Hawj Guekgya Maenh’ak

Swnh Rumz Bauqrengh Haenqguh

Seizcin daeuj daengz va angq hai,

Duzmbaj duzrwi eiq ndaej lai,

Ruzhoengz gik raeuz daih dem daih,

Vih guek fukhwng hai dungxcaiz.

Miz gungcanjdangj dazyinx ndei,

Lwgminz riengz dangj niu lumj ceiz,

Guek raeuz fouqmiz bouxboux angq,

Ndwenngoenz gvaq ndaej van lumj

dangz.

Doengzcaez haenqguh guek fouq daeuj,

Vunzvunz miz ngaenz youh miz haeux,

Lajmbanj gizgiz bienq ndaej gyaeu,

Swnh rumz bauqrengh ndei lai

raeuh.

Angqyangz ciepcoux bi duzguk,

Lwgminz bouxboux cungj miz fuk,

Vih guek vih minz hai dungxcaiz,

Cienzmienh fukhwng engq fouqgiengz.

Nyeuxgyaeuj dauqlaeng,

Guek raeuz guh daengz gij saeh,

Ndawsim caen eiq,

Guekcoj ndaej bienq baenz ndei.

Dangj raeuz dazyinx,

Gij rengz ciuyinx hung lai,

Roen daegsaek hai,

Mbouj caiq gwn cai daenj yak.

Dangj gyaez bouxhoj,

Coengh guh ranz moq haujlai,

Mehmbwk bouxsai,

Ranzranz baij daiz angqhoh.

Dangj gyaez bouxhoj,

Vunzak gyoengq coh haeuj ranz,

Miz maz hojnanz,

Cungj baengh aendangj gaijgez.

Daengx guek duetgungz,

Lwgminz vuenyungz sim’angq,

Caez haeuj siujgangh,

Cungj danq aendangj ndeiraeuh.

Yawjyawj mbanjranz,

Aen dangj raeuz caen hungmbwk,

Vunz naeuzswgswg,

Heuh mwngz yawj dwk da va.

Mbanjmbanj bienq ndaej gyaeu,

Gyoengqvunz naeuz,

Baengh dangj raeuz baenz yiengh,

Daengz laux miz vunz ciengx,

Angq couh ciengq,

Vuenyungz yiengj ndaej lai.

Baengh gohgi hwngfat,

Guek raeuz ak,

Cungj dwg yat ndaej maenh,

Guh ndei saeh bonjfaenh,

Yienghyiengh swnh,

Guek raeuz swnj dwk hwng.

Diuz it rangh it loh,

Guek raeuz guh ndaej ndei,

Gaemndaet seizgei ndei,

Itdingh meiz(miz) maqmuengh.

Mbouj dwg loq fangzhwnz,

Naengh “ruz” mbin hwnj mbwn,

Gangj daeuj hix dwg caen,

Cauhfuk vunz lajbiengz.

Mbouj dwg loq fangzhwnz,

Hwnj mbwn cauh Denhgungh,

Guh Bwzdaeuj Hidung,

Lajbiengz cungj danqhaenh.

Mbouj you daenj caeuq gwn,

Ciengxlwenx gaen dangj byaij,

Daengx guek lwgminz maij,

Ndaej fanh daih vuenyungz.

Diuz loh guek raeuz onj,

Raeuz mbouj ndoj lingh giz,

Gou daeuj lwnh mwngz nyi,

Guek ak miz maqmuengh.

Angqcoux bi duzguk,

Youh miz fuk daeuj daengz,

Seizgei youq henz ndang,

Raeuz wngdang haenqguh.

Guek fouq ndaej saedyienh,

Cien fanh lwgminz rengq,

Caez swnh rumz bauqrengh,

Guek ak bengj haenqguh.

Cungj mbouj dwg gangj yaeuh,

Vah dangj raeuz aeu dingq,

Byaij roen guek raeuz cingq,

Guek ak dingh saedyienh!

Gyoengqvunz diuz sim ndeu,

Ciu dangj vunqdin byaij,

Baihnaj feiz lumj haij,

Hix cauhfuk daihlaeng!