国家主席习近平发表二〇二二年新年贺词

让我们一起向未来！祝福国泰民安！

Sinhvazse Baekging bi 2021 ndwen 12 ngoenz 31 dienh Bimoq gaxgonq, Guekgya cujsiz Siz Gin- bingz doenggvaq Cunghyangh Gvangj- bo Densi Cungjdaiz caeuq vangj- doxlienz, gangj vah cukhoh bimoq bi 2022. Baihlaj dwg daengx bien faenz- cieng：

Caezgya ndei, bi 2022 yaek daeujdaengz. Gou youq Baekging hohfuk caezgya!

Dauqyawj bineix, yiyi mbouj bingzciengz. Raeuz caenndang ging- gvaq gij saeh hung gwnz lizsij dangj caeuq guekgya miz yiyi hung. “Song aen bak bi” buekguh moegbiu dox- gap, raeuz hainduj le diuzroen moq cienzmienh hwnqguh sevei cujyi yendaiva, cingq ngiengx gyaeuj yamq hung byaij youq gwnz diuzroen saedyienh Cunghvaz Minzcuz fukhwng hungmbwk.

Daj gyaeujbi daengz riengbi, gyang reih gyang naz、giyez、segih、hagdangz、yihyen、ginhyingz、gohyenz yensoj……Caezgya nyaengq liux bi ndeu, miz guh’ok, hix miz soundaej. Seizgan riengjret, raeuz yawjraen、roxnyinh raen Cungguek, dwg aen Cungguek giendingh mbouj bienq、hoenghfwdfwd ndeu. Gizneix miz beksingq ndeigyaez, miz hwngfat ngoenz ndei gvaq ngoenz, miz saehnieb laebdaeb cienzswnj.

Ndwen 7 ngoenz 1, raeuz angq- hoh Cungguek Gungcanjdangj laeb- baenz 100 hopbi. Ndwn youq gwnz laeuz Denh’anhmwnz lwnh doengh- baez naeuz coglaeng, vunz Cungguek Gungcanjdangj daiqlingx baenz ik fanh beksingq ginggvaq cien fanh hojnanz dauqfanj haemzhoj mbouj lau、ceiqheiq mbouj bienq, guhbaenz le gij fungsaek hungmbwk aen dangj hung bak bi. Mbouj lumz goeknduj, cij guh ndaej baenz. Raeuz caenhmiz haenq- rengz buekguh、caen guh mbouj soeng, cij ndaej doiq ndaej hwnj lizsij、doiq ndaej hwnj seizdaih、doiq ndaej hwnj beksingq.

Cibgouj Gaiq Roekcung Cienz- hoih Dangj doenggvaq le daihsam aen lizsij gezyi dangj. Bak bi cingzcik hawj vunz saenqhwnj, bak bi gingniemh ndaej sonyinx vunz. Gou gangj daengz gvaq “gij doiqvah conghyiuz” bihaenx Mauz cujsiz caeuq Vangz Yenzbeiz sienseng， raeuz cijmiz gamj bae guh gwzming cij hingz ndaej lizsij cawjdoengh. Cunghvaz Minzcuz fuk- hwng hungmbwk haengjdingh mbouj dwg soengsadsad、roq gyong roq laz couh ndaej baenz, hix haengjdingh mbouj dwg an’an onjonj、yaepyet couh ndaej baenz. Raeuz aeu ciengzseiz naemj gyae、youq seiz onj naemj seiz nanh, baujmaenh canloz dinghlig caeuq naihsim,“guh daengz gij hung youh naemj daengz gij iq”.

Gij hung guekgya, hix miz gij naek guekgya. Gij saeh fukcab, gangj liux dwg gij saeh cien ranz fanh hoh. Gou diuyenz le mbangj dieg, yawj dingq haujlai cingzgvang gvaq, miz haujlai daezsingj caeuq soundaej. Baez bae ndawranz vunzlai, ciengzseiz camcam, lijmiz maz hojnanz, gij vah vunzlai gou cungj geiq ndawsim.

Gij you beksingq, gou itdingh bae geiq; gij muengh beksingq, gou itdingh bae guh. Gou hix dwg daj lajmbanj okdaeuj, doiq hojndoq roxnyinh laegdaeuq. Ginggvaq daih dem daih laebdaeb roengzrengz, gyoengqvunz gaxgonq hojndoq, seizneix hix ndaej gwn imq、daenj raeuj, ndaej hwnj hagdangz、miz ranz youq、miz yihbauj. Cienzmienh siujgangh、baetduet hoj- ndoq dwg dangj raeuz gyaudaih hawj beksingq, hix dwg vih seiqgyaiq okrengz. Hawj caezgya ndaej gvaq ndwenngoenz engq ndei, raeuz mbouj ndaej yawjraen gij cingzcik dangqnaj ndwi, lij aeu byaij diuzroen raezrangh dem.

Vangzhoz bingzan dwg gij maq- muengh cien bi lwglan Cunghvaz. Geij bi neix daeuj, gou byaij doh 9 swngj gih donhgwnz donhgyang donhlaj Vangzhoz. Mboujlwnh dwg “dahmeh” Vangzhoz Cangzgyangh, lijdwg Huzcinghhaij raemx heuswd- swd、Yazlujcangbugyangh ngutngeuj hoenghhwd; mboujlwnh dwg aen gunghcwngz sigij raemx namz diuh baek, lijdwg “deihdoz saekheu” Saihanzba Linzcangz; mboujlwnh dwg duzciengh Yinznanz bae baihbaek dauq baihnamz, lijdwg canglingzyangz sengsanq senj dieg……Doenghgij neix cungj naeuz, vunz doiq ndaej hwnj byaheu, byaheu itdingh doiq ndaej hwnj vunz.

Bineix, lijmiz haujlai sing’yaem Cungguek、yaepyet Cungguek、gojgaeq Cungguek nanzlumz. Gij vahmieng hauxseng “cingj dangj cuengqsim, guek giengz miz gou”, gij lwnhgangj cingznaek “gij gyaez seuqcengh、dan vih Cungguek”; “Cuzyungz” damq hojsingh、 “Hihhoz” gyaep daeng- ngoenz、“Denhhoz” youz gwnzmbwn; boux yindungyenz ak haenqrengz ceng daeuz; daengx guek gwnz laj yawh- fuengz guenjhanh binghraq maenh- gyad rengzrwd; vunzlai deng cai doxfuz doxbang dauqcungz hwnqguh gyaranz; boux cijcanyenz yinzminz gaijfangginh、guenbing vujgingj budui laeb ceiq giengz ginh、hoh ranz hen guek……Haujlai yinghyungz bingz- ciengz haenqrengz buekguh, comz baenz gij raemx hung seizdaih moq Cungguek ngiengx gyaeuj baenaj.

Guekcoj itcig geiq ndaej Yangh- gangj、Aumwnz hoenghvuengh onj- dingh. Cijmiz caezsim caezhoz、caez- caemh roengzrengz, “guek ndeu song loh cidu” cijndaej hengz onj byaij gyae. Saedyienh guekcoj doengjit caezcup dwg gij simmuengh caez- caemh beixnuengx song hamq. Caensim maqmuengh daengxcungq lwg Cunghvaz dazfwngz baenaj, caezcauh Cunghvaz Minzcuz coglaeng gyaeundei.

Mwh gou caeuq bouxlingjdauj guekrog caeuq bouxfucwz gozci cujciz dienhvah doxgangj、sibinz lienzsienq, gyoengqde lai baez haenh Cungguek hoenx binghraq caeuq gij goengrengz vih seiqgyaiq yawhfuengz guenjhanh binghraq. Daengz seizneix, Cungguek gyoebsuenq gunghawj 20 ik cim yizmyauz sinhgvanh hawj 120 lai aen guekgya caeuq gozci cujciz. Seiqgyaiq gak guek doxcaez dohgvaq hojnanz、doxgiet gapguh, cijndaej raiz bien- cieng moq cauhlaeb aen minghyinh caezcaemh vunzloih.

Gvaq ndwen lai dem, Baekging Dungh’auvei、 Dunghcanzauvei couh yaek haimuq lo. Hawj engq lai vunz caeuqfaenh hangh yindung naesiet neix, neix hix dwg gij eiqsei Aulinzbijgwz yindung. Raeuz yaek caenhrengz guh gaiq hoihhoengh auyin ndeu hawj seiqgyaiq. Seiqgyaiq maqmuengh Cungguek, Cungguek guhndei caepcawq lo.

Singcung bimoq yaek yiengj. Sam boux hangzdenhyenz raeuz cingq youq gwnzmbwn “okcai”， beix- nuengx youq guekrog lij cingq roengzrengz gaenxguh，sijlingjgvanj、cunghswh giyez daengj vunz baijyouq guekrog caeuq gyoengq hagseng louzhag lij cingq haenqrengz giensouj, haujlai vunzgyaepmoengh lij cingq haenqrengz buekguh. Caezgya dwg- rengz lo, gou caensim camnai caezgya!

Raeuz doxcaez baenaj! Hohfuk guekgya bingzan beksingq onjdingh!