Foux Gizlinz Bouxcuengh dwg cungj foux riuzcienz youq rangh dieg Nanzningz Si Cinghsiu Gih Cangzdangz Cin、Liengzging Gih、Gyanghnanz Gih、Hwngzcouh Si daengj. Gizlinz dwg doenghduz laeng ndaw cienzgangj, maj miz gyaeuj lungz、ndang maxloeg、din max、rieng vaiz caeuq najbyak manaez, gyaep gwnzndang lai saek gyaeundei, daibyauj fukheiq caeuq vuenyungz.

Cienznaeuz, Diz Cingh daiq bing daeuj baihnamz hoenxciengq, vunzlai henz dah laeng Cangzdangz moix ngoenz cungj raen gyoengq bingmax ciuzdingz haet ok haemh dauq, daj baihgyae yawj gvaqbae couh lumj bouxciengq gwih duzgizlinz nei, gyoengqvunz couh heuh bang bing neix guh “bing gizlinz”. Bing gizlinz bingz le luenh, vunzlai dieg de dauq gvaq hwnj ndwenngoenz ndei. Vih geiqniemh bing gizlinz, vunzmbanj couh aeu faex gaek、duk san ok gyaeuj gizlinz, daep aen de bae diuq foux, foux gizlinz couh yienghneix cienz roengzdaeuj lo. Doeklaeng, foux gizlinz menhmenh caiq bienqbaenz cungj foux gwnzbiengz coux fuk ndeu. Foux de cawjdaeuz byaij yamq vunzdaemq sanhgangh, hag gijyiengh doenghduz, lumjbaenz duzgoep doek raemx、duzbaeu ok congh、gungqhaij benz haenz daengj, daibyauj seizcin daeuj daengz、doek ceh、dajsou、ndaej lai、gyaep fangz daengj. Moix bi cieng cocaet cobet、seiq nyied cobet、loeg nyied cibgouj, gak mbanj rangh dieg neix cungj gaj mou gaj vaiz、buizcaeq bouxsaenz、cingj laeuj daih hek. Aen doih gizlinz cix diuq foux gizlinz cug gya cug ranz bae soengq fuk. Sing gyong mizrengz, vunzlai sim’angq naj riu, maqmuengh saedceij engq ndei.

Diuq foux gizlinz aeu bae miuh dojdeih ndaw mbanj cingj bouxsaenz gonq, baij nohgaeq、nohmou、nohyiengz, siuyieng caeqbaiq, cuengq bauqrengh couh hainduj biujyienj lo. Diuq foux gizlinz aiq miz cib geij boux vunz, vunzsai mehmbwk gak roek boux, daibyauj bi ndeu cibngeih ndwen seiq geiq an’onj. Gizlinz gim caeuq Gizlinz lamz gak daibyauj duzboux duzmeh. Gizlinz gim dwg muengh guekcoj mwnhoengh fouqak, gizlinz lamz dwg muengh vunzlai huzndei caemhyouq、saedceij vuenyungz. Baez biujyienj seiz, dahsau ndeu caeuq lwgsai ndeu naengh youq gwnz daiz sang, boux “mehmbwkva”ndeu ndwn baihhenz, doeklaeng dwg gyoengqvunz boq yezgi caeuq canghfwen, ndawde miz song boux boq loxlez、sam boux ndaek gyonglaz、sam boux canghfwen.

Sing gyonglaz yiengj hwnjdaeuj, gizlinz hainduj doengh lo, sien sax sam baez: It sax aenmbwn, muengh fwn yinz rumz dingh; ngeih sax dieg, nyienh gohuq maj ndaej ndei sou ndaej lai; sam sax vunzbiengz, maqmuengh bouxboux ndang cangq an’onj. Song duz gizlinz bi gyaeuj bi rieng、 guh- angq guhcaemz. Gyoengq canghfwen eu fwen Bouxcuengh, lumjbaenz eu “gaenxmaenx buekguh sou ndaej lai, miz oij miz maenz haeux rim cang; gizlinz soengq lwg youh soengq fuk, vunzlai Bouxcuengh seiqdaih onj”daengj. Aen doih foux gizlinz daj miuh dojdeih hainduj, itmienh foux itmienh eu youz aenmbanj, soengq fuk hawj daihgya, aiq biujyienj le aen cungdaeuz lai cij youz doh daengx mbanj. Sat le couh bae daengz diegdangz hixnaeuz giz haemq gvangq de laebdaeb biujyienj.

Bi 2012, foux gizlinz Bouxcuengh ndaej senj haeuj swcigih gaep feihvuzciz vwnzva yizcanj mingzloeg. Bi 2019, Cinghsiu Gih Cangzdangz Cin lij laeb aen doih foux gizlinz, gyoengqde ciengzseiz camgya gak cungj gak yiengh hozdung, neix mboujdan ndaej langhbaij cungj foux cienzdoengj neix, lij hawj de ciepcienz roengzbae dem. Foux gizlinz langhbaij le vunzlai Bouxcuengh coengzgingq bouxyinghyungz, maqmuengh biengz bingz vunz an’onj、miz fuk habhoz、saedceij diemzvan ndei raeuh, yienh’ok gij sibsug cienzdoengj caeuq lizsij bienqvaq Bouxcuengh.

（Gij doz daj gwnzmuengx aeu）