(ciep geizgonq)

“Daxbaenh itdingh dwg duz nounaz ndeu.” De gag gangj gag naeuz, “roxnaeuz dwg duz doxgaiq iq wnq.”

De youh nod ok rog daeuj di ndeu……Youh nod di ndeu, de couh yaek daj ndaw congh ruenz okdaeuj lo. De dauq sijsaeq yawjyawj seiqhenz de baez moq: Ndaw ndoengfaex ndaem- nyam yawj mbouj cingcuj, caem- dinghdikdik. Ronghndwen mbouj rox youq gizlawz rongh dwk.

Sawqmwh, song aen da nyaenma sienseng youq gyanghaemh daegbied ronghcingx haenx, louzsim yawj couh youq raeblaeng go faex liz de mbouj gyae ndeu, miz gij doxgaiq ronghmyabmyab ndeu. Haenx dwg gvaengh raiz rongh iq saek ngaenz ronghndwen rongh haeuj gwnz moux cungj doxgaiq baihrog moh ndongq ingj okdaeuj ndeu. Nyaenma sienseng bamq youq gwnz dieg mbouj doengh saek di, da mbouj yaep yawj dwk. Dauqdaej dwg gijmaz doxgaiq ni? Yawj, de doengh lo! De cingqcaih baez di baez di swng doxhwnj……Dai lo, dwg diuz guenjcungq ndeu! Nyaenma sienseng doeksaet dwk diuq hwnj, baenq gyaeuj couh bongh ndonj haeuj ndaw congh bae. Couh youq seiz yaepda neix, daengx ndoeng faex lumj youq seiqhenz de dek ok nei, bumh! Bumhbumh! Bumhbumhbumh!

Gij hoenzfeiz daj ndaw sam diuz guenjcungq biu okdaeuj haenx baenq- ngeungeu mbin hwnj gwnzmbwn ndaemnyam bae. Boz Gizswh、Bangh- swh、Bijwnh daj raeblaeng gofaex gyoengqde ndonj ndang okdaeuj, byaij coh bakcongh.

“Nyingz deng yaq caengz?” Bijwnh cam.

Gyoengqde miz boux ndeu yungh soujden rongh bakcongh dwk. Gwnz- deih, youq ndaw gvaengh rongh soujden, dan raen diuzrieng nyaenma baij lwed、vaihvad yakyawj, byongh ndeu youq ndaw congh byongh ndeu youq rog congh ndeu! Bijwnh gip hwnjdaeuj gangj coenz vah ndeu: “Raeuz nyingz deng diuzrieng, dauqfanj hawj nyaenma ni lo.” Gangj liux, couh vut bae lo.

“Raen fangz!” Bozgizswh naeuz, “raeuz hai cungq laeng lai lo. De baez iet gyaeuj okdaeuj, raeuz couh wnggai hai cungq.”

“Baezneix de haengjdingh mbouj yungzheih iet gyaeuj okdaeuj moq lo.” Banghswh naeuz.

Bijwnh daj ndaw daeh mbon ok bingz laeuj iq ndeu, ndoet gaemz hung ndeu, cij hai bak naeuz: “Aeu hawj de iet okdaeuj moq, ceiqnoix aeu sam ngoenz seizgan. Gou mbouj siengj naengh youq gizneix caj ndwi, raeuz vat aeu.”

“Ha,” Bozgizswh naeuz, “mwngz neix cij gangj ndaej deng. Raeuz mbouj yungh geij aen cungdaeuz couh vat de okdaeuj ndaej. Raeuz rox de youq ndawde.”

“Gou guj daengx ranz de cungj youq ndawde.” Banghswh naeuz.

“Baenzneix raeuz couh daengx rongz beuj.” Bijwnh naeuz, “bae aeu fagso!”