Lanz Fuzlungz swiq gu、caux feiz, moix guh yiengh hong ndeu, cungj caenhliengh longh ndaej yiengj dihe. Mehyah caeuq laeq lwg Dungj Cigoz daengx song lwgda, Lanz Fuzlungz boux rih byaek neix, mbouj dwg couh cawj song gaen noh lwi, yungh gij rengz couh lumj cawj duz mou hung ndeu nei.

Feiz dawz lo. Yaepyet gij noh ndaw gu couh hainduj miz fwi heiqrang, Giuh Yizswngh caengz sikhaek ndiusingj gvaqdaeuj. Lanz Fuzlungz gaem di batgak ndeu yaek gveng roengz ndaw gu noh bae, deng Dungj Cigoz laengz dawz, Dungj Cigoz naeuz, mwngz siengj haemz dai goenggeq ha? De mbek hai gij fwngz Lanz Fuzlungz, gip duj batgak ndeu. Couh cuengq duj ndeu. De naeuz.

Lanz Fuzlungz gya liu haeuj ndaw cauq bae, gij feizmbaw bongh daengz gwnz fagu. Ndaw gu yaepyet couh goenjbibi hwnjdaeuj, gij heiq fwi ok fagu foedfoed, hojsik ndaw ranz mbouj miz rumz, gij heiqrang biu daengz henz ndaeng Giuh Yizswngh seiz, gaenq damh bae haujlai lo. Lanz Fuzlungz ra daeuj baj bingqbeiz ndeu, yiengq Giuh Yizswngh mbiengj haenx yungh rengz beiz, gij fuengfap neix caen baenz bw, Giuh Yizswngh goenggeq lumzgeiq neix, goenggeq ciengxlwenx cij geiq ndaej daengz 70 bi neix, deng raq dem raq feihdauh rang noh batgak oenq singj lo, de daj bak dupdup, gangj gawqvah daih’it couh dwg: Dawz vanj daeuj.

Mehyah caeuq laeq lwg Dungj Cigoz ngauzngauz gyaeuj, ndaw bak hwng sing ndeu, couh byaij okbae lo. Gyoengqde mbouj siengj deq youq gizneix dem lo, gyoengqde siengj vaiq di okbae bauqnaeuz gyoengqvunz Yejmaj Cin nyi, Lanz Fuzlungz dwg gangj vahgyaj, Giuh Yizswngh danghnaeuz mbouj haengj gwn noh, ndaej lix daengz ngoenzneix ha?

Yawj dwk Giuh Yizswngh gwn baenz gaemz baenz gaemz noh, gij simcingz Lanz Fuzlungz mizdi saethaed he, de doiq Giuh Yizswngh hemq naeuz: Baezgonq mwngz baenzlawz daejnga’nga la, lumjnaeuz raen gou youq ndaw vanj cuengq ywdoeg nei. Gij sing rongx de haep mbouj ndaej Giuh Yizswngh, Giuh Yizswngh ngaem gyaeuj gwn noh, mbouj leixlangh de saek di.

Dungj Cigoz lauxsaed, de mbouj bemx Lanz Fuzlungz, dauqfanj bang de haiduet, Dungj Cigoz naeuz, hojmaz caeuq noh bengz doxdoengz.

Hojmaz youq diegrog gai ndaej bengz dangqmaz, youq ndaw Yejmaj Cin gai mbouj bengz geijlai law, Dungj Cigoz dawz gij gyaqcienz hojmaz Baekging bang Lanz Fuzlungz haiduet, Lanz Fuzlungz dangyienz mbouj muenxeiq lo. Mbouj dwg gij vwndiz ngaenz, dauqfanj dwg gij vwndiz gvanhaeh daengz bonjfaenh ged mbouj ged hane.

Dungj Cigoz naeuz, mwngz gaej nyinhcaen lai, baezgonq dwg baezgonq, baezneix dwg baezneix, mbouj ndaej gangjmingz gijmaz vwndiz. Youq Yejmaj Cin, danghnaeuz mwngz aeu gienh saeh ndeu, daeuj cwngmingz gij saeh wnq, doeklaeng cungj dwg bonjfaenh gag gwn haemz hane. Gij dauhleix neix, gyoengqvunz canghdoz raeuz roxyiuj, gyoengqvunz gai byaek sou mbouj itdingh roxyiuj.

Gij vah Dungj Cigoz hawj Lanz Fuzlungz moengzloengz liux. Vihmaz gyoengqvunz canghdoz roxyiuj, gyoengqvunz gai byaek mbouj itdingh roxyiuj ne? Lanz Fuzlungz daeuj ra gou——Bouxvunz ndaejhoengq daih’it Yejmaj Cin, caeuq gou naeuz gij vah Dungj Cigoz dauqdaej miz gijmaz hamzeiq ne. Gou doiq Giuh Yizswngh haengj gwn noh roxnaeuz haengj gwn byaek mbouj gvansim saek di, boux vunzgeq lumzgeiq ndeu, de daej hix cingqciengz, haengj gwn gijmaz roxnaeuz mbouj haengj gwn gijmaz cungj dwg cingqciengz raixcaix. Vahsug gangj, bouxvunz lix ndaej roekcib bi le, gvaq bi suenq bi; bouxvunz lix ndaej caetcib bi le, gvaq ngoenz suenq ngoenz; ciuq yienghneix doisuenq roengzbae, bouxvunz lix ndaej betcib bi le, gvaq diemj suenq diemj; bouxvunz lix ndaej goujcib bi le, gvaq miux suenq miux. Giuh Yizswngh dwg bouxvunz gvaq miux suenq miux ndeu, de miz gijmaz yienghsiengq okdaeuj cungj dwg cingqciengz. Gou siengj hwnj doengh vang ndaem gwnz hengzdiuz ranz gou, veh ndaej vang ndaem ndeu hwnjbae, dwg geijlai mbouj yungzheih ha.

Gou han naeuz, daihgaiq dwg Dungj Cigoz roxnyinh bonjfaenh raen gvaq seiqmienh lai ba.

Canghdoz haengjdingh beij canghrihbyaek miz siengjfap lai. Gou seizhaenx dwg baenzneix naemj, hoeng mbouj dwg baenzneix gangj ok bak. Youq Yejmaj Cin, canghdoz gaj mou seiz, ndaw bak cungj dwg nam naeuz: Mbwn gaj mwngz deih gaj mwngz mbouj dwg gou gaj mwngz. Couhcinj dwg canghdoz dai le, gij fuengfap soengq hwnj mbwn hix caeuq bouxwnq mbouj doxdoengz: Fag caxdoz gaj mou de, aeu caeuq huqcaeq caez baij cuengq. Saenzsien danghnaeuz yaek gyaepcaz, couh gyaepcaz fag caxdoz de ndei lo, boux ninz youq ndaw guencaiz haenx, wnggai bae gizlawz couh bae gizlawz ba. Naemjnaemj yawj, boux canghdoz ndeu, ndaw bak de ngoenznaengz cungj miz “sawging”, dai le gwnz daiz youh miz caxdoz, gij siengjfap de mbouj aeu fukcab lai dihe ha? Saeklaeuq saenzsien caen aeu gyaepcaz……

Lanz Fuzlungz naeuz gou rox lo, Dungj Cigoz daihgaiq roxnyinh bonjfaenh sang gvaq vunz gyaeuj ndeu ba.

Gou naeuz mwngz hix ndaej yienghneix lijgaij ba.

Lanz Fuzlungz naeuz, ngoenzngoenz gaj doenghduz, dai le roengz daengz deihlauz cibbet caengz, lij ndaej sang gvaq vunz aen gyaeuj ndeu? Gou mbouj gangjvah.

Lanz Fuzlungz dwg gyaepcaz Dungj Cigoz baengh gijmaz beij bouxwnq sang aen gyaeuj ndeu. Gou soengq de byaij okdou le, dauqfanj dwg naemj gij vah Dungj Cigoz: Mbouj ndaej aeu gienh saeh ndeu, daeuj cwngmingz gienh saeh wnq.

Neix youh dauqma daengz gij saeh baezgonq Lanz Fuzlungz ciuqgoq Giuh Yizswngh seiz, Giuh Yizswngh vihmaz daej hwnjdaeuj ne. Giuh Yizswngh daej hwnjdaeuj seiz, aiq caeuq gijgwn mbouj miz saek di gvanhaeh. Lanz Fuzlungz youq gienh saeh neix nyinhcaen baez ndeu lo, loengh ndaej bonjfaenh deng sieng youqgaenj.

Baihgonq gangj gvaq, youq Yejmaj Cin, gou dwg bouxvunz daengx ngoenz mbouj guh saek yiengh saeh ndeu. Gou baengh daxboh louz hawj gou bit cienz ndeu, mbouj you gwn mbouj you daenj, gij saeh ceiq haengj guh gou couhdwg doegsaw. Ngoenznaengz, gou dawz bonj saw ndeu, youq gwnz dingjlaeuz dak ndit, gij saw haenx yungzheih yawj ndaej rox, mizmbangj dwg sawcuenh cieng dem cieng、mizmbangj dwg sawcuenh goengfou—— Ciuhvunz neix gou couh maqmuengh baengh gyoengqde daeuj sai ndwenngoenz lo, aenvih haengj yawj saw, gou yawj hwnjdaeuj beij gij vunz Yejmaj Cin loq mizdi vwnzva he bw.

Gou vihmaz ndaejhoengq dawz gij nienzlingz Giuh Yizswngh veh youq gwnz hengzdiuz ranz gou, mbouj dwg veh youq gwnz saeu fwngz iet couh lumh ndaej daengz haenx, baezneix mwngz roxyiuj luba——Gou dawz Giuh Yizswngh youh lix ndaej bi ndeu, dangguh youh yawj le cieng sawcuenh ndeu.

蓝伏龙洗锅、生火，每一个环节都弄出很大的动静。董志国的老婆和孩子瞪大眼睛，这个卖菜的蓝伏龙。不就是煮两斤肉吗，用的力气像在煮一头猪。

火烧起来了。不一会儿锅里的肉开始冒香味，邱一声没有马上醒过来。蓝伏龙抓了一把八角要往锅里扔，被董志国拦住，董志国说你想苦死他老人家吗？他掰开蓝伏龙的手,捡了一朵八角。就放一朵。他说。

蓝伏龙往火灶里加柴火，火苗舔到锅盖上面。锅里很快沸腾起来。水蒸气噗突噗突地往外冒，可惜屋里没有风，香气传到邱一声鼻子边的时候已经很淡。蓝伏龙找来一把扇子，朝邱一声的方向扇风，这个方法果然奏效，邱一声这个失忆的老人，这个记忆永远都停在70岁的老人，被一阵浓浓的八角味肉香熏醒了。他咂巴嘴唇，说的第一句话就是：拿碗来。

董志国的老婆和孩子摇摇头，哼了一声，就出去了。他们懒得待在这里，他们想尽快去跟野马镇的人报告，蓝伏龙说的是假话，邱一声如果不喜欢吃肉，能活到今天？

看着邱一声大口大口地吃肉，蓝伏龙的情绪有点失控，他朝邱一声喊：上次你怎么哭了，好像看见我在碗里放了毒药一样。他的吼声没有吓住邱一声，邱一声低头吃肉，根本不理会他。

董志国厚道，他没有看蓝伏龙的笑话,而是替他开脱，董志国说火麻跟肉一样贵。

火麻在外面卖得很贵，在野马镇卖得不贵，董志国拿北京火麻的价钱替蓝伏龙开脱，蓝伏龙当然不满意。不是钱的问题，而是关系到自己抠门不抠门的问题。

董志国说，你不要太认真，上次是上次，这次是这次，不能说明什么问题。在野马镇，如果你拿一件事情，来证明其他的事情，到头来苦的是自己。这个道理，我们杀猪的人懂，你们卖菜的未必懂。

董志国的话让蓝伏龙摸不着头脑。为什么杀猪的人懂，卖菜的就不一定懂呢？蓝伏龙来找我——野马镇的第一号闲人，跟我说董志国的话到底有什么样的含义。我对邱一声喜欢吃肉还是喜欢吃青菜一点都不关心，一个失去记忆的老人，他哭也很正常，喜欢吃什么不喜欢吃什么也很正常。俗话说人活六十，过一年算一年；人活七十，过一天算一天。照此推算，人活八十，过一个小时就算一个小时；人活九十，过一秒算一秒。邱一声是活过一秒算一秒的人了，他有什么举动都很正常。我想起我家横梁上密密麻麻的黑杠，画一道上去，多么不容易啊。

我说，大概董志国觉得他见的世面多呗。

屠夫肯定比卖青菜的有想法。我当时这么想，但没有这么说。在野马镇，屠夫屠宰牲口的时候，嘴里都得念叨：天杀你地杀你不是我杀你。就是死后，超度的方法也跟其他人不一样：那把屠宰的刀，得跟供品放在一起。神仙要是追究，就追究刀好了，辨在棺材里的人。该去哪里就去哪里。想一想，一个屠夫，他每天嘴里有“经文”，死后案前有屠刀，想的能不复杂？万一神仙真要追究……

蓝伏龙说我明白了，董志国大概觉得自己高人一等。我说你可以这么理解。

蓝伏龙说天天杀生，死后下十八层地狱，还高人一等？我没有说话。

蓝伏龙追究的是董志国凭什么比别人高人一等。我打发他走之后，想的却是董志国的话：不能拿一件事情，来证明其他的事情。

这又回到了邱一声在上次蓝伏龙照顾他时为什么会哭的事情上面。他之所以哭，可能跟吃的一点关系都没有。蓝伏龙在这件事上认真了一回，弄得自己很受伤。

前面说过，在野马镇，我是一个整天无所事事的人。我仗着父亲留给我的一大笔钱，衣食无忧，喜欢做的就是读书。平日里，我捧着一本书，在楼顶上晒太阳，书也不是什么深奥的书，一些章回小说、一些武侠小说——这辈子我就指望它们打发时间，因为喜欢看书，我显得比野马镇的其他人稍稍有一点文化。

我为什么有闲情逸致把邱一声的年龄画在我家的横梁上面，而不是顺手画在触手可及的柱子上面，这下你明白了吧——我把邱一声又活一岁，当成又看了一章章回小说。 （2）