“Ha! Bouxlaux mwngz dwg lauxhangz loengh duzngwz——?”

“Haengj ndwi!”

“Ai!”

Lungz Byauh doq vut diuz fiengz fwngz, dep Bouxfamhlaux di.

“Danghnaeuz gij baksieng mwngz baez hainduj couh aeu nywjlinxngwz、vagimngaenz caeuq hazbiz daem yungz oep dwk, couh mbouj deng naeuh baenz yienghneix lo.”

“Caen dwg lauxhangz, bouxlaux, mwngz nyienh sonson gou lwi?”

Bouxfamhlaux hai da nyeux de baez yawj, ngauzngauz gyaeuj.

Lungz Byauh gwq daeuh de, de cix gyaen hwnjdaeuj ninz ndaek lo.

Lungz Byauh mbouj doeknaiq, caj de ndiu lo, caiq daeuh, de vanzlij mbouj nyienh.

Ngoenz daihngeih, Lungz Byauh youh daeuh de.

Ngoenz daihsam, ngoenz daih- seiq…… Lungz Byauh baez dem baez daeuh de son bonjfaenh hag di bonjsaeh loengh duzngwz caeuq rox di ywdoj, de cungj mbouj nyienh.

Aiq youh gvaq le ndwen ndeu, gyanghwnz, Lungz Byauh youq ndaw loq deng vunz gaex ndiu, ngamq yaek fanndang, sawqmwh henz rwz ndaejnyi gij sing iqetet he:

“Daegmbauq, ai—— Ndiu yaep he.”

Lungz Byauh baez fanndang naengh hwnjdaeuj, yawjraen youq henz ndang miz aen ngaeuz he.

“Miz maz saeh?”

“Gyaeuj gou gig in, ai! Mwngz bang gou nyaenxnyaenx laenghoz gou.”

Dingq gij sing couh rox dwg bouxfamhlaux haenx, Lungz Byauh iet fwngz baez lumh, daengx ndang de ndatfwdfwd, roxnyinh de cingq fat- ndat, gipmuengz hawj de ninz youq gwnz dongfiengz bonjfaenh, fan ndang de gvaqbae, biengj hwnj buh baihlaeng de, goz lwgfwngzyinx caeuq lwgfwngzgyang fwngzgvaz, roengzrengz giemz baihlaeng de.

(caengz sat)