Gak dieg cungj miz gijgwn cienzdoengj de, gij feihdauh sugseg haenx hawj vunz caenh ngeix daengz saeh gaeuq、baengzyoux gaeuq caeuq ranzmbanj. Et（ceiz）dwg cungj gijgwn aeu haeuxcid guh de, vunz Bwzhaij gig maij gwn. Laeng Bwzhaij miz lai cungj lai yiengh et, lumjbaenz etloengzhung、etndaij、etraemx、et gaeuroetma、ethaeuxfiengj、etsieg、ethau daengj. Ndwenngoenz raezrangrang, et vwnzva caeuq vahdoj diegde itheij bienqbaenz cungj geiqhauh vwnzva it yienh sam gih Bwzhaij.

Etloengzhung itbuen gvaq cieng cij guh, de yungh liuh genjdanh, cawjdaeuz dwg mba haeuxcid、dangznding、lwgraz caeuq makcauj hoengz. Geijlai mba gyaux geijlai dangznding、naengj geijlai nanz、seizlawz dwk feizhaenq seizlawz dwk feizduemh cungj aeu habngamj. Vunz Bwzhaij maij gwn etloengzhung, mboujdan dwg aenvih de ndeigwn, engq aenvih de daibyauj gitleih. Dangznding dwg muengh ndwenngoenz engq diemzvan, makcauj dwg nyienh saedceij hoengh- hwdhwd, lwgraz dwg naeuz saehnieb、hagsib yied guh yied ndei、yied ngoenz yied baenz. Gvaq cieng caemh mbouj ndaej noix etndaij. Mba mbawndaij caeuq mba haeuxcid doxgyaux, hoed raemxndaengq cai guh baenz ngauq, mbit baenz gaiq baenz gaiq iq, aeu duhheu、lwgraz、seiyehswj daengj guh myonz, baenj ok aenaen luenzled heumyox ndeiyawj, baihlaj demh mbawfaex, roengz rek naengj cibhaj faencung. Naengj cug le, saek de couh bienq saek heundaem, heiq homfwd, vunzlai maij aeu bae soengq beixnuengx baengzyoux.

Vunz Bwzhaij haengj gwn raemxdangz, raemxdangz et gaeuroetma couhdwg ndawde cungj ndeu. Itbuen aeu dangznding、hing caeuq et gaeuroetma itheij cawj, couh ndaej cawj ok vanj raemxdangz unqnupnup rangdiemz daeuj lo. Et gaeuroetma dwg aeu mbaw gaeuroetma gyaux haeuxcid san, muh baenz mba ma guh et. Ranghdieg Hozbuj riuz miz aen goj ndeu: Cienznaeuz ciuhgeq, Hozbuj dumdeng miz binghraq, haujlai vunz cungj baenzbingh, canghyw dieg de cungj ra mbouj ok saekdi banhfap. Ngoenz sam nyied cosam, miz boux ndeu dingjlingz aeu gaeuroetma dub soiq le guh baenz gijgwn faen hawj daihgya gwn, mbouj liuh daengz vunzlai gwn le bingh couh ndei lo. Ndigah vunz dieg de youq liggaeuq sam nyied cosam couh gwn gvenq et gaeuroetma.

Gyauzgangj Cin miz diuz haw heuhguh Haw Etcaij, gai miz haujlai cungj et, ndawde ethau ceiq ciengz raen. Gyanghwnz gaeq ngamq haen sam sauh, sing muhraemx couh yiengjnyegnyeg cienzok luengqhongh daeuj, bouxdajgai gaenq nyaengq guh et lo. Aeu feizhaenq naengj cieng haeuxcid, cug le cuengq di mba haenxcid caeuq gaenx, gaenx guh baenzngauq, naeng baihrog couh guhbaenz lo, doeklaeng baenj guh baenz aen baenz aen iq suek myonz couh ndaej lo.

Etraemx dwg gij daibyauj Nanzgangh Cin. Gij dinfwngz guh etraemx Nanzgangh dwg cungj feihvuzciz vwnzva yizcanj Bwzhaij Si, vunz Nanzgangh gangj daengz de cungj gag roxnyinh gig miznaj. Laeng Gunghgvanj Cin, etraemx lawh le yienghmoq youh vuenh coh moq, heuhguh etgoemj. Caeuq guh etraemx doxdoengz, etgoemj caemh aeu cienghaeux naengj baenz, rwed caengz cienghaeux youh goemj fa naengj baez ndeu, baedauq guh baenz geij mbat, caiq bu caengz gungqhaij、ganhbei daengj huqhaij caeuq raetmoegngaex nanwt ndeu gvaq baihgwn bae caeuq naengj, neix couhdwg etgoemj lo.

Daj et iqet neix couh yawjok gij vwnzva caeuq fungsug gak dieg laeng Bwzhaij loq mbouj doxdoengz. Mbouj naeuz dwg mbouj dwg huqcaen、cingqmaek mbouj cingqmaek, gak cungj et feihdauh gak mbouj doengz, doxcaez langhbaij gij vwnzva Bwzhaij. Doiq boux daj iq couh youq giz de majhung haenx ma gangj, et mboujdan dwg cungj gijgwn, engq dwg cungj feihdauh Bwzhaij、feihdauh ranzmbanj, geiq youq uk vunz Bwzhaij gig laeg.

（Gij swhliu caeuq doz daj gwnzmuengx aeu）