1969 nienz 12 nyied 1 hauh, aen doih- ywbingh“canghyw Denhcinh”ngamq daengz Yangzsoz Yen Gauhdenz Gunghse, couh nyi vunz lwnh miz boux gunghyinz muzgicangj ndeu gaiq ga deng gihgi gienj haeujbae, lwed lae mbouj dingz, haenq lailai. Aen doihywbingh mbouj gangj gijmaz, couh ganj gvaqbae yw, dangseiz mbouj miz dienh、mbouj miz raemx、mbouj miz soujsuzsiz、mbouj miz gaiqdawz aenyungh、mbouj miz lwed yungh, aen doihywbingh caezsim gaprengz, gouq bouxsieng ndeidauq. Bouxsieng ndei le gvaqlaeng raen vunz couh lwnh, dwg“canghyw Denhcinh” gouq mingh de. 20 sigij roek caetcib nienzdaih, Yangzsoz Yen Gauhdenz Gunghse Veiswnghyen diuzgienh ywbingh ca lailai, rugbingh noix, caiqlij mbouj miz soujsuzsiz, canghyw dangdieg cungj mbouj gamj hawj boux- bingh guh soujsuz, doengh boux bingh haenq mbouj ndaej gibseiz yw, cij deng caj dai.“Canghyw Denhcinh”daeuj le, caezsim gaprengz, okrengz okmaeuz, mbouj geij nanz couh hwnq baenz aen soujsuzsiz, miz mbangj boux bingh haenq mbouj yungh bae yihyen ndaw yienh, ndaej youq dangdieg guh soujsuz, vunzlai dangdieg ndaej fuengbienh lai. Vihliux coengh canghyw dangdieg gyaak dinfwngz,“canghyw Denhcinh”vanzlij banh le geij geiz bansonlienh“canghyw lohdin”, mbouj geij nanz, miz mbangj canghyw dangdieg hix gamj guh soujsuz lo.

（Gvangjsih Minzcuz Yenzgiu Cunghsinh hawj gauj）