It

“Miz daengx ndang goengfou, vunz mbouj aeu guh saeh, fagcax raeh cix raeh, hawj hwnj myaex ce ndwi.” Daegyungj Mbanjnazgyoij gonj bit raeh dangqmaz, haengj aeu Saw- cuengh daeuj raiz goj raiz fwen guhcaemz, seiz mbouj seiz ndaej youq gwnz saw gwnz bauq fatbiuj saekdi faenzcieng. De yienznaeuz mbouj dwg doeg gij conhyez vwnzyoz okndang, hoeng raiz faenzcieng hwnjdaeuj, daegbied dwg raiz faenzcieng Saw- cuengh, sawj geijlai daihhagseng youq dangqnaj de cungj lumj “duzmeuz roeb duzguk, yup hangx mbouj gamj ning.”

Daegyungj siengj okrog bae ra faenh hong daeuj guh, geij bi neix miz haujlai bouhmonz ciu aeu vunz, de cungj bae gauj gvaq, hoeng, “mbouj dwg mauh nienzlingz, couh vih vwnz- bingz daemq, mbouj miz yiengh ingbaengh, deng raemx dongj roengz dan”. Doengh aen danvih aeu vunz de cungj naeuz:“ ‘Dou aen daemz iqiq, mij(mbouj) ciengx duzbya hung, giz- neix langh mij rumz, duzlungz guhlawz youq.’ Mwngz lij dwg lingh bae ra giz ba!” Ndwen doek ndwen, bi gvaq bi, Daegyungj cungj mbouj ra ndaej saek faenh hong, lij dwg youq Mbanj- nazgyoij “ngoenz ndit max gwnz rin, ngoenz fwn gaeq doek raemx, gyang- haet mu daengz haemh, nyaengq ndaw reih ndaw naz”.

Gaenh bi neix daeuj, aenvih cwngfuj okdaiz le《Aen Banhfap Guenjleix Gwnzbiengz Sawjyungh Sawcuengh Nanzningz Si》caeuq《Aen Diuzlaeh Hong Vahsaw Siujsoq Minz- cuz Gvangjsih Bouxcuengh Swcigih》, ndaw haw ndaw singz haujlai danvih cungj yaek gaij guh baizbenj caeuq gunghcangh moq, seb coij Sawcuengh ndeu haeujbae. Yienghneix couh miz haujlai vunz daeuj ra Daegyungj heuh de bang fanhoiz, mbatneix lwnh daengz Daegyungj miz “seng’eiq” guh lo. De “miz daeuj cungj mbouj doi, guh fanhoiz caen dij, beij gwn maenz yungzyih(heih), gwn maenz lij mbek naeng”.

Ngeih

Ngoenz doek fwnmoenq ndeu, Daegyungj daj ndaw doengh buhvaq dumzsub saemxsaemx saxsax ngamq dauqma, mbwn cix fauz iengj ndit lo. Sawqmwh boux vunzsai byoemgyaeuj raezrangrang ndeu daeuj daengz ranz. “Daegyungj angqyangzyangz, daengx ranz ronghsagsag, ndaej coux daeuj bouxak, gag roxnyinh ndaenggon.” Daegyungj rox boux byoem raez neix heuhguh Luz Genzci, dwg boux cangh coemh guh gang’vax nding mizmingz ndeu, gwnz vangj cungj cienz hoengh lo. Bouxde daj iq couh gyaez ndoek namhnding guh baenz gak cungj doenghyiengh, bae coh Gvangjsih Yisuz Yozyen gyausou Cuh Beizginh baiqsae hag dinfwngz gvaq, de youq guh yisuzbinj gang’vax nding laemx- sim mu le geijcib bi, dwk roengz gij nanzdaez coemh yisuzbinj gang’vax hung, guh ndaej ok haujlai cozbinj ndaej daengz Cungguek Meijsuzgvanj、Cungguek Bozvuzgvanj dawz bae ceyo. Aen yisuzbinj 《Bak Fuk》hung de yungh bae cibgeij ndwen sai daihliengh simlwed cij guh ndaej baenz, aeu ndaej《Mbawcingq Yisuz- binj Gang’vax Hung Seiqgaiq Daih- it》Giznizswh, miznaj lailai. De seiz- neix youq rog haw ndaw cin hai aen “Suenyisuz” ndeu, cienmonz coemh guh yisuzbinj gang’vax nding, naemj daezsang gij dangjsw yizsuzbinj de, dajsuenq baezlaeng dwk di yenzsu vwnzva Bouxcuengh haeuj gij yisuz- binj gang’vax nding de bae, sawj gij yisuzbinj de dem di daegsaek minzcuz daegsaek. Baezneix daeuj ra Daeg- yungj couhdwg siengj cingj de bang guh di sei, cam de yaek aeu geijlai ngaenz.

“Miz seng’eiq haeuj ranz, dang- yienz dwg saeh angq, aeu yawj gyae yawj gvangq, gaej baexdangj lwgda.” Daegyungj rox Luz Genzci mingzdaeuz hung, lij roxnaj haujlai bouxhak, couh siengj hawj de bang gangj ra faenh hong ndeu. De hix rox, “miz goengfou caengz baenz, sug vunz cij ndei banh, ndi sug vunz luenh ngvanh, canh ndaej bae sai rengz.”

Daegyungj doiq Luz Genzci naeuz:“Luz saefouh, dingqnyi naeuz mwngz nem Vangz suhgi cin raeuz doxsug, gou siengj gouz de anbaiz faenh hong ndeu hawj gou. Baenzneix ba, gou bang mwngz guh di sei couh mbouj aeu ngaenz lo, mwngz couh bang gou doiq Vangz suhgi gangj geij coenz ndei couh baenz……”

Luz Genzci ngvanh yaep he le naeuz:“O, yienghneix hix ndaej. Vangz suhgi hix gyaez gij yisuzbinj gang’vax nding gou, caj ngoenzlawz de bae laeng gou, gou caemh heuh mwngz bae dem, gou gaisau mwngz hawj de roxnaj, caemhcaiq bang mwngz gangj geij coenz vahndei.”

“Ndei!” Daegyungj haengjheiq naeuz, “couh yienghneix gangj dingh.”

Daj neix hwnj, Luz Genzci coemh guh gij yisuzbinj gang’vax nding haenx demlai le geij coij sei aeu Cuengh Gun song cungj sawcih deu hwnjbae, yienh ndaej engq gyaeu, engq miz yisuz neihanz caeuq daegsaek minzcuz, dangjsw daezsang lai lo.

Sam

Luz Genzci daegdaengq coemh guh aen bingz cap va gang’vax gyaqciq ndeu yaek soengq hawj Vangz suhgi, hawj Daegyungj guh hot fwen ndeu hwnjbae:

“Bibi swng doxhwnj,

Ciuhciuh swnj roengzbae,

Baihnaj roen ronghndei,

Fad max baesadsad.”

Ngoenz Vangz suhgi daeuj laeng Luz Genzci aeu bingz gang’vax, Luz Genzci senq iu Daegyungj caemh bae laeng de. Luz Genzci gaisau Daeg- yungj hawj Vangz suhgi:“Suhgi, daeg hauxseng neix heuhguh Daegyungj, rox guh sei guh faenzcieng, gij sei gwnz gang’vax gou neix cungj dwg de raiz bw!”

“O! Youq neix lij yo miz boux vunzcaiz ak baenzneix ha!” Vangz suhgi byaengqda hemq naeuz, guh- muengz gaem fwngz Daegyungj ndaetndwt, “dieg raeuz caen miz vunzcaiz lai.”

“Suhgi ndei! Suhgi ndei……” Daegyungj “baez nduj gaem fwngz hak, miz di gag ndang saenz, gangj coenz cungj mbouj baenz, ngaem- gyaeuj riumwnmwn”.

Banringz, “baihrog mbwn gig gvengq, seiqlengq ndit baenz feiz, caen hoj dwngx lai seiz, bouxboux bae ndoj raemh”. Sam hujgeiq haeuj aen bauhsiengh gunghdiuz bouqlaeuj ndeu bae gwn ngaiz, mwh gwn gvaq geij cenj laeuj, Vangz suhgi miz di hwnjnaj lo, Luz Genzci doiq de naeuz:“Suhgi ha, Daegyungj mbouj hong guh, caenh bang gou daez di sei, daihcaiz siuj yungh ha. Mbouj rox mwngz bang anbaiz ndaej saek faenh hong, hawj de ndaej vih vwnzva dieg raeuz guh ok faenh gungyen ndeu lwi?”

“W, yienghneix ha!” Vangz suhgi naeuz, “miz baenzlai dungxcaiz mbouj ra faenh hong daeuj guh, cingqcaen dwg guekgya goem bw.”

“Couhdwg lo, neix couh gyo suhgi mwngz bang rengz cij ndaej lo.” Luz Genzci doq gangj doq doiq Daegyungj yaepyaep lwgda.

Daegyungj fwt singjsag, gaem cenj laeuj ndwn hwnjdaeuj, yaengx coh dangqnaj Vangz suhgi. “Gingq suhgi cenj laeuj, gyo’mbaiq daeuj bang rengz, aencingz lingjdauj bengz, gou rox hen ndeindet.”

Youh ndoet cenj laeuj le, Vangz suhgi couh bek aek naeuz:“Gij neix ndei banh, youq dieg raeuz, gou gangj it, caengz miz vunz gamj gangj ngeih!”

Daegyungj caeuq Luz Genzci ngaekgyaeuj dwddwd naeuz:“W, dou saenq gij naengzlig suhgi.”

Vangz suhgi naeuz: “Hawj mwngz haeuj vwnzvacan ndaw cin bae, guh lwi?”

“Guh! Guh! Miz hong guh couh baenz!” Daegyungj lumj “lax ndaej deng gaenqcuij, ndei rwix cungj vunzbaz, ndaej duzvaiz goeng’da, mbouj genj ra daegcoh.”

Seiq

Daegyungj dinghdingh youq ranz caj siusik, aen singgeiz ndeu gvaqbae lo, caengz raen miz siusik. Ndwen ndeu gvaqbae lo, hix caengz raen miz siusik. Song ndwen gvaqbae lo, lij caengz raen miz saekdi siusik. De ha, “ndwn lumj moed raih sim, naengh lumj cim camz hangx, deq ndaej yaek fatvangh, hoz ndangj ngoenz doek ngoenz”.

“Coenz vah gangj ok bak, mbouj ndaej rag haeujma, bwnhraemx dauj roengz naz, mbouj ndaej ra doxdauq.” Vangz suhgi ngoenzde cungj gangj- dangdang han naeuz hawj gou haeuj vwnzvacan ndaw cin bae lo, de boux hak ceiq hung aen cin raeuz, baenz- lawz ndaej gangjvah mbouj suenqsoq? Nanzdauh, “mwhhaenx de gwn laeuj, daeuq gou gangj vah fiz, mbouj cingqcaen saekdi, dangq mbouj miz gienhsaeh?” Daegyungj ngeix ndaej uk yaek mboek cungj ngeix mbouj ok dauqdaej dwg vihmaz.

Daegyungj caiq hix youq mbouj onj lo, de bae daengz aen “Suenyisuz” rog haw ra Luz Genzci yaek cam. Luz Genzci raen de couh naeuz:“Gienh saeh ra hong mwngz mbouj miz muengh lo.”

Daegyungj dingq daengz neix, daengx ndang cungj unq lumj gocoeng deng feiz log, doq cam:“Vihmaz?”

“Mboengqgonq Vangz suhgi gag anbaiz song boux lanbiuj de haeuj danvih, miz vunz gawjbauq daengz gwnz yienh bae, deng gyangqcik diuh deuz lo.”

Daegyungj roxnyinh daraiz cuenqvanghvangh, naenghbup roengz gwnz daengq, nanznanz mbouj gangj saek coenz vah.

Daegyungj lij dwg youq ndaw ranz Mbanjnazgyoij, “haethaemh muengh baihrog, hozgenx ok mbouj bae, guh maz ndi simgei, raemxda lae ndaw dungx”.