“Lauxsae, gou yaek gyahaeuj Cunghgoz Gungcanjdangj!” Neix dwg diuz saenqsik dah hagseng ngamq bizyez mbouj geij nanz haenx fat hawj gou. Yawj daengz diuz saenqsik neix le, gou ndawsim roxnyinh soengset lo, dah neix cingqcaen majhung lo!

Dah neix dwg Siujdoengz. Sam bi gaxgonq, Siujdoengz daj gizgyae daeuj daengz aen hagdangz dou, faen haeuj aen ban gou. Haihag ngamq singhgiz lai, miz haemh ndeu gou bae caz suzse, byaij gvaq suzse Siujdoengz seiz, yawjraen bouxguenjsuzse hix youq ndawde, cingq caeuq Siujdoengz gangj maz, hoeng gou daengz le gyoengqde couh mbouj caiq gangj lo. Gou cam bouxguenjsuzse miz maz saeh, de cix gangj mbouj miz maz la, gaenq gaijgez lo. Gvaqlaeng boux- guenjsuzse cij naeuz gou nyi, dwg Siujdoengz youq suzse citien, deng de gaebdawz, mboujgvaq Siujdoengz nyinhloek gig vaiq, caiq dwg baez daih’it famh saeh, ndigah boux- guenjsuzse hawj Siujdoengz baez gihvei gaij loek ndeu, couh mbouj dangqnaj de naeuz gou nyi gienh saeh neix.

Rox yienghneix le, gou couh cang baenz mbouj rox gienh saeh neix, doeklaeng cix lai haeujsim de. Daj denva hawj bohmeh de cam gij cingzgvang gaxgonq de, ndaej rox de doeg cuhcungh seiz couh caeuq gyoengq doengzhag hag citien, lij caeuq bohmeh doxdingj, bohmeh gangj maz mbouj hab’eiq couh deuz okrog bae mbouj maranz.

Gou lij ndaej rox de haengj ciengq go, ciengq ndaej mbouj loek, ndigah gou hawj de dang vwnzyi veijyenz ndaw ban, de hix doengzeiq lo. Mbouj geij nanz, gou youq ndaw ban hai aen banhoih “Gyo’mbaiq Aencingz Bohmeh”, iu mbangj gyah- cangj daeuj camgya. Gyoengq doengzhag ranz gyae gyahcangj daeuj mbouj ndaej, couh hawj gyahcangj fat vahdaengq loegyaem roxnaeuz fat saenqsik daeuj hawj gou. Daengz seiz haihoih, gou couh ingjboq gij siengq seiziq gyoengq hagseng, boq gij loegyaem gyahcangj roxnaeuz doeg gij saenqsik gyahcangj hawj hagseng dingq. Doenghgij neix gyoengq hagseng cungj gig ngeix mbouj daengz, ndigah gyoengqde gamj- doengh raixcaix, haujlai hagseng cungj lae raemxda daejfwtfwt. Seiz- haenx Siujdoengz ndwn youq dangqnaj caezgya, daejsaekwk gangj gij saeh swhgeij youq cuhcungh baenzlawz mbouj dingqgangj, de roxnyinh swh- geij mbouj roxsoq, hawj bohmeh siengsim lai lo……

Daj seizhaenx hwnj, gou roxnyinh Siujdoengz roxsoq lai lo, guh saeh haemq gaenx, cingzcik hix yied ndaej yied ndei. Gou hix ciengzseiz gangj gij saeh Siujdoengz hawj bohmeh de nyi, caezsim son’gyauq de.

Aen yozgiz daihngeih miz haemh ndeu, gou ra Siujdoengz damzsim, gangj yaep ndeu le, de gag haibak naeuz gou nyi:“Lauxsae ha, mwh ngamq daeuj hagdangz raeuz seiz, gou dwg dajsuenq lujlaj myonx gvaq song sam bi, hoeng dingq lauxsae gangj haujlai dauhleix, hix yawj haujlai saw le, gij siengjfap gou bienq lo, gou yaek haenqrengz gauj hwnj daihhag!” Gou dingq le, roxnyinh de gangj ndaej gig nyinhcaen, mbouj dwg gangjriu ndwi, couh caiq caeuq de gangj ngoenzlaeng baenzlawz bae hag, de dingq ndaej gig haeujsim.

Bi ndeu song bi, ndwenngoenz gvaq ndaej gig vaiq, Siujdoengz haeuj hag gaenq song bi lai. Yienznaeuz de mbangj baez hix guhloek, hoeng de gaenq dwg boux hagseng gig maenh- ak ndeu, cingzcik baujciz ndaw ban daihcib mingz gaxgonq, dwg ndaw hag “Cib Daih Gohsouj” “Daihvuengz Danz Ganghgimz” “Daihvuengz Gangjgoj” daengjdaengj. Miz maz doxdax de cungj gaenxmaenx camgya. Mwhhaenx ndaw hag banh aen doxdax “Cuengq Sing Doeg Sawcuengh”, Siujdoengz yienznaeuz mbouj rox gangj Vahcuengh, hoeng de hix bauqmingz camgya. Aenvih ndaw ban miz seiq boux hagseng bauqmingz, hoeng aen ban cij ndaej hawj song boux camgya, Siujdoengz youh mbouj rox gangj Vahcuengh, ndigah gou mbouj daiq yawjnaek de geijlai, son sam boux wnq gonq. Byawz rox Siujdoengz haeujsim raixcaix, de haethaemh cungj heuh boux doenghag rox gangj Vahcuengh daeuj son de doeg, rox doeg di le caiq daeuj doeg hawj gou dingq. Gou baez dingq le, raen gig ndei, engq haeujsim son de lo. Siujdoengz haengj hag gaenx lienh, cinbu gig vaiq, doeklaeng camgya aen doxdax neix ndaej mingz daihngeih. Yaek senj hagseng bae ndaw gih camgya doxdax seiz, gou gietdingh senj de camgya. Aenvih de haengj hag youh buekguh, hawj gou gig miz saenqsim. Dahraix, de mbouj hawj gou saetnaj, aeu ndaej ndaw gih doxdax it daengjciengj.

Siujdoengz doiq swhgeij ngoenz beij ngoenz miz saenqsim lo. Doek- laeng aen haggeiz, de gietdingh aeu gauj hwnj aenhag bwnjgoh. De gangj daengz guh daengz, engqgya haeujsim gaenx hag gaenx lienh, buek hag song ndwen lai, de swnhleih gauj hwnj aenhag bwnjgoh……

Seizneix, Siujdoengz haeuj daih- hag ngamq ndaej ndwen lai, diuz saenqsik hainduj gou dwen de couh fat daeuj hawj gou lo. Siujdoengz, gou raen mwngz cingqcaen majhung lo! Muengh mwngz riengz diuz roen cingqcup neix byaij bae engq gyae, mbin ndaej engq sang!