Raeuz rox, bouxvunz haeujninz noix mbouj ndaej swiz, aen swiz gvangq raez sang daemq, caih gak boux gag maij, gak boux gag yungh.

Ciuhgeq miz swizrin、swiznyawh、swizmeng、swizfaex, seizneix miz swizfaiq、swizbaengz、swiznaeng、swizhaijmenz.

Seizgonq daih bouhfaenh dwg aen swizdog, gak boux gag demh ninz, seizneix mboujdan miz swizdog hawj boux ndeu yungh, lij miz swizraez hawj song boux doengz demh ninz. Swiz lai ndaej vava loegloeg, gak saek gak yiengh.

Gou gaenq geiq mbouj ndaej, daj iq daengz hung gou gaenq vuenh gvaq geijlai aen swiz, hoeng gou geiq ndaej gig maenh, daxgoeng gou daj coux daxbuz le, de daengz dai couh yungh aen swizfaex ndeu.

Aen swizfaex daxgoeng miz cik lai raez, couhdwg samcib goengfaen baedauq, sang lumj aen gaemxgienz bouxlaux nei, gvangq caeuq fajfwngz bouxlaux ca mbouj geijlai.

Aen swizfaex daxgoeng aeu faexyienq guh baenz, naekngwtngwt, song gyaeuj loq sang, cungqgyang loq gumz, deng daxgoeng ninz ndaej wenjmyegmyeg.

Dingq naeuz daxgoeng lij coz seiz dwg aeu aen swizfiengz he daeuj demh ninz. Seizhaenx hoj lai, yienghyiengh mbouj miz, bi daengz seiz sou haeux, daxgoeng couh sou fiengz gvaqdaeuj, dak sauj bae, aeu gij fiengz dak sauj daeuj san baenz daengqfiengz、haiz- fiengz、swizfiengz.

Swizfiengz demh ninz hozndoenj nyap, doengxhaemh yaek haeujninz, daxgoeng couh duet geu buh gwnz ndang roengzdaeuj bu daengz gwnz swizfiengz bae cij ndaej demh ninz. Ninz nanz le, swizfiengz rox fat mwt, bi aeu vuenh geij baez cij ndaej.

Daxgoeng rox swizfaex ndei yungh, hoeng yaek guh aen swizfaex ndeu mbouj yungzheih. Aeu miz faggawq gawq faex hung baenz donh, caiq aeu fagfangq daeuj bauz wenj bae. Ndaw mbanj mbouj miz faggawq fagfangq, yaek guh swizfaex aeu dawz faex daengz gwnz haw bae hawj vunz guh. Yienghneix aeu yungh ngaenz, ranz liz haw youh gyae, daxgoeng mbouj miz ngaenz, cij ndei ninz swizfiengz lo.

Miz vunz sawq(gaisau) dahsau mbanjnden hawj daeg hujgeiq dax- goeng, hujgeiq bae cim dahsau seiz heuh daxgoeng buenx de bae. Caen dwg miz sim ndaem faex faex mbouj maj, fouz sim baek va va gag hai. Daxgoeng caeuq dahsau baez doxraen, song boux couh doxgyaez hwnjdaeuj, daxgoeng naeuz itdingh aeu dahsau guh maex, dahsau hix naeuz itdingh aeu haq hawj daxgoeng, loengh ndaej daeg hujgeiq lij caengz ndaej caeuq dahsau gangj saek coenz vah, couh dauqranz lo.

Daxgoeng coux daxbuz seiz, daxbuz daiq daeuj aen gvih ndeu、aen sieng ndeu、roek doiq haizbaengz、song fan denz caeuq aen swizfaex ndeu.

couhdwg soengq hawj daxgoeng.

Swizfaex moqsakasak, daxgoeng vuenh deuz aen swizfiengz de lo, hainduj ninz swizfaex mbouj sibgvenq, haujlai hwnz ninz mbouj net.

Daj mbouj sibgvenq daengz sibgvenq, swizfaex couh yienghneix buenx daxgoeng gvaq saedceij.

Daxbuz haq gvaqdaeuj le, hong- reih hongranz de ganq guh, baez daengz seizhoengq, de couh guh faiq daemjbaengz, ndawranz miz gwn miz daenj, saedceij ngoenz beij ngoenz ndei.

Mbouj rox daj seizlawz hwnj, daxgoeng caegcaeg cit iennaez. Daxgoeng gyaez aeu swizfaex demh gyaeuj, ninzngeng youq gwnz congz, gag cit iennaez fefe faenh de.

Seng daxboh gou gvaq le, daxgoeng couh gig noix bae guhhong, daxbuz ciengx lwg youh ganq reihnaz, baeg laemx lo, caiq hix hwnq mbouj ndaej.

Daxgoeng doeksaet lo, aen uk- gyaeuj ngunhngwdngwd singjdauq lo, de mbouj caiq cit iennaez, hainduj okbae guhhong caeuq guenj hongranz. Hoeng ceiz gvaq, bi he ngamqngamq haeuj doeng, daxbuz dai lo, daxbuz seiqcib ngeih bi, vunz lij coz, couh yienghneix mbouj miz lo, cuengq seiq boux lwg hawj daxgoeng.

Guh hongreih, daxgoeng ganq ndaej laemx hoemj laemx hai, ndaw- ranz haj boux vunz aeu gwn, seiq boux caengz rox guhhong, daxgoeng ienq goek youh ienq mingh.

Doengxhaemh haeujninz, dax- goeng cungj dwg lumhlumh aen swizfaex geij baez, de aiq dwg naemj daengz daxbuz lo. Seizneix mbouj miz daxbuz, cij miz aen swizfaex neix buenx de.

Lwg majhung le, daxgoeng hix geq lo, song da ciemhciemh miz di laz. Dingq vunz naeuz, aeu cehyiengzmbeq daeuj guh swiz demh ninz ndaej yw dalaz. Daxboh geij beixnuengx couh hwnj bya gvaq ndoi bae ra ceh- yiengzmbeq, ra ndaej le, dak sauj, aeu daehbaengz cang ndei, couh dawz bae hawj daxgoeng guh swiz demh ninz.

Cehyiengzmbeq naed iq, raeuz- retret, aeu daeuj guh swiz demh ninz unq lai, aen gyaeuj baez cuengq daengz gwnz swiz, aen swiz couh gumz roengzbae, dawz aen hoz gab dwk, daxgoeng naeuz yienghneix ninz mbouj soeng, lij dwg swizfaex ndei. De cij ninz geij haemh, couh dawz aen swiz cehyiengzmbeq cuengq gvaq henz bae, ciuqgaeuq aeu swizfaex daeuj demh ninz.

Faex laux rag nye nduk, vunz geq ukgyaeuj vaih. Daxgoeng caetcib lai bi seiz, ukgyaeuj couh mbouj daih singj lo, raeuz gangj neix de gangj haenx, mbouj miz geijlai coenz baenz vah. Miz vunz naeuz, bouxgeq miz yiengh baenzneix, aeu megsan daeuj guh swiz hawj de demh ninz couh ndaej bienq ndei di. Dieg dou youq ndaw rungh, mbouj miz gomeg, daxboh gou couh dawz haeuxyangz daengz gwnz haw bae caeuq vunz vuenh aeu megsan.

Daxboh aeu megsan guh baenz aen swiz ndeu, soengq hawj daxgoeng demh ninz. Daxgoeng cij ninz geij haemh, naeuz aen swiz nyap lai, mbouj caiq ninz swiz megsan lo, de naeuz lij dwg aen swizfaex ndei haeujninz.

Saedceij ciemh ngoenz ciemh ndei lo, daxgoeng dauqfanj ndang roengz bingh lo, de yied ngoenz yied ndwn mbouj hwnq, yied ngoenz yied gwn mbouj ndaej, aen ndangdaej de ngoenz beij ngoenz roz.

Gyoengq daxboh lau daxgoeng ninz mbouj onj, couh bae haw cawx aen swizfaiq he hawj daxgoeng demh ninz, muengh daxgoeng ninz ndaej onj, bingh vaiqdi ndei.

Daxgoeng ninz youq gwnz congz gyangznaek mbouj dingz, gyoengq beixnuengx、gyoengq baengzyoux daeuj yawj de, cam de lij roxnaj bouxlawz caeuq bouxlawz dem lwi. Daxgoeng mbouj hai da, hix mbouj hoiz vah, yienghneix gvaq le sam seiq ngoenz, daxgoeng caem roengzdaeuj lo, ndang iet sohnongnong, gen ga hix mbouj doengh lo, yawj daeuj vunz gaenq dai gvaq, hoeng song da lij ronghrikrik.

Miz vunz naeuz, bouxvunz yienghneix, mbouj ndaej ce ndaw rug, aeu dawz daengz roggai(dingdangz) bae, yienghneix de couh yungzheih laep da gvaqbae lo. Gyoengqvunz ram daxgoeng daengz roggai(dingdangz), daxgoeng ngoenz daih’it dwg yiengh- gaeuq, ngoenz daihngeih lij dwg yienghgaeuq.

Miz vunz naeuz, daxgoeng aiq dwg caj auseiq dauqma cij laep da bw. Auseiq youq baihrog dangbing, lij caengz ganj dauq daengz baenz vaiq. Caj auseiq dauq daengz, daxgoeng lijdwg song da mbouj laep.

Gyoengqvunz ndawranz youh bae heuh bohnax gvaqdaeuj, bohnax daeuj daengz le, boemz youq bien ndang daxgoeng, sing saeq naeuz:“Go, gou daeuj daengz lo, deuz ngoenz dai mbouj gvaq, deuz ngoenz haq mbouj mienx, mwngz onjsim bae faenh mwngz ba!”

Daxgoeng lij mbouj laep da, gyoengqvunz ndawranz humx youq henz ndang de, mbouj miz saekdi banhfap.

Gyoengq vunzmbanj cungj naeuz, daxgoeng itdingh lij caj aeu maz doxgaiq, roxnaeuz caj raen bouxlawz cij bae yaem.

Ngoenz ndeu banhaemh, mehgux haeuj rug bae, dawz aen swizfaex daxgoeng okdaeuj, cuengq daengz bien ndang de bae, daxgoeng fwngz baez doengh, dawz aen swizfaex got gvaqbae, yaep he, de laep da dai bae lo.

Bihaenx, daxgoeng ndaej betcib roek bi.