Doengceiq naek gvaq cieng, vunz gwnzbiengz doxcomz. Vunzciuhgonq nyinhnaeuz, cietheiq guek raeuz dwg daj doengceiq suenq doxhwnj. Youq ngoenz de, haujlai dieg cungj angq gvaq ciet, gingq cojgoeng, gyoengqvunz naengh henz daiz, gangj haemz gangj van gangj daengzcog, feizdanq oqrubrub, sing riu mbouj duenh, nauhyied dangqmaz. Doengceiq raeuj, byoq feiz daengz siujmuenx. Neix dwg vunz Guengjsae daj cietheiq doengceiq ndaej rox. Youq dieg raeuz, gak aen minzcuz cungj gvaq doengceiq, hoeng gij fungsug loq mbouj doxdoengz.

Gaxgonq, Vujsenh、Nanzningz daengj dieg, mehmbwk haq okbae haenx doengxngoenz doengceiq ma ranzmeh “gwn doeng”, hoeng haemhlaep gonq yaek dauq ranzgvan, mbouj ndaej youq ranzmeh gvaqhaemh, seizneix vunz mbouj guh yienghneix lo. Cunghsanh、Yangzsoz、Sanglinz、Dasinh、Sanhgyangh daengj dieg youq ngoenz doengceiq daengx ranz cungj aeu bae caeq miuhcoj、duzsix、dojdeih. Seizde, ranzranz cungj gaj bit gaj gaeq gaj mou daengj, nda daizlaeuj daih caencik baengzyoux, guh dwk hoenghhwdhwd. Gveilinz daengj dieg, vunzmbanj youq ngoenz doengceiq cingj bouxdauh nda danz guhcai、boq digdoengz、ndaekgyong、cuengq bauqdiet, daep mauhngeg diuq foux, yienghneix guh gyo’mbaiq duzsien hawj fuk, aenbiengz onjdingh. Gveigangj daengj dieg youq seiz doengceiq bae dwk moh moq lai, ciet sam ngoenz gonq, ranz miz vunz ngamq gvaqseiq haenx aeu dwk moh moq, guh “bangq doeng”. Yauzcuz Gveibingz youq doengceiq guh “ciet- gingqlaux”, banlwg lumj dahlwg、lwgbawx ngoenz de aeu soengq buhvaq moq、mauh moq、haiz moq daengj hawj vunzlaux ndawranz, guh yiengh saeh hauqgingq haenx.

Cien bi gvaqdaeuj, doengceiq cauxbaenz gij vwnzva gaiqgwn cietheiq daegbied ndeu. Doengceiq haujlai dieg cungj gwn ceizraemxrouh, dangqnaeuz “doxcomz”“yienzmuenx”. Vunz Nanzningz gangj- naeuz “doengceiq ndang ‘ndat’aeu gwn bit”, couhdwg naeuz doengceiq daengz le, gij “ndat” comz- youq ndawndang haenx youh daengz seiz aeu cawz bae lo, nohbit mbouj suenq huj, seizneix gwn couh ngamj lo. Bouxgun Yilinz、Vuzcouh daengj dieg gwn niengdaeuhfouh, Bouxcuengh Dwzbauj daengj dieg gwn haeuxnamzgva. Vunzlai laihnaeuz niengdaeuh- fouh、haeuxnamzgva dangq gwnzmbwn lajdeih, youh miz gij eiqsei hai seizdaih moq haenx. Cawz yienghneix, mbangj dieg lij lai youq doengceiq gwn haeuxfaengx、gau haeux、ceiz daengj. Vunz Yilinz gvaq doengceiq, yaekngvanh ranzranz cungj suek haeux- faengx, mbangj vunz dangdieg doq heuh doengceiq guh “ciethaeuxfaengx”. Vunz naeuz doengceiq gwn faengx dwg aeu “haeuxcid bouj heiq”, maqmuengh ndangcangq ndangrengz, bimoq engq ndei. Boux- cuengh、Bouxgun youq Binhyangz、Lungzcouh、Nazboh、Fuzsuih haenx, ngoenz doengceiq noix mbouj ndaej gwn byaseng. Dieg Gveibwz cix ciengzseiz youq doengceiq guh nohlab, vanzlij gangjnaeuz “doengceiq lab noh mbouj yungh gyu”. Duenh doengceiq haenx mbwn cingx rumzbaek ci, nohlab aeu youq ndwen ndeu guh baenz, ranzranz cawx nohmou ma guh nohlab nyaengqfodfod, miz mbangj vunz lij guh gaeqlab、bitlab、gyaeujmoulab、bongqlab daengj. Gveigangj daengj dieg youq doengceiq maij ngauz- laeuj, laeuj de heuh “laeujdoeng”, gvaqlaeng aeu daeuj daihhek roxnaeuz gvaqcieng gwn. Bibi daengz doeng- ceiq, Bozbwz ranzranz gag guh “bauh doekraemx”gvaq ciet dem. Gih raeuz gvaq doengceiq, diegdieg cungj gag guh gijgwn miz daegsaek de, gig mizyinx.

Cawz ndaej naeuz seizciet bienqvaq, doengceiq lij dwg seiz bouxyouqrog ngeix ranz gyaez mbanj, dwg cungj vwnzva sibsug ndeu, riengz vunzlai daih cienz daih.