, daj dah Loz daengz nax Vangz, daj mehbuz Veiz daengz yahgeq Lanz, gyoengqde cungj dwg “daxmeh lozswhfwnj”. Vanj lozswhfwnj iqetet dwg yiengh doxgaiq gyonj miz gij vwnzva gwnndoet lai minzcuz laeng Gvangjsih, miz cingz minzcuz doxgiet noengznwd, mboujdan miz gij lizsij gaeuqgeq boux vunz ciuhgeq Liujcouh couhdwg“Vunz Liujgyangh”“gwn sae”, lij miz gij cojcienz vwnzva vunz siujsoq minzcuz baihnamz lumj Bouxcuengh、Dungcuz、Myauzcuz daengj “gwn soemj”, youh miz gij vwnzmingz“haeuxnaz”minzcuz gangj Vahcuengh Vahdung, caiq lij yungh gij dinfwngz gwnndoet Bouxgun Cunghyenz. De dwg gij dinfwngz guhmienh Bouxgun baihbaek caeuq gij sibgvenq gwnndoet cojcienz siujsoq minzcuz lumj Bouxcuengh、Yauzcuz、Myauzcuz、Dungcuz daengj doxgyaux cix cauhbaenz yiengh doxgaiq ndeindet neix. Yiengh doxgaiq miz haujlai vwnzva doxgyaux habngamj baenzgwn dangqmaz neix, hawj Siz Ginbingz cungjsuhgi nyaenx mbouj ndaej “coengh gangj” Liujcouh lozswhfwnj.

（Gvangjsih Minzcuz Yenzgiu Cunghsinh hawj gauj）