Bouxfamhlaux iet fwngz goemq bak de, sing daemq naeuz:

“Gaej heuh, gou rox mwngz mbouj dwg, hoeng aen coih mwngz gaenq doekdingh lo.”

“Gou dingj mbouj ndaej gyoengqde yunghhingz——”

“Gou rox, cijaeu mwngz baez nyinh bonjfaenh dwg caeggeq, mbouj deng cungq nyingz dai bae suenq mwngz seizheiq ndei lo.”

“Ai!”

“Mbouj aeu simcieg, gij saedceij danqheiq gaenq gvaqbae lo, mwngz haeujdaeuj hix miz haj roek ndwen luba?”

“Mbouj rox.”

“Buenq bi gonq ceiq nanz cengq.”

“Gou cengq gvaqbae lo.”

“Ndei, daj mwngz gangj vah caeuq guh saeh, gou couh rox mwngz dwg deng ien’uengj hane.”

“Goenggeq.” Lungz Byauh gig geizheih,“mwngz deng an maz coih couh deng gyaeng haeujdaeuj ne?”

“Caeuq mwngz doxdoengz.”

“Yo, mwngz—— dwg caeggeq?”

“W.”

“Yawj gij yiengh mwngz, itdingh hix deng ien’uengj lo.”

“Mbouj, gou mbouj deng ien- uengj.”

Lungz Byauh doeksaetyat, daj gwnz dongfiengz naengh hwnj- daeuj.

“Baenzneix, mwngz caen dwg vunz lajfwngz ‘Vangzvaizgvaiq’?”

“Goj ndaej baenzneix gangj.”

“Mwngz raen gvaq ‘Vangz- vaizgvaiq’?”

“Raen gvaq.”

“Dingqgangj de rox song fwngz doengzseiz nyingz cungq, youq gyanghwnz byaij roen mbouj aeu bogfeiz, lij ndaej sam hwnz sam ngoenz mbouj gwn doxgaiq dem ne……”

“Deng, song yiengh baihgonq cungj mbouj gangjboq, hoeng sam hwnz sam ngoenz mbouj gwn doxgaiq dwg gyaj.” Bouxfamhlaux gig nyinh- caen dap.

“Baenzlawz cij dwg caen?”

“De gwn saejdaeuz.”

“Ha, hoeng gwnz bya bae gyawz miz saejdaeuz ne? Gwn bingj、gwn dangz?”

(caengz sat)