Sam

Mbouj geij nanz, Luz Swnh ra ndaej hong guh lo. De youq aen cangj rog singz baihnamz hwnjban duenh seizgan he, hix siengj banhfap bang Hij Gangh haeuj cangj bae hwnjban. De naeuz ra seizgan gaisau Hij Gangh hawj fucangjcangj guenj ciu vunz raen baez he, gwn donq caz he.

Ciuq sibgvenq bonjdieg, yienz- naeuz gangj dwg gwn caz, gizsaed dwg bae dan siuyeh baij geij aen daiz iq seiqfueng he, daihgya humx naengh itheij, geij deb cehgve、 dangznohmak、mak soemj、raemxmak、ceuj duzsae caeuq baenz roix baenz roix huq gangq, ndi geij daj laeujbizciuj couh gwn lo. Daihgya miz gangj miz riu, maz ngamj gwn couh gwn, doq gwn doq caimax roxnaeuz dwkbej guhcaemz, soengswt youh nauhyied. Cungj dan siuyeh neix hai ndaej rim gai rim hongh. Neix dwg cungj fuengsik doxgyau ceiq hwng ndaw singz, bouxlaux bouxcoz cungj ngamj.

Haemh haenx, Hij Gangh cingj hek, Luz Swnh cingj fucangjcangj okdaeuj, baihlaeng lij gaen miz dahsau gyaeundei ndeu dem.

Fucangjcangj gaisau naeuz:“Dah neix dwg Liuz cujyin, gou okdaeuj seiz ngamq bungz de roengzban, couh iu de caez daeuj lo.” Song bouxcoz cungj angqvauvau. Hij Gangh baez yawj dah neix simva couh hai lo, gag ngeix: Danghnaeuz ndaej haeuj cangj neix guhhong, youh aeu ndaej dah coeng- mingz gyaeundei neix guh youx, couh baenz lai lo!

Gwn caz seiz, fucangjcangj hix rox gij eiqsei Hij Gangh. De raen Luz Swnh gaenx guh lauxsaed, nyinhnaeuz baengzyoux de hix wnggai dwg yienghneix, mbouj geij nanz, ndaw cangj ciu vunz, dingjlingz Hij Gangh hix biujyienh gig ndei, ndigah couh raemx daengz mieng baenz, ndaej haeuj cangj bae lo.

Vunz bungz saeh ndei sim hailangh. Saeh neix hawj Laux Hij rox le, couh sikhaek gaj gaeq angqhoh. Hwnjyieng baiq cojcoeng seiz, ndaw bak de lij nambedbed:“Docih coj- coeng baujyouh Daeggangh ra ndaej hong ndei, mbouj you gwn lo! Gouz cojcoeng laebdaeb baujyouh, hawj de vaiqdi baenzranz, hawj raeuz dem bak dem vunz bw!”

Haeuj cangj guhhong le, Hij Gangh couh hainduj gyaepgouz Liuz cujyin, ciengzseiz doxiu de bae dieggyaeu liuh.

Liuz cujyin naj hoengz ndang sang, couhcinj mbouj daenj haizsang, caeuq Hij Gangh caez byaij cungj sang gvaq de bae. Dah neix yiemz Hij Gangh daemq lai, de maij bouxcoz ndang maengh sangseuq. Baez siengj daengz bouxcoz baenzmbauq haenx, de couh gag launyaenq, naj fwt hoengzfwgfwg.

Hij Gangh raen dah henz ndang riu ndaej baenz dwggyaez, dauq laihnaeuz dwg dah neix doiq de simdoengh lo, couh fwt dawz de got haeuj rungj daeuj.

Liuz cujyin doeksaetyat, aek byau de deng got ndaej dingj haeuj aek Hij Gangh bae gig hojsouh. De sikhaek yung mbaq hwnjdaeuj, suk song fwngz bae doi Hij Gangh, riengjvaiq buetdeuz lo. Cij lw Hij Gangh boux dog ndwn youq laj ndithaemh. Gij ndithaemh daj ndaw fwj camx okdaeuj camz haeuj ndaw sim de, in dangqmaz.

Ngoenz daihngeih, Liuz cujyin hawj Hij Gangh fung saenq he. Hij Gangh laihnaeuz dwg saenqyoux, ndawsim gikdoengh dangqmaz. Gaenjgip mbehai saeqsim yawj——

Daeggangh, duenh neix gou nyinhcaen siengj haujlai nanz，raeuz caen mbouj ngamj. Cingj mwngz vaiqdi doiq gou sou sim, lingh ra dah wnq bw!

Mwhhaenx, Hij Gangh lumj deng byaj bag nei, gyad roengz gwnzdieg, daengx ndang mazmwnh liux.

Seiq

Ngoenz gvaq lumj mbin, mbouj rox mbouj nyinh couh daengz seizcou lo. Bi 2000 laebcou ngamq gvaq, aen ranz moq Luz Swnh guh baenz lo. Doengh laeuz neix miz sam fungh song caengz, mwhde dwg ndaw mbanj doengh laeuz ceiq gyaqciq. Vihliux fuengbienh hwnj ranz ci hung haeujok yinh caizliuh, Laux Luz couh doi duenh ciengzcab ndeu bae. Caj ranz sat hong le cij lingh yawj ngoenzndei guh bakgvaengh moq.

Laux Hij raen daengz neix, ndaw hoz youh miz naemj lo. De siengj heuh Laux Luz dawz bakgvaengh moq doenq roengz baihlaj geij mij bae. Aenvih canghsuenqmingh hix gangj gvaq, song bakgvaengh gaenh benz ciggak, song ranz yungzheih doxceng, saedceij gvaq mbouj ndaej onj.

Hoeng, gaxgonq Laux Hij gaenq caeg gawq gorenh bae gai, caeuq Laux Luz mbouj doxndei, baenzlawz haibak cij ndei ni? Saeh neix aeu menh guh cij ndaej.

Ngoenz ndeu, ndaw cangj cuengqgyaj, Luz Swnh couh iu gyoengq doengzsaeh baengzyoux daeuj ranz moq gwn ngaiz gwn laeuj, hawj ndawranz dem raeuj.

Siengj daengz daxboh caeuq Laux Hij ngeuxgeuz gvaq, couh mbouj heuh Hij Gangh gvaqdaeuj, mienx ndaej youh doxceng saetnaj lai.

Mwh daihgya cingq caimax ndoet laeuj ceiq yinxdaeuz seiz, Hij Gangh gyajcang hujdengdeng ndwn youq bakdou naeuz:“O, baenz lo, miz gwn hix mbouj heuh gou bw!” Gyoengq- vunz cungj riuhaha, angqvauvau rag de naengh congz caez gwn laeuj.

Sawqmwh, Hij Gangh raen Liuz cujyin hix youq doiqnaj, caeuq Luz Swnh doxgap gwn laeuj, songde lumj mbouj miz vunz nei miz gangj miz riu.

“Hw! Miz laeuj gwn mbouj heuh gou, vanzlij caeuq Liuz cujyin…… Gou gingqyienz dang de guh laux- doengz, vanzlij cingj laeuj boizleix dem! Hw! Gou caen dafangz!” Hij Gangh siengj daengz neix fwt ndwn hwnjdaeuj, hujdengdeng yamq din gvaq ranz bae lo.

Laux Hij raen daeglwg yiengh- neix dauqma, ndaw hoz hix rox lo. “Caen dwg aen mbwn miz lwgda, gihvei daengz lo!” De aeu yungh daeghuk neix cijndaej lo.

“Hw! Cij rox hozgaed, mbouj rox fanjdwk, miz maz yungh?” Laux Hij gik Hij Gangh. De laebdaeb naeuz, “de angj hwnq laeuz moq, hangz vunz lai, raeuz couh aeu cien gyaz dou de, yawj songde lij daekeiq lwi?”

Caen dahraix, Hij Gangh sikhaek cung bae rag ok cifanhdouj cung daengz henz doi cien, “dung” sing he dingz ci roengzdaeuj, couh dawz gij cien vang’vang sohsoh “dungdung dangdang” vut roengz cifanhdouj bae. Cang rim couh doi bae boeg roengz bakgvaengh ranz Luz Swnh bae, lumj yaek aeu boeg gij simfanz swhgeij bae nei. Laux Hij doq cit ien doq youq ndaw hoz caegriu.

“Daeggangh, mwngz vihmaz gyaz dou ha?” Daxmeh Luz Swnh gyaegyae hemq naeuz.

“Gou couh yienghneix gyaz dou, heuh lwg mwngz ciengj vunz gou bae?” Hij Gangh gangj sat youh hujdengdeng doiq aen cifanhdouj bae rag cien.

Gyoengq baengzyoux doengzsaeh cungj okdaeuj gienq Hij Gangh mbouj ndaej baenzneix guh. De cij ndatheiq cung haeuj ranz bae “dung” sing he gven dou lo. Mbouj geij nanz, daihgya couh laebdaeb gvaengz doi cien haenx okbae lo.

Ngoenz daihngeih, Luz Swnh yaek bae hwnjban seiz, duz ma laux ndeu daj doi cien haenx cung okdaeuj raeuq mbouj dingz. Duz ma haenx fajnaeng duk ndok, byombyatmbat, song da doeddedded, gij heuj ma youh hung youh raez, lumj yaek gwn vunz nei.

“Ma dai mwngz! Luenh raeuq maz? Faexsaux moeb mwngz bw!” Luz Swnh sing hung rongx. Duz ma lij “w, w, w……” mbouj dingz.

“Moeb ma lij yawj bouxcawj, ndaek lawz youq gizneix luenh raeuq?” Sing gangj vah daj ndaw bakgvaengh ranz Hij Gangh cienz okdaeuj. Luengq dou baihlaeng song da caengz beij duzma engq dwglau.

“Daxboh, gaej nauh lo! Mwngz yied laux yied ngoengqloengz bw!” Hij Gangh daj ndawranz doi danci okdaeuj ndaq Laux Hij.

De youh sing hung maenj duz ma haenx:“Lij miz mwngz, ma baengh bouxcawj! Haeuj ranz bae!” Duz ma sikhaek suk gyaeuj roengz laeng din, baet diuz rieng ndoqndangndang buetdeuz lo. Cij lw Laux Hij bak- ajsaengx ndwn youq gizde.

Hij Gangh ga gvaz hamj gvaq danci, “dingjlingj” ngauz lingz song sing, coh Luz Swnh baez ngiengx hangz, yaepda heuh Luz Swnh caez bae hwnjban.

Song bouxcoz itloh gwih danci, byawz cungj mbouj haibak gonq. Luz Swnh hix cumhcug, lau gangj loek.

“Haet neix Liuz cujyin dwk denva naeuz gou nyi, ndwen daihngeih de couh haq daengz ndaw si bae, cingj raeuz caez bae gwn laeuj. Daengz seizde, raeuz caez ok loh bw!”

“W!” Luz Swnh riunyumj youh ngaekngaek gyaeuj.

Song aen danci lumj ngaeuz nem ndang, vuenheij youh soengswt coh daengngoenz ngamq hwnj gizde gwih bae.

（2 sat）