Gangj daengz gijgwn Guengjsae, faenj ca mbouj geijlai ciemq bae baenz mbiengj mbwn. Gih raeuz diegdieg cungj miz gij faenj daegsaek de, lumjbaenz faenjhaeux Gveilinz、faenjlwgsae Liuj- couh、faenjsoemj Binhyangz、faenjvemou Ginhcouh daengj. Laeng Nanzningz, cix dwg faenjlauxyoux ceiq mizmingz. Bi 2008, faenjlauxyoux Nanzningz ndaej senj haeuj buek daihngeih swcigih gaep feihyiz mingzloeg.

Gangjgangj Guhfap

Gij liuh faenjlauxyoux cuengq ndaej lai, raemxdang cix dwg aeu ndokdoengz menhmenh aeuq baenz. Dwk feizhaenq, aen rek ndat le couh dwk di youz haeujbae, youz ndat doq dwk noh soiq、suenq soiq、daeuhseih、lwgmanh soiq daengj liuh roengz rek bae cauj gonq, cuengq di laeuj itheij caujok heiqrang. Doeklaeng gya rangzsoemj、meiq caeuq ciengqyouz laebdaeb cauj, yienghneix couh ndaej dwk raemxdang、goeb fa、dwk feizhaenq. Raemx goenjhuzhuz le couh dwk faenj, rek faenj dauq goenj couh ndaej vanq coeng、faenj hozceu caeuq faenj sagieng daengj liuh. Gucanj baez ndau couh ndaej daek hwnj lo. Ndigah vunz naeuz, cawj faenj- lauxyoux feiz aeu haenq fwngz aeu vaiq, mbouj ndaej ndau deih, mboujmiz noh couh nyangq、faenj cix heih yungz. Gij faenjlauxyoux ngamq cawj ndei de, ndatvauqvauq, soemjset sangjbak、manh cix habngamj, raemxdang hom youh noengz. Soemj、manh、 loq ndaengq、rang dwg gij daegdiemj faenjlauxyoux. Rangzsoemj、daeuhseih、suenq daengj liuh doxgyaux youq giz ndeu, boiq ndaej ngamqngamq ndei, ndawde rangzsoemj caeuq daeuhseih ceiq mbouj ndaej noix lo. Heiq soemj caeuq heiq manh doxgap ndaej gig ngamj. Seizhah gwn le haibak, seizdoeng rumzbaek cioo, gwn vanj faenjlauxyoux ndatfwdfwd ndeu ceiq ndei mbouj gvaq lo.

Gojgaeq Lizsij

Vangh Cwnghgiz youq bonj saw《Feihdauh Gwnzbiengz》ndawde raiz naeuz:“Vunz Fuzgen、vunz Guengjsae maij gwn rangzsoemj, gou caeuq Gyaj Bingzvah youq Nanzningz mbouj maij gwn haeux diegdakdaih, cungj maij okrog bae doeng gwn sae gwn. Bingzvah baez haeuj- dou, couh hemqnaeuz：‘Mienhlauxyoux!’Mienhlauxyoux couh- dwg rangzsoemj、 noh ronqsei caeuq dang romx mienh, mbouj rox vihmaz heuh‘lauxyoux’.” Gij goj faenjlauxyoux caemh lumj faenj de nei gig miz feihdauh, riuz youq rangh dieg vunz gwn faenjlauxyoux.

Cienznaeuz, 20 sigij codaeuz, bang baengzyoux ndeu ngoenzngoenz bae bouqgaicaz laeng dieg cungsim Nanz- ningz doxcomz gwn caz. Ngoenz ndeu, ndawde miz bouxbaengzyoux baenz binghganjmau, ninz gwnzmbonq mbouj ndaej hwnq. Bouxlauxbanj rox le simyou raixcaix, couh aeu mienh caeuq suenq、daeuhseih、lwgmanh、rangzsoemj、noh soiq、faenj hozceu daengj doxcaeuq cawj, soengq hawj bouxlauxyoux baenzbingh neix gwn. Vanj mienh ndatfwd cix manh cix soemj, rangfwdfwd, bouxde gwn dwk cenghyubyub, hanh conh liux, doek- laeng ganjmau caemh ndei lo. Boux- baengzyoux neix vihle gyo’mbaiq lauxbanj, couh raiz le gaiq baizbenj “Lauxyoux Ciengz Daeuj”soengq hawj de. Gaxlaeng, mienhlauxyoux couh yienghneix okmingz lo. Vunz baihnamz gwn faenj hamq lai, ndigah couh miz le“faenjlauxyoux”.

“Lauxyoux” Nanzningz

Gij goj neix mbouj rox caen hixnaeuz gyaj, hoeng youq Nanzningz, gaiqgaiq cungj ndaej “lauxyoux”, lumj byalauxyoux、saelauxyoux、lauxyoux cauj vahgyaz、lauxyoux cauj faenj daengj. Lauxyoux, lauxyoux, couhdwg daenj vaq caemh doengz、doxbang doxbaengh. Aen bouqdiemq iqet laeng luengqhongh couh aiq yo miz vanj faenjlauxyoux feihgwn ndeu. Song sam boux baengzyoux doxiu gwnfaenj, cejgoj lwnh saehranz, gig cwxcaih. Gyawj geij bi neix, cwngfuj yawjnaek faenjlauxyoux, gaenxmaenx dajcauh aen binjbaiz faenj de. Faenj- lauxyoux caemh menhmenh youq guek raeuz mizmingz lo, gak dieg vunzlai lij youq gwnzmuengx cawx baenz bau faenjlauxyoux ma cawj gwn.

Doiq vunz Nanzningz ma gangj, vanj faenj iqetet, yo miz gij heiq- hoenzfeiz gwnzbiengz naekna de, lij ce miz gij vwnzva gijgwn Nanzningz, dwg cungj sim niemh ranzmbanj. Ndigah, gak boux baengzyoux, ngoenzneix sou gwn faenjlauxyoux mboujcaengz?

(Gij doz daj gwnzmuengx aeu)