Ginhsiu dwg aen Yauzcuz swciyen ceiq caeux laebbaenz guek raeuz. Boux yinzlei sevei yozgyah Fei Yaudungh naeuz:“Aen seiqgyaiq Yauzcuz yenzgiu cungsim youq Cungguek, aen Cungguek Yauzcuz yenzgiu cungsim youq Ginhsiu.” Ginhsiu miz Yauzbuenz、Yauzcazsanh、Yauzvalanz、 Yauzsanhswj、 Yauzau haj aen Yauzcuz cihhi, vwnzva Yauzcuz naekna, gij daemj siuq Yauzcuz youq seiqgyaiq mizmingz, Ywyauz engq dwg gaeuqgeq youh saenzgeiz.

Ginhsiu Yauzcuz Swciyen youqlaeng diegbya Guengjsae, rinsa ndoibya daegbied, goengqgoengq sangnengneng, bya raemx doxdep doxbaengh, gingjsaek saedcaih ndei. Byaswngdangz dwg goengq bya daih haj sang laeng Guengjsae, gwnzde baenz ndoi baenz ndoi varenj, daj gwnz dingjbya muenghcoh baihgyae, fwjmok ngeungeu, ndeiyawj dangqmaz. Moix bi ndwen ngux, fanh moux varenj hailangh hoenghhwdhwd, baenz bya baenz doengh, lumj aen haijva gvangqlangh nei. Ndwn youq gwnz sang, caenh raen gogo cungj hai dwk nauhyied oenxoenx, gak saek varenj gyaeundei, saekhoengz、saekhenj、saekhau camca. Valup dwg saekhoengzmaeq, mwh dujva ngamq hai dwg saekmeizgveiq, hai hoengh seiz youh bienqbaenz saekhoengzmaeq oiq cab di saeknonhgyaemx, mwh yaek baih seiz caiq bienqguh saekhenjoiq. Ci roennou baenaj, caenh mwngz yawjraen go coengz hung nyig rumz daengjsoengz seiz, baenzneix mwngz gaenq benz daengz giz ceiq sang Ginhsiu bae lo. Yawj coh seiqhenz, yienghndei Byayauz cungj ndaej yawj caez.

Byava’ngaeux dwg aenvih yienghbya lumj duj va’ngaeux hailangh ndeu couh heuh coh neix. Gij gingjsaek gwnzbya couh lumj gyonjcomz gijndei Vangzsanh、Luzsanh、Canghgyahgai caemhguh giz ndeu, lingzdoengh ndeiyawj, buenq caen buenq loq, couh lumj byaij youq fuk vehsuijmoz ndawde nei. Fwjmok youq goengqgoengq bya seiqhenz fouzfiengj geujheux, lumj raemxlangh doenghfubfub, yawj mbouj raen gyaeuj. Doenghgo gwnbya couh lumj banh le baenz ndang heiqsien, saenzmaed youh seuqcingh. Gizgyae goengqbya yaep raen yaep ndwi, baez utvan ndeu, cungj mbouj rox swhgeij youq gizlawz lo.

Gij dinfwngz daemj siuq Yauzcuz dwg cungj feihyiz vwnzva Ginhsiu. Aenvih aeu gihci guh buh cienzbonj daemq gvaq aeu fwngz daemj, bouxcoz caiq okrog dajgoeng liux, hix mbouj haengj hag cungj dinfwngz neix, ndigah gij dinfwngz daemj siuq Yauzcuz diegde ca didi saetcienz. Seizneix caenh miz mbangjboux mehmbwk seiq hajcib bi doxbae de rox guh lo. Gij daemj siuq Yauzcuz hoj couh hoj youq mbouj miz doz bae ciuq guh, caiqlij gij raizva ndaw naj cungj aeu doiqwngq. Aenvih guh hwnjdaeuj hoj lai, daemj diuz saihwet couh aeu guh baenz ndwen cijndaej. Cau Fung’yangh dwg bouxciepcienz gij dinfwngz daemj siuq Yauzcuz, gyawj geij bi neix de cungj youq ndaw yienh hai ban son cungj dinfwngz neix. Cwngfuj caemh gaenxmaenx henhoh, seizneix gij mingzdaeuz dinfwngz daemj siuq、ywdoj、foux gyongnaezhenj、diuq Buenzvuengz daengj vwnzva cienzdoengj gaenq cienz ok Byayauz hung bae lo.

Gij vwnzva lijlouz、cietheiq minzsug Ginhsiu caemh gag miz daegsaek, langhbaij vunzlai Ginhsiu gyo ndwenngoenz、maqmuengh baezlaeng gvaq ndaej engq ndei. Gij laeujyauzvuengz、laeujdaizraez、laeujaenndoengj daengj cungj miz gijgwn miz daegsaek de. Hekyouz mboujdan youq ndei gwn van, daejniemh yienghndei Yauzcuz, lij ndaej ngonzyawj hwnj byacax、dangh haijfeiz、gvaq lienhfeiz、benz daizfwj、“benz laeuz” doxiek、diemj bogfeiz “okhaq” daengj biujyenj dem.

Gij gyaeundei Ginhsiu, youqlaeng bya gyaeu raemx sawdik, youqlaeng vwnzva Yauzcuz, youqlaeng lajmbanj lumj hotsei, youqlaeng cwxcaih simlangh. Neix couh dwg Ginhsiu, seizcin valangh seizdoeng yawj nae, seizhah rumz liengz seizcou ronghndwen, gizdieg mwngz daeuj le couh sij mbouj ndaej lizbae ndeu.

（Gij doz daj gwnzmuengx aeu）