It

Vunz, gyaez caemhyouq, vunzlai caemhyouq nauhnauh yiedyied. Caeuq vunzranz caemhyouq, caeuq doengz- saeh caemhyouq, caeuq caencik baengzyoux caemhyouq, neix dwg cungj saedceij he. Fanzdwg saedceij, ndawde cungj miz nyap miz angq, miz daej miz riu.

Guh gwn、gvaq ndwenngoenz yienznaeuz aeu caemhyouq, hoeng, mizseiz, vunz hix aeu gagyouq. Gagyouq hix dwg cungj saedceij ndeu. Cungj saedceij neix, ndawde caemh miz nyap miz angq, miz daej miz riu.

Gij gamjsouh gagyouq lai cungj lai yiengh, gou roxnyinh gig laeg.

Bi 1992 gou camgya gunghcoz, baenz bouxciengxroen ndeu, deng faenboiq bae yienh wnq dem, youq aen camhciengxroen bien’gyae ndeu guh- hong.

Camhciengxroen cungj dwg hwnq youq henz roen. Saek aen camh- ciengxroen seiqhenz mbouj miz mbanj, engq mbouj gyawj haw, gag de youq gizhaenx fwzrwdrwd、gyaxgedged. Aen camhciengxroen gou bae haenx couh- dwg yienghneix.

Aen camhciengxroen neix gungh miz cibngeih boux vunz, ciengx roen samcib roek goengleix. Banngoenz youq gwnz roen guhhong, yienznaeuz hong naek ndang naiq, mboujgvaq, daihgya miz gangj miz riu, hix simhai. Baez souhong, lingh cib’it boux doengzsaeh cungj maranz lo, gyoengq- de dwg vunz bonjdieg, gyawj ranz.

Banhaemh gag gou boux dog youq aen laeuz, aen laeuz neix miz sam caengz ngeihcib seiq aen rug, seiqlengq fwzrwdrwd、caemrikrik. Seizhaenx gou lij dwg saucoz, caemh- caiq dwg baeznduj okrog, ndigah mbei iq lau saeh. Moix haemh, mbwn caengz laepcingh, gou couh gyaeng swhgeij youq ndaw rug, mbouj gamj daihheiq diemcaw. Baihrog miz maz doenghdanh, gou couh saenz lumj duznou caeg raemz nei, mizseiz dwglau daengz lienzhwnz ninz mbouj ndaek, mbwn mbouj rongh cingh gou mbouj gamj haidou.

Danhvei miz densi, hoeng ce youq hagsibsiz laj laeuz, suzse gou youq sam laeuz, gyanghaemh gou mbouj gamj okdou roengz laj laeuz bae yawj densi.

Youq gij gyanghwnz raezrangh dwglau ndawde, gou buekmingh yawj saw ngonz bauq daeuj gaij dwglau. Mwhde, gou gvaq hwnz ndeu couh lumj gvaq bi ndeu nei, maqmuengh daengngoenz caeuxdi loh naj.

Buenq bi gvaqbae, gou saedcaih souh mbouj ndaej cungj dwglau gagyouq neix, couh gouz lingjdauj diuh gou bae lingh aen camh- ciengxroen haethaemh miz vunz caemhyouq. Lij ndei, lingjdauj rox gij haemzhoj gou, gig vaiq couh roengz diuling, gou ndaej duetliz cungj dwglau gagyouq neix lo.

Bi 1999, gou ndaej diuh dauq bonj yienh, youq aen camhciengxroen ndaw cin. Ndaw cin beij lajmbanj nauhyied lai lo. Gyanghaemh, gou caeuq doengzsaeh bae haw youz、gwn caeuzhwnz roxnaeuz ciengq go daengjdaengj, roxnyinh gij ndwen- ngoenz caemhyouq neix nauhyied dangqmaz, gou caemh haengjheiq.

Bi 2002, gou baenzranz lo, hoeng, gvanbaz dangqboux gag youq giz ndeu, couhmoz cij ndaej caemh- youq. Roengzban seizgan gou gyaez boux dog gagyouq suzse, suenq lij ca geijlai ngoenz cij daengz couhmoz.

Bi 2003, gou baenz meh lo. Guhhong、ciengx lwg、ganq ranz, vih gij fwnz haeux youz gyu ndawranz nyaengqfofo, roxnyinh gig naiqbaeg. Saekseiz, lwg daejnga’nga, bouxgeq damzbyoedbyoed, lwgnyez bouxgeq cauzhuhu, rabraeh dangqmaz, hawj gou simfanz. Danghyenz, simfanz ndawde hix miz vuenyungz. Hoeng, gyonj daeuj gangj, seizhaenx gou maqmuengh ndaej gagyouq.

Cauzsim、cabheiq cibsam bi le, lwgnyez hwnj cuhcungh lo, youq ranzhag gwnyouq， bouxgeq hix dauqbae ranzcoj lo. Mbatneix gou caen ndaej gagyouq lo, boux dog gagyouq, roxnyinh cwxcaih dangqmaz, caemh ndaej yiengjsouh gij yinxdaeuz gagyouq.

Gagyouq nanz le, roxnyinh gig lai, nyaenx mbouj ndaej siengj lwnhlwnh.

Ngeih

Seiz gagyouq, raeuz engq ndaej- hoengq bae gvaqniemh vunzcaen, hawj caencingz ciengxlwenx mbouj bienq; hix engq ndaejhoengq bae gvaqniemh baengzyoux, hawj youxcingz gyalaeg; caemh engq ndaejhoengq bae gvaq- niemh vunzaen, hawj ndawsim raeuz ciengz miz gij cingz gyo’mbaiq; lij ndaej ngeixngeix gij vunz sienghaih gvaq swhgeij roxnaeuz gij bouxcaeuz, neix couh ndaej hawj raeuz hag rox lumz bae gij sienghaih、gij haemz- haenq. Vahsug naeuz “haij yungz bak diuz dah, saeh gvaq gaej geiq haemz”. Raeuz aeu hag rox damhdingh mienh- doiq saehgonq, mboujguenj saehndei saehyak, cungj cuengq roengz, mbouj caeuq swhgeij doxgeuj, hawj swhgeij simsoeng.

Seiz gagyouq, raeuz ndaej yawj dauqlaeng: Gij boihseiz gij daekeiq, gij vaiqvued gij nyapnyuk mwhgonq, doiq ngoenzneix daeuj gangj dwg gingniemh、 dwg dijbauj. Cungj cuengq roengz saehgonq, ndaej hawj raeuz hag rox baenzgoeng mbouj ndaengmoj, saetbaih mbouj doeknaiq, hawj aen sim raeuz caemdingh. Seiz gagyouq, hix ndaej ngonz baenaj, miz loqsiengj couh roengzrengz bae buekguh, hawj loqsiengj ndaej saed- yienh, yienghneix saedceij raeuz couh ndaej caeng rim saenqsim caeuq gij rengz.

Seiz gagyouq, raeuz ndaej yawj saw ngonz bauq. Daengx ndang ndonj haeuj ndaw seiqgyaiq saw bauq bae, caeuq sawcih yungz itheij, cimz gij feihdauh sawcih, roxnyinh gij gyaeu- ndei sawcih guek raeuz, roxnyinh gij geizheih de. Yienghneix raeuz couh ndaej vut bae gij fouzfengz simgip, ndawsim ndaej caemdingh.

Seiz gagyouq, raeuz ndaej raizraiz sijsij. Raiz faenzcieng, sij simcingz. Seizneix mbouj miz byawz youq henz gauxca, cingq dwg seiz hab raiz. Dawz gij roxnyinh ndwenngoenz, gij roxyiuj ciuhvunz, gij simcingz swhgeij, raiz roengzdaeuj, hawj gyoengqde yienh youq ndaw saw ndaw coenz. Miz di vah、miz di coenz, mbouj hab gangj hawj vunz rox, ce youq ndawsim youh nanzsouh, seizneix couh cienzbouh raiz roengzdaeuj, swhgeij gag yawj gag doeg, mbouj miz byawz rox. Yienghneix, raeuz couh ndaej okheiq、ndaej gejhai, ndaej cuengq gij haemz gij hanh ndawsim okdaeuj.

Seiz gagyouq, raeuz ndaej vehveh. Seizbienh veh, veh maz cungj ndaej. Gova go’nywj, gungqbya diuz- dah, duzroeg duzbya…… Siengj baenzlawz veh couh baenzlawz veh, veh mbouj ndei hix mbouj lau vunz riu, couh dangq gag guh’angq. Raiz- raiz vehveh, ndaej goq ndang, ndaej hoh sim, ndaej ciengx saenz.

Seiz gagyouq, raeuz ndaej ciengq go roxnaeuz diuqfoux. Siengj baenz- lawz ciengq couh baenzlawz ciengq, naemj baenzlawz diuq couh baenzlawz diuq, couhcinj ciengq mbouj baenz- dingq, diuq mbouj baenzngonz, hix mbouj lau saetnaj. Cij aeu swhgeij simhai, siengj baenzlawz ciengq baenzlawz diuq cungj ndaej. Ciengq go、diuqfoux, ndaej hawj raeuz cuengq roengz gij atlig gij nyapnyuk, simcingz ndaej soengswt.

Seiz gagyouq, raeuz ndaej lienh suhfaz. Cih cingq cih geuj, youzcaih raeuz raiz. Gonj bit gyangfwngz raeuz siengj vag hwnj vag roengz, vag vang vag raeh roxnaeuz hopheux cungj youzcaih raeuz; byai bit maij gip maij menh, maij raez maij dinj cungj youzcaih raeuz. Lienh raizsaw dwg gienh saeh mizyinx ndeu. Raeuz mbouj iugouz baenz canghsuhfaz, cij gouz baengh lienh raizsaw daeuj coih ndang ciengx heiq, hawj ndawsim caemdingh. Lienh nanz le, raiz lai le, sawcih yied ndaej yied ndeiyawj, neix mbouj dwg saehndei ma?

Seiz gagyouq, raeuz hix ndaej maz cungj mbouj siengj, maz cungj mbouj ngeix, caih ndaw uk hoengq- vauvau, hawj aen uk yietnaiq.

Seiz gagyouq……

Mizseiz, boux dog gagyouq, ngaezngaez naengh dwk, roxnaeuz ngaezngaez yawj gizgyae, mbouj dwg gadog, dauq roxnyinh cwxcaih. Saed- ceij ndawde, gagdog saek mboengq, beij gij saedceij cungj gwn laeuj gangjboq miz yinxdaeuz, engq lai ndaej ik.

Seizneix gou engq gyaez gagyouq lo, mboujgvaq, bouxvunz saekseiz gyaez caemhyouq saekseiz aeu gagyouq, neix couhdwg saedceij.