Conghroengj Ginhlunz youq laeng baih- saebaek Yangzhih Cin Majsanh Yen, dwg aenvih rinhoi lajnamh deng raemxlajnamh cimqmyaex le couh bienqbaenz de, caemh dwg cungj gingjsaek laeng dieg gahswhdwz gak miz haenx, vunz heuhguh conghroengj、conghlaeuh roxnaeuz conghndoet. Conghroengj Ginhlunz dwg giz dieg gahswhdwz gih raeuz ndawde conghroengj ceiq hung、ceiq laeg、ceiq raez ndeu.

Gij coh Conghroengj Ginhlunz daj gij goj bouxyinghyungz Bouxcuengh Veiz Ginhlunz daeuj. Gij goj de riuzcienz youq ranghdieg Majsanh、Vujmingz、Duh’anh、Sanglinz. Cienznaeuz, de doekseng seiz, fajnaj youh luenz youh haengz, lumj daengngoenz haetromh, ndigah bohmeh couh an coh de guh “金轮”, doeklaeng vunzlai heuh de guh “金伦” gvenq bae. Daeg Ginhlunz majhung lo, couh bae doegsaw lo. Hagdangz ndawmbanj iq lai, de couh caeuq bouxdoih daengz conghroengj de fatyienh haenx bae doegsaw. Ngoenz ndeu, bouxlauxsae daiq gyoengqde youz conghroengj, Ginhlunz byaij youq gajlaeng, de yawjraen gingjsaek ndei lai, couh dingz le saek yaep, byawz rox de doq lotdoih lo, cix ra mbouj raen roen. Doeklaeng de bungz daengz goenglaux saenzsien ndeu, boux de soengq le buh gim、anmax gim、bien gim caeuq duz maxsien gwnzgyaeuj miz gaeu ndeu, caiq son de baenzlawz guenj ndei guekgya、daiqbing hoenxciengq. Gajlaeng Ginhlunz gauj ndaej goengmingz caiq guh le hak hung, hoeng, de lij dawz gij haemzhoj vunzlai ranzmbanj haeujsim, fad bouxrwix、haenh bouxndei, vunzlai cungj fug de. Mboujliuh vuengzdaeq caeuq gyoengq caenzrwix cungj nyinhnaeuz de dwg “bouxuk- bieng”, couh gajgak de. Ginhlunz dai le couh bienqbaenz bouxsaenz, ndang longz buh gim、fwng gaem bien gim、naengh anmax gim、gwih maxsien, dwk dai gij bing vuengzdaeq caeuq gyoengq caenzrwix baij daengz Mbanjcuengh guhyak haenx liux le couh mbin deuz lo. Baezlaeng Mbanjcuengh miz nanh, Ginhlunz cungj okdaeuj bangcoengh.

Bi 1987 ndwen cibngeih, aen doih congh- roengj cien’gya laeng Yinghgoz daeuj Conghroengj Ginhlunz, gaujcaz le ngeihcib caet ngoenz, lwnhcingq congh de dwg seiqgyaiq cib congh roengj （gamj）mizmingz ndawde aen ndeu. Yaek byaij liux Conghroengj Ginhlunz cix aeu byaij baenz cib goengleix, con gvaq cibngeih goengq bya. Ndaw roengj cangzlangz mboujduenh iet baenaj, mbangj diuz roen sohrangrang, lumjbaenz diuz loh bakdah ndaej hai ci iq, mbangj cix ngutraurau, yawj mbouj raen gyaeuj. Saek bak aen ding hunghung iqiq, aen ceiq hung ndeu miz sam diemj haj fanh bingzfuengmij hung. Song diuz cimrin ceiq hung de miz ngeihcib roek mij sang, dingjroengj ceiq sang miz itbak hajcib mij. Youq baihnamz gig noix raen cungj ding conghroengj hunghung gvangqgvangq neix. Gij rin ndaw conghroengj lai cungj lai yiengh, gizgiz miz saeurin、varin、makrin、doenghduz rin daengj daengjsoengz、venj dauqdingq, lumj byaleix diuq dan、duzlingz vax ronghndwen、canghdwkbya epbya daengj, lumj yiengh caen de nei, daj baihgyae yawj gvaqbae, gig hungmbwk. Bouxboux yawjraen cungj haenh mbouj dingz.

Raemx daj ndaw rin riuz okdaeuj, bienqbaenz diuz dah, mbangj mwnq caenh baez deu de, couh ndaej cauh ruz nyig dah yawj gingjsaek lo. Diuz dah lajnamh riuz dwk numqnumq, lumj aengingq nei, ingj ok aen seiqgyaiq daejhaij、lungzgungh caeuq lueg hung daeuj, gij gingjsaek neix lajmbwn cungj noix miz ha. Byaij youq ndaw conghroengj, mwngz couh nyaenx mbouj ndaej danq swhyienz baenzneix ak, ndaej cauh ok cungj gingjsaek gyaeundei neix daeuj, hawj hekyouz mboujsij dauqma.