20 sigij 50 nienzdaih duenh laeng, Dangj- cunghyangh gietdingh gyarengz hawj hawsingz henzhaij haeujcoengh dieg henzguek guh gensez, Sanghaij daengj hawsingz henzhaij han riengz Dangjcunghyangh ciuheuh haeujcoengh Gvangj- sih, ndatcingz coengh Gvangjsih fatmaj gunghyez, haeujcoengh gensez dieg siujsoq minzcuz henzguek. Gonqlaeng miz 26 aen Sanghaij giyez caeuq cizgungh、vunzranz cizgungh caemh buen daeuj Gvangjsih Nanzningz、Liujcouh、Gveilinz、Vuzcouh daengj dieg youq roengzdaeuj.

26 aen Sanghaij giyez coengh henzguek neix hamj gvaq cien leix gyae buen daengz Gvangjsih, lumj baenz naed baenz naed ceh, doek youq ranghdieg bienhenz 4 aen hawsingz daeuz Gvangjsih, doek youq ndaw gunghyezyenz fatmaj doeklaeng Gvangjsih, doed rag、hai va、baenz aen, maj baenz faexhung. Miz mbangj Sanghaij giyez coengh henzguek de baenz giyez daeuz Gvangjsih, baenz gij giyez mizmingz Gvangjsih. Lumj Gveilinz Ciyoz Cangj dangseiz baenz aen giyez ceiq daeuz Gvangjsih, 1995 nienz ndaej bingz baenz giyez ngeih loih hungdaeuz guekgya, roengz giek maenhsaed hawj canjnieb yw ciuhneix laeng Gveilinz ndaej fatmaj.

（Gvangjsih Minzcuz Yenzgiu Cunghsinh hawj gauj）