Bouxfamhlaux neix cungj mbouj hw sing ndeu.

Lungz Byauh roengzrengz giemz le geij mbat, biq di myaiz youq gwnz lwgfwngz, raeuzrad di, caiq laebdaeb giemz, giz laenghoz caeuq baihlaeng song henz bouxfamhlaux, cungj giemz ndaej yiengj “baba”. Bouxfamhlaux neix byom ndaej gaenq cij lw naeng suek ndok ndwi lo, mbouj miz saekdi noh, giemz hwnjdaeuj cungj dwg caengz naeng ndeu, Lungz Byauh yied giemz yied sim’in.

Bouxfamhlaux gaenq ninz youq gwnz dongfiengz, ning hix mbouj ning, Lungz Byauh baez doeksaet.

“Bouxlaux!” Lungz Byauh ngauz- ngauz gyaeuj de.

“W!”

“Baenzlawz yiengh lo?”

“Ha, ndei lai lo.”

“Baenzlawz baenz yienghneix ne?”

“Aiq dwgliengz lo.”

“Mwngz couh ninz youq gizneix ba.”

“Mbouj, gou mbouj ndaej lah hawj mwngz.”

Bouxfamhlaux youh lumhlaep dauqma daengz gokciengz de ninz gizhaenx bae.

Lungz Byauh haq gaemz heiq ndeu, genfwngz de nanq lo, de couh bibuengq song baez genfwngz, menh- menh ninz youq gwnz dongfiengz lo.

Haxbaenh bang bouxfamhlaux giemz laeng, gen’gvaz nanq ndaej hawj de haujlai nanz lij caengz ninz ndaej ndaek, aenvih de dauqngeix doenghbaez hix gaenq miz cungj roxnyinh neix gvaq, gen’gvaz youh naet youh nanq, hoeng ndawsim cix daegbied cwxcaih—— Haenx dwg gij saedceij youq gwnz Byadunghyinz bang Siu Cuh gvej nya, di rengz cungj mbouj ce, gwq buekguh, haemz mbouj ndaej gvej gij nya gwnz bya liux bae, hawj Siu Cuh sim’angq…… Seizneix, Siu Cuh ne? De youq gyawz ne? Seizneix cingq dwg gyanghwnz, de lauheiq hix cingq ninz youq gwnz congz byaengq da ngeix simsaeh. Ngeix maz ne? Youq gwnz bya gvej nya? Youq henz dah guhsaeg? Roxnaeuz…… Wnggai dwg ngeix bouxgyaez? Ah Gwnh? Lungz Byauh?……

(caengz sat)