Ndwen 11 ngoenz 19, Lungzswng Gak Cuz Swciyen banh aen hoih hung, angqhoh swciyen laebbaenz 70 hopbi. Daengx Guek Yinzda Minzveij、Guekgya Minzveij Cukhohduenz, Swcigih Daiqbiujduenz, Gveilinz Si Daiqbiujduenz caeuq bouxhek gak dieg nem vunzlai gak cuz Lungzswng caezcaemh angqhoh aen hoihhoengh neix.

Daengx Guek Yinzda Minzveij、Guekgya Minzveij Cukhohduenz donzcangj、Guekgya Minzveij Yizcingz Cunghsinh cujyin Cau Ciminj haengj- dingh caeuq cukhoh gij cingzcik Lungzswng 70 bi doxdaeuj aeundaej neix. De naeuz, Lungzswng byadah gyaeundei、swhyenz comz lai, lizsij gyaeraez、beksingq lauxsaed，minzcuz vwnzva lai cungj lai yiengh、saek- hoengz vwnzva naekna noengznwd. Lungzswng 70 bi cingzcik ronghlwenq gangjmingz, aen cidu dieg minzcuz gagguenj hab guekcingz guek raeuz, gij cwngcwz minzcuz lijlun dangj cingqdeng, diuzroen gaijgez minzcuz vwndiz miz daegsaek Cungguek baenz. Maqmuengh Lungzswng nyinhcaen gvancez gij cingsaenz Aen Hoih Hong Minzcuz Cunghyangh, yungh cukmaenh gij eiqsik caezcaemh Cunghvaz Minzcuz guh sienqmeh, cauhlaeb aen gyaranz cingsaenz caezcaemh gak minzcuz, gaenxmaenx hawj gak minzcuz dox baedauq doxgyau doxyungz, mboujduenh comz gij rengz hung Cunghvaz Minzcuz ranz caen ndeu、doengzsim cauhlaeb loqsiengj Cungguek.

Swcigih Daiqbiujduenz, Swcigih Dangjveij cangzveij、Dungjcanbu bucangj Ciz Sauconh daiqbiuj Swcigih Dangjveij、Yinzda、Cwngfuj、Cwnghez、Gvangjsih Ginhgih caeuq beksingq gak cuz daengx gih cukhoh 17 fanh beixnuengx gak cuz Lungzswng. De naeuz, Cibbet Daih Dangj doxdaeuj, Lungzswng yamq haeuj seizdaih moq hwngfat ceiq ndei、bienqvaq ceiq hung、vunzlai ndaej leih ceiq lai, bonjdieg bouxvunz bingzyaenz guh- hong ndaej dij cienz mauhgvaq 3.5 fanh maenz, gihcuj sezsih guh ndaej ngoenz ndei gvaq ngoenz, ciengz ciengq vutgungz gunggeng dwk ndaej hingz, laebdaeb 5 bi youq mwh daengx gih bangfuz cingzyauq gaujhwz aeundaej daengjgaep “cunghab bingz- gyaq ndei”, gij gingniemh lijyouz bangfuz ndaej caeuqfaenh aen lundanz gemjndoq gozci. Maqmuengh coglaeng vunzlai gak cuz Lungzswng laebdaeb cienzmienh gvancez doeksaed gij cingsaenz cijsi youqgaenj baenzroix Siz Ginbingz cungjsuhgi naeuz hong Gvangjsih haenx caeuq gak hangh gezcwz baijbouh Dangjcunghyangh、Gozvuyen caeuq Swcigih Dangjveij、Cwngfuj, ngeixnaemj doxdoengz, gyo- mbaiq haenqguh baenaj, dangrap caenguh, hawj Lungzswng seizdaih moq hwngfat youh ndei youh vaiq, vih giet sim comz rengz cauhlaeb aen Gvangjsih gyaeundei sevei cujyi miz daegsaek Cungguek seizdaih moq ok rengz hung.

Gwnz hoih, bouxcujciz doeg faenh hohdienh Daengx Guek Yinzda Minzveij、Guekgya Minzveij. Swcigih Daiqbiujduenz fudonzcangj、Swcigih fucujsiz Vangz Cinvaz doeg faenh hohdienh Swcigih. Swcigih Daiq- biujduenz soengq baiz cukhoh hawj Lungzswng caemhcaiq biengj baiz dem. Swcigih Daiqbiujduenz fudonz- cangj、Swcigih Yinzda Cangzveijvei fucujyin Luz Yenbenj、Swcigih Cwnghez fucujsiz Yenz Cauzginh、Gvangjsih Ginhgih fucwngveij Cangh Gohbingz camgya aen hoih. Doengh- gij hozdung angqhoh lai cungj lai yiengh, miz aen hoih angqhoh、langh- baij gij cingzcik swciyen laebbaenz 70 hopbi、vunzlai yienjheiq caeuq ciengz vanjvei yienjheiq angqhoh daengj, cungj langhbaij gij cingzcik geij cib bi ginghci sevei hwngfat caeuq minzcuz fungcingz miz daegsaek Lungzswng.

Ngoenzhaenx banringzgvaq, lij banh Lungzswng Gak Cuz Swciyen Ginghci Sevei Hwngfat Codanzvei dem, Swcigih Daiqbiujduenz cwngz- yenz caeuq gyoengq boux daiqbiuj vunzlai ganbu gak cuz Lungzswng lwnhgangj laegdaeuq, vih hwngfat youh ndei youh vaiq ok banhfap. Ciz Sauconh yienqmienx vunzlai ganbu gak cuz Lungzswng aeu gvancez doeksaed gij cingsaenz cijsi youqgaenj baenzroix Siz Ginbingz cungjsuhgi naeuz hong Gvangjsih haenx laegdaeuq bae, ciuq gak hangh gezcwz baijbouh Swcigih Dangjveij、Cwngfuj, genhciz yungh ndei cwngcwz、guh ndei hanghmoeg、hen ndei vanzging、guh ndei cauhmoq, saedhengz aen canloz hwngfat gyaep- doengh cauhmoq laegdaeuq bae, guh ndei canjnieb cienzdoengj、guh hung canjnieb youqgaenj、guh ak canjnieb hwngmoq, dangrap caenguh bae “daiqdaeuz ca doeksaed、gamj ca doeksaed、caengz dem caengz ca doeksaed”, byaij ok diuzroen hwngfat youh ndei youh vaiq hab saedsaeh dangdieg, laemxsim cauh aen hawsingz diegyouz ndei seiqgyaiq gaep byaij youq baihnaj.

Mwh angqhoh, Swcigih Daiq- biujduenz lij faenbaenz 5 aen duenz, bae lajmbanj、hagdangz、yihyen、giyez caeuq gihgvan danhvei Lungzswng, yawjngonz camnai vunzlai ganbu gak cuz.

(Lij Gwngj Lij Gyahgen)