Yoz Gensiuh dwg boux cangh- fwen ak ndeu, youq Sangswh Yen mbouj miz bouxlawz mbouj roxnaj de.

Yoz Gensiuh dwg ciuh daih seiq boux cienzciep vwnzva canghfwen Bouxcuengh Sangswh Yen. Dwen daengz de, bouxboux cungj haenh.

Vihneix, gou gig siengj bae damq boux canghfwen bonjdieg miz- mingz neix, dingq de eu fwen baez ndeu, gangjgangj goj.

Gou caeux couh dingqgangj canghfwen Yoz Gensiuh daj iq couh maij eu fwen, bingzseiz haibak couh baenz fwen, lij bae camgya Doxdax Gvangjsih Canghfwen Bouxcuengh gvaq, ndaej “Vuengzcanghfwen” dem.

Haujlai saeh cungj dwg baenz- neix, dajsuenq ganj mbouj hwnj bienqvaq, moix baez siengj hwnjdin okbae, cungj miz saeh saepsoiq rag dawz, geijlai baez mbouj ndaej saedyienh aen siengjmuengh neix.

Ngoenzhaenx dwg ngoenz- singhgiz, banhaet, baengzyoux dwk denva hawj gou, naeuz miz gicej daj diegwnq daeuj caijfangj canghfwen Yoz Gensiuh, de couh iu gou caez bae. Gou baez dingq couh angqvauvau saet hwnjdaeuj. Cagaenj seizbienh gaem geu buhboemz he daenj hwnj ndang, yet hwnj aen ci baengzyoux, cungfofo coh ranz canghfwen Yoz Gensiuh bae lo.

Seizdoeng, ngoenzneix youh doek fwnraengraemz. Gij fwn iq lumj lwgnyez maenz nei, seiz mbouj seiz riengz rumz mbin ndonj haeuj ndaw rungj daeuj, hawj gou saenz- diengdieng. Hoeng baez dingq daengz ranz Yoz Gensiuh lauxsae mbouj gyae geijlai, sim gou youh ndatfwdfwd hwnjdaeuj lo.

“Docih gyoengq lingjdauj,

Eu fwen bauj sou ndei,

Hoh sou cungj swnhleih,

Bibi ndaej hwnj hung.

Bouxgeq ndaej gyaeu nanz,

Lwglan miz fukheiq,

Coengmingz youh lingzleih,

Bae dayoz doegsaw.”

Ci hai daengz bakgvaengh, lij caengz raen canghfwen, couh dingq daengz gij sing fwen goksasa——Laxlawz dwg Yoz Gensiuh lauxsae eu fwen coux hek ne.

Siengj mbouj daengz, gou baez daih’it daeuj baenz vaiq couh ndaej dingq de eu fwen lo. Caj dou byaij haeuj ndaw gvaengh bae, gou doeksaet lo, ranz de cang ndaej gyaqciq dangqmaz, hawj vunz yawj ndaej ronghsag lwenqda!

Yoz Gensiuh lauxsae yawj daeuj miz roekcib lai bi, cingsaenz gvaekgvaek. De ndwn youq bakdou ranzmbwk riunyumnyum vih dou eu fwen. Gou dauqdaej youq ngoenz- neix ndaej caeuq “Vuengzcanghfwen” doxraen lo!

Dou haeuj ndawranz, Yoz Gen- siuh lauxsae couh eu gij fwen hawj de ndaej “Vuengzcanghfwen” hawj dou dingq.

De naeuz, gaej yawjsiuj geij hot fwen dinjdetdet neix, ndawde hamz miz haujlai eiqsei laeg. Fwen de mboujdan gangj daengz gij saeh iq lwgminz haemzhoj caeuq vuenyungz, vanzlij danq gaijgwz hailangh daeuj, Bouxcuengh raeuz saedceij bienqvaq hungmbwk, caemhcaiq haenh guek raeuz miz Cunghgoz Gungcanjdangj lingjdauj, yied daeuj yied fouqgiengz, hawj vunz baez dingq, sikhaek mingz- beg guek raeuz gij cwngcwz ndei. Gvaiq mbouj ndaej de dwg “Vuengz- canghfwen” ha!

Eu sat le, Yoz lauxsae muengh aen mauh “Vuengzcanghfwen” caeuq mbaw cwngsuh, riunyumnyum gig miznaj naeuz:“Yienznaeuz gou eu fwen baenz buenq seiq, youq ndaw yienh ndaw si gaenq aeu ndaej haujlai ciengj, hoeng, hix siengj mbouj daengz laux goenggeq baenzneix le, lij youq aen doxdax daengx swcigih ndawde ceng ndaej aen mingzdaeuz baenz- hung……”

“Vunz laux lumj faexnduk, mboengqhaenx ndangdaej gou mbouj ndei, bae doxdax geij ngoenz gaxgonq lij guh soujsuz dem……” De youh naeuz.

Dwg ha, youq rangh dieg neix, de eu fwen ceiq maenh, ndaej “Vuengz- canghfwen” cingqcaen mbouj gyaj. De daj iq couh gyaez eu fwen, majhung le, de engq simmaez eu fwen. De yawj daengz maz cungj sikhaek haibak guh ndaej fwen. Danghnaeuz mwngz hawj de aen cawjdaez he, de swnhbak couh eu ndaej ok, vanzlij dawzyinx ndeidingq, hamzeiq laegdaeuq.

Byaij haeuj ndaw ranzsaw cauh fwen de, baihnaj couhdwg aen gaqsaw cang rim saw fwen de. Ndawde miz haujlai fwen gaenq fatbiuj, roxnaeuz oksaw, lij miz haujlai fwen moq ngamq cauh yungh bit sij. Youq henz gaqsaw lij miz gaiq hwzbanj iq he laeb dwk, de ciengz laemzseiz youq gwnzde sij fwen. Ndaw ranzsaw neix, byaij daengz gizlawz cungj miz gij ngaeuz fwen.

Guh fwen、 eu fwen hawj de yinxdaeuz dangqmaz, hix hawj de ndaej daengz haujlai mingzdaeuz. Ndawde, bi 2018, youq doxdax ndaej “Vuengzcanghfwen” aen mingzdaeuz, doiq de daeuj gangj ceiq daegbied, neix mboujdanh dwg haengjdingh gij naengzlig caeuq suijbingz sikhaek guh fwen de, vanzlij dwg gienh saeh mbouj bingzciengz ndeu, hawj de ndaej gikdoengh dangqmaz.

“Cadi dangqnaj loekgvaq bw!” Baez dwen daengz aen doxdax neix, Yoz Gensiuh lauxsae sikhaek gig miz yinxdaeuz, daj gyaeuj daengz byai lwnh hawj dou dingq——

“Bi 2018 ndwen 10 ngoenz 23, aen doxdax neix youq Liujcouh Si Sanhgyangh Dungcuz Swciyen guh, dwg vih angqhoh swcigih laebbaenz 60 hopbi gawjbanh. Gou ngoenz 19 ndaej iu bae, mwhde ndangdaej gou mbouj ndei, lij youq yihyen Namz- ningz yw bingh.

Ciep ndaej dunghcih le, gou couh ninz mbouj ndaek, naengh mbouj onj lo. Gou ciuh vunz neix couh gyaez eu fwen, itdingh aeu bae camgya aen doxdax! Hoeng, vunzranz bouxboux cungj ndaq gou, vih eu fwen mbouj aeu mingh, mbouj rox dailix……

Gou caegcaeg bae cam canghyw, gou seizlawz cij ndaej ok yen ne? Ndaej ‘cingjgyaj’ ngoenz saek song ngoenz lwi……”

Doeklaeng, de rox ndangdaej ca mbouj geijlai ndei seiz, caen heuh canghyw hai geij ngoenz yw le, couh caeuq vunzranz doxdingj doxceng, naeuz dai hix yaek dai youq aen daiz fwen! Vunzranz mbouj miz banhfap, cij ndei caih de bae camgya ciengz doxdax eu fwen neix lo.

Doxdax seiz, de swnhleih ndaej haeuj doxdax ceiq laeng. De saenqsim rim aek hwnj daiz eu fwen, eu le couh youq lajdaiz angqvauvau caj. Hoeng cungj ndaejnyi gij coh caeuq cingzcik bouxwnq ndwi, caj haujlai nanz cungj mbouj ndaejnyi faenh swhgeij, miz di doeknaiq lo. De gag siengj: Baezneix ndang nyieg, cinglig mbouj gaeuq, aiq mbouj wnggai daeuj camgya ciengz doxdax ba! Aenvih eu fwen le de roxnyinh caen miz di baeg.

Mwh de naiqnuknuk riengz gyoengqvunz bae gwn ngaiz seiz, sawqmwh ndaejnyi bouxcujciz naeuz:“Gij cingzcik Canghfwen Yoz Gensiuh Dui Fangzcwngzgangj Si haxbaenh gyoepsuenq miz loek, cingj mwngz caiq daengz daiz cujsiz daeuj gip gaeu, gip daengz maz couh ei gij neiyungz eu fwen, gak boux bingzveij dang- ciengz bingz faen hawj mwngz.”

Dingq daengz neix, Yoz Gensiuh lauxsae doeksaet youh vuenheij, engq simgaenj lo. Neix dwg aen gihvei moq, mbouj rox bonjfaenh gaem ndaej mbouj ndaej.

De gip aen gaeu hwnjdaeuj hawj bouxcujciz, bouxcujciz couh sikhaek naeuz:“Canghfwen Yoz Gensiuh gip ndaej aen cawjdaez dwg ‘Dauqngeix Ngoenz Gaxgonq’, cingj mwngz youq ndaw faen cung ndeu aeu eu fwen gij neiyungz neix.”

Yoz Gensiuh lauxsae baez dingq couh sim’angq ndaej naj ronghsag lo, haibak couh eu:

“Dauqngeix ngoenz gaxgonq,

Haeux donq mbouj miz gwn,

Gaijgwz lumj rumzcin,

Hwnzngoenz cienz haeuj daeh.”

Siengj mbouj daengz, sing fwen ngamq roengz, gak boux bingzveij caeuq gyoengq bouxyawj cungj bek- fwngz bubbub. Lij miz boux bingzveij he haenh naeuz:“O, deng lo, fwen neix dangciengz eu ok bak, doedok cawj- daez, sengdoengh baenzlai, eiqsei youh laeg, caen dwg fwen ndei bw!”

Couh yienghneix, aen mingz- daeuz “Vuengzcanghfwen” couhdwg duh de lo.

Gou doq dingq boux “Vuengz- canghfwen” neix lwnh, doq roxnyinh dangqnaj boux ndang iq neix yied daeuj yied hungsang lo.