Haetneix hwnqcongz baez hai cueng, raq rumz he cifefe daengz gwnznaj, gij hoengheiq singjsien hix riengzlaeng bongh daeuj. Baihrog ndit ronghsagsag, rongh ndaej lwenqda, gij sing vunz gangjriu caeuq sing ci lahbah doxgyaux ndaej nauhyied raixcaix.

Ngoenzneix dienheiq baenzndei, naemj daengz caenhneix guhhong miz di nyaengq, lij caengz ndaej bae yihyen daj gij yizmiuz re sinhgvanh binghdoeg, gwn ngaizromh gvaq le, gou cigsoh byaij bae yihyen.

Song bi neix, sinhgvanh bingh- doeg ak lumj duzguk nei, lah doh gwnzbiengz, hawj haujlai vunz saet bae diuzmingh dijbauj. Guek raeuz caeklaiq baengh dangj caeuq cwngfuj gaemhguenj ndaej ndei, mbouj deng lah geijlai. Guekgya caux ndaej gij yizmiuz re sinhgvanh binghdoeg le, bineix hainduj heuh gyoengqvunz bae yihyen daj, mbouj deng gag ok saek faen ngaenz.

Rox aen siusik neix, gyoengqvunz angqfwngfwng boux iu boux guhdoih bae yihyen daj yizmiuz.

Seizneix gou naemj: Mbouj ndaej caiq doeklaeng lo, aeu insik ndang- daej cihgeij, mwngz boux vunz he baenzbingh, lij lah deng vunzwnq, boux lah boux, saeh iq bienq saeh hung lo.

Gou daengz yihyen, raen gyoengqvunz gaenq baiz song hangz doih raezrangrang. Gou sien byaij daengz baihnaj ndomqyawj cingz- gvang, raen dahsau husw lengjlili he naengh youq gizhaenx. Gou cam naeuz:“Dahsau, baenzlai vunz daeuj baiz doih daj yizmiuz, dwg mbouj dwg ngoenzneix miz yizmiuz lai ne?”

Dahsau riu naeuz:“Dwg ha, seizneix yihyen ceiq lai dwg cungj yizmiuz Anhveih Swngj caux, aeu daj cim baez cij ndaej, gek ndwen ndeu couh daeuj daj cim ndeu. Dahcej, mwngz ganjvaiq bae baiz doih lo, mboujnex couh gvaiz lo.” Gou yaek baenqndang deuz seiz, raen gyoengq- vunz baiz doih mbiengjhaenx, boux canghyw mehmbwk raed byoemdinj he, cug boux fat mbaw biuj heuh haeuj baihndaw bae daj yizmiuz.

Doenghboux ndaej daj cim ndeu roxnaeuz song cim gvaq haenx, canghyw couh sijsaeq yawj mbaw biuj daengz seizgan dajcim caengz. Boux canghyw haenx naeuz, ndaej daj cim daih’it le, caiq daeuj daj cim daih- ngeih caeuq cim daihsam, doekgonq ngoenz ndeu daeuj daj cungj mbouj ndaej, gek nanz caiq daeuj daj hix mbouj ndaej, yw mbouj mizyauq lo, aeu gek seiq aen singgeiz couh ndaej caiq daeuj daj mbat he. Boux canghyw naengh gizhaenx henzdaiz lij nem miz hangz cih he: Bouxgeq、bouxbing、bouxndangcanz ndaej dajcim gonq. Dan yawj gij saw neix, hawj vunz roxnyinh aen sim raeujrubrub.

Gou byaij gvaq baihlaeng bae, caeuq gyoengqvunz caez baiz doih. Mbouj geij nanz, couh baiz daengz baihnaj boux canghyw naengh giz- haenx lo. Gou ndenq sinhfwncing gvaqbae, boux canghyw haenx cam gou:“Geij ngoenz neix baenz ae、fatndat roxnaeuz aen ndang miz maz mbouj soeng lwi?” Gou naeuz:“Mbouj miz.” Gou gangj sat, canghyw couh ndenq mbaw biuj he hawj gou sij, riunyumnyum naeuz:“Mwngz gaem mbaw biuj neix haeuj baihndaw bae baiz doih ba.”

Byaij haeuj baihndaw bae, hauj- lai vunz ndwn youq gizhaenx ndaet- fwdfwd, naihsim baiz doih. Boux canghyw ndeu sing hung naeuz:“Daihgya gaej simgip, dawz mbaw biuj sou gaenq sij ndei gvaq mbiengjneix daeuj baiz doih gonq, nyaenj gij siusik sou haeuj ndaw dennauj bae, caiq dawz bae baihnaj song boux canghyw de cuengq ndei, heuh daengz coh bouxlawz, bouxde couh gvaqbae daj yizmiuz. Daj ndaej le, lij caengz ndaej deuz baenz vaiq, aeu ndomqyawj buenq aen cungdaeuz cijndaej.” Gyoengqvunz dingq le, cungj ei gij vah de bae guh.

“Banh Gveicingh!” Boux cangh- yw gaem mbaw biuj he swenj naeuz. Ndaw vunzlai doenghnyaunyau, mbouj raen miz vunz byaij okdaeuj.

“Banh Gveicingh youq gizlawz?” Boux canghyw haenx youh swenj naeuz. Gyoengqvunz mwngz yawjyawj gou, gou yawjyawj mwngz, vanzlij mbouj raen miz vunz byaij okdaeuj.

“De gaenq ndaej roekcib bet bi lo, roxnaeuz gvaq gizgungx lawz bae yietnaiq lo.” Lingh boux canghyw gaem mbaw biuj doq yawj doq naeuz.

Heuh daengz mingzcoh mbouj raen vunz, gyoengqvunz da muengh- myoegmyoeg deq daj yizmiuz, mbouj ndaej sai seizgan, song boux canghyw nyaengqnyetnyet cug boux daj, buek vunz neix daj ndaej le, lingh buek vunz youh haeujdaeuj.

“Canghyw, gou ma daengz lo, gou heuhguh Banh Gveicingh, lwnz daengz gou daj caengz？Haetneix gwn di doxgaiq gyoet, dungx mbouj ndei, haxbaenh bae diengzhaex lo. Ra mbouj raen diengzhaex simgip lai, aen soujgih daeglwg ngamq cawx ndaej haenx hix deng doek gwnznamh bae, sanq caez lo. Caeklaiq baengh dahsau husw neix daiq gou bae diengzhaex, lij bang gou dawz aen soujgih cang ndei coih ndei.”

Gou muengh gvaqbae, raen dah- sau husw niennomj ndeu fuz bouxlaux gvaqdaeuj, aen sim gou roxnyinh raeuj dangqmaz.

“Daxmeh ya daxmeh ya gou naemj mwngz, mbouj miz mwngz gij saedceij gou roxnyinh gig fwz- mbwq……” Sawqmwh, ndaw vunzlai miz soujgih yiengj hwnjdaeuj.

Dingqnyi souj go neix, aen sim gou ngeixlangh bae gyaegyanggyang, gou naemj hwnj mbanjranz, naemj hwnj daxmeh. Baenzlai nanz mbouj ma mbanjranz, mbanjranz dwg mbouj dwg bienq yiengh haujlai lo? Daxmeh dwg mbouj dwg youh bienq geq di lo?

“Gijmaz, daxmeh youh mbouj raen lo, gou seizneix youq yihyen baiz doih daj yizmiuz, lij caengz lwnz daengz gou ne. Couh yienghneix gonq, gou seizneix lijdwg dauqranz caeuq mwngz caez bae ra daxmeh ba!” Aen sing yienh ndaej gig gip he gangj naeuz.

Boux ciep dienhvah dwg daegcoz ndaej ngeihcib geij bi he, de simgip ndaej saeknaj bienq hau, najbyak miz raemxhanh iemq okdaeuj.

“Canghyw, daxmeh gou ukgyaeuj bienq ngawz, aeu seizseiz henyawj cij ndaej. Haetneix gou daeuj daj yizmiuz, mehyah gou bae haw cawx byaek, daxmeh mbouj rox seizlawz yumzyumz gag hai dou okbae lo. Seizneix mehyah ra mbouj raen daxmeh, gip ndaej daej lo, gou dauqranz gonq caeuq de caez bae ra daxmeh, ngoenzcog caiq gvaqdaeuj daj yizmiuz.” Bouxsai byaij gvaqbae naeuz.

“Yienghneix hix ndaej, mwngz song ngoenz neix aeu cagaenj seizgan daeuj daj, ciengeiz gaej ceiz lai bw.” Canghyw dap naeuz.

“Daegmbauq, mwngz miz saeh- gip, seizneix lwnz daengz gou daj lo, mboujnex mwngz bae daj gonq.” Dahcej he ndwn youq doiqnaj gou naeuz boux daegmbauq neix.

“Docih mwngz dahcej lo, seizneix couhsuenq mwngz nyiengh hawj gou bae daj gonq, lij aeu ndomqyawj buenq aen cungdaeuz cij ndaej deuz ne, mbouj miz baenzlai seizgan deq lo.” Bouxsai gangj sat, yamq hung byaij ok yihyen.

Daj ndaej yizmiuz le, gou caeuq gyoengqvunz youq lingh giz yietnaiq ndomqyawj buenq aen cungdaeuz. Gizhaenx baij miz haujlai aen daengq, gokciengz lij cuengq miz aen gihgi gwn raemx ndeu. Boux canghyw ndeu gvaqdaeuj riu naeuz:“Gizneix raemx- ndat raemxgyoet cungj miz, bouxlawz hozhawq couh gag daeuj gwn.” Fwngz gou gaem boiceij raemxraeuj, caen hawj vunz ndang raeuj sim engq raeuj.

“Guekgya doiq raeuz caen ndei, daj yizmiuz mbouj deng ok saek faen cienz.” Miz vunz naeuz.

“Dingqnaeuz yizmiuz neix gig bengz, danghnaeuz gag ok ngaenz bae daj, mbouj miz geij lai boux sai ndaej gij ngaenz neix bw.” Lingh boux han naeuz.

“Yizmiuz guek raeuz ancienz, doiq ndangdaej mbouj miz haih, gij guekgya wnq cungj ceng daeuj cawx.”

“Mbanjranz gou miz di doek- gungx, yihyen lij haici bae coux gij bouxgeq byaij loh mbouj ndaej haenx bae yihyen daj yizmiuz ne.”

“Guekgya caeuq cwngfuj gvan- sim raeuz, seizseiz dawz raeuz cuengq haeuj ndawsim bae, gyoengqvunz doxhuz caez youq, doxbang dox- coengh, mingh raeuz caen ndei, seng youq aen biengz neix, vaiqvued vuenyungz raixcaix.”

……

Gyoengqvunz mwngz gangj gou naeuz, doqgyaeuj gangjsebseb, gou youh roxnyinh raq heiqndat he daj ndawsim biu hwnjdaeuj, cimq doh daengx ndang raeujrubrub.