Ngeihcib sigij roek caetcib nienzdaih, gij gisuz ywbingh Gvangjsih doeklaeng gvaq vunz、mbouj miz vunzcaiz、vunzlai yawjbingh gig hoj. Seizde, it cien gouj bak boux “canghyw Denhcinh”caeuq bet cien boux vunz ndawranz gyoengqde gaenxmaenx yangjying aendangj caeuq guekgya ciuheuh, daeuj coengh Gvangjsih. Gyoengqde buet daengz Gvangjsih bet dieg caetcib sam aen yienh it bak caetcib roek aen gunghse veiswnghyen baihgyae bae, bang vunzlai gak minzcuz yawjbingh、ywbingh, raizok aenaen gojgaeq fouzsei okrengz、gamjdoengh vunz.

Boux Ciengxlwenx Ndwn Dwk

Canghyw Goh Dwzlinz youq Sinjyangz Yihyozyen bizyez, mwh camgya aen doih ywbingh coengh Gvangjsih seiz gaenq ndaej hajcib haj bi lo, youh dwg bouxgyausou. Hoeng, de caeuq yah de rox le couh bauqmingz daeuj Gveibingz Yen Mungzhih Veiswnghyen giz youh rungh youh yaez de caeuq vunzlai yawjbingh. Aenvih gisuz de ak lai, bi 1972, de couh deng diuh daengz Gvangjsih Yihyozyen Fusuz Yihyen guh bouxcujyin Yenjgoh Gyau- yenzbu. Betcib nienzdaih cogeiz, guekgya ok le gij cwngcwz mizgven, gvanhbaz neix bonjlaiz ndaej ma Denhcinh, hoeng songde sij mbouj ndaej vunzlai gak minzcuz dieg neix, couh louz roengzdaeuj, laebdaeb okrengz coengh gih raeuz. Bi 1994, Goh gyausou aenvih uk oklwed gvaqseiq lo, de louz le vahdaengq: Gij biubonj sei goet vunz noix lai, swhgeij dai le couh gien gij sei goet bae guh yihyoz yenzgiu, neix dwg swhgeij baez gatsat vih Gvangjsih okrengz lo. Seizneix, gij biubonj sei goet Goh gyausou lij “ndwn” youq ndaw Gvangjsih Yihgoh Dayoz Swnghming Gohyozgvanj. Ndigah, bouxgyausou Goh Dwzlinz caemh deng vunz heuhguh “boux ciengx- lwenx ndwn dwk”.

（1）