Youq Bwzswz Si Lingzyinz Yen Yihungz Yanghyauzcuz ciengzseiz ndaej dingqnyi sing cangzhau yiengj mbouj dingz, seiz sang seiz damq, gig miz daegsaek minzcuz, boux daj baihrog ma dingq le simmaez, bouxhek dingq le roxnyinh geizheih. Cangzhau dwg cungj yozgi Yauzromj Lingzyinz, gij lizsij de gyaeznanz, seizneix gaenq bienqbaenz cungj geiqhauh vwnzva Yauzromj dieg de.

Cienznaeuz, ciuhgeq Yauzcuz youq ndaw ndoeng youqdingh, seiqhenz mbouj miz gijmaz vunz youq, ciengzseiz miz duzguk duznyaen sieng vunz、deng bouxcaeg daemj mbanj. Vunzmbanj couh guh le cungj yozgi bae ciu daihgya, heuh gyoengqvunz singjgaeh, neix couhdwg cangzhau. Baez miz duznyaen roxnaeuz vunzdig daeuj, vunzmbanj couh boq cangzhau bae haephangz, doengzseiz bauq hawj vunzmbanj vaiq daeuj bangcoengh. Caenh miz sing cangzhau couhdwg naeuz vunzmbanj miz saeh gip lo, daihgya doq fwngz gaem doxgaiq doxcomz, caez bae dwk duznyaen roxnaeuz dingjhoenx vunzdig. Vunz- mbanj hainduj dwg aeu faexcuk guh cangzhau, hoeng aenvih gij sing de iq, doeklaeng couh gaij aeu luengz guh, gij sing haemq gok haemq hung.

Riengz seizdaih hwngfat, cangzhau gaenq mbouj aeu ma doengsaenq lo, gaij youq begsaeh roxnaeuz hoengzsaeh yungh. Daengz seizneix, caenh gag saehndei cij boq dem lo. Baez aeubawx haqsau、ciet hoengh roxnaeuz hozdung hunghoengh, couh boq cangzhau bae coux hek、soengq hek. Vunzmbanj gaenq dawz cangzhau dangguh gij daibyauj saehndei, caenh ndaejnyi sing cangzhau, couh rox miz saehndei lo.

Gij cangzhau seizneix dwg aeu luengz mbang guhbaenz, itbuen raez it diemj haj mij, faen baihgwnz、cungqgyang、baihlaj sam hoh. Hoh baihgwnz dwg aen bak lumj aen daejrek nei, hoh cungqgyang cix ndaej sou hwnj sou roengz, hoh baihlaj dwg aen haudoengz ndeu. Baez mbouj yungh de, hoh baihgwnz caeuq cungqgyang cungj ndaej sou haeuj ndaw haudoengz bae, gig fuengbienh raek okrog caeuq coux hwnjdaeuj. Baez boq de, geij boux vunz ndang daenj buhvaq Yauzcuz, yaep baiz guh baiz ndeu, yaep caiq homx guh gvaengx ndeu. Gyoengqde fwngz gaem cangzhau, sien lumj boq siu nei boq roengz baihlaj bae, sing cix duemhduemh, yaep ndeu caiq lumj boq loxlez vang dwk boq, sing caemh bienq maqhuz hung, gaxlaeng couh ngiengx dwk boq hwnj mbwn bae, sing cix bienq sang bienq gok, caiq daj gwnz boq daengz laj, couh yienghneix baebae dauqdauq.

Aenvih cangzhau aeu luengz guhbaenz, bengz lai, ndigah ok ndaej noix、riuz ndaej mbouj gvangq, gij cangzhau Yauzromj gig dijbauj. Vihle ciepcienz caeuq fatyiengz gij vwnzva cangzhau, aen cwngfuj yangh de bued ngaenz ciu vunz laeb aen doih cangzhau. Daj hainduj ngeihcib vunz guh daengz seizneix betcib vunz. Cwngfuj caiq youq Yibauj Cunh Mbanjnazmei hwnq le aen vwnzva bozvuz- gvanj. Aen gvanj ciemq dieg song bak bingz- fuengmij, miz daizheiq、dinglanghbaij daengj, yo miz cangzhau、ngeihyienz、loxlez、bizbaz caeuq gij ndangdaenj Yauzromj dieg de daengj. Aen doih neix okmingz le, couh okrog bae camgya gak cungj hozdung. Cangzhau Yauzcuz caemh ndaej senj haeuj buek daihseiq swcigih gaep feihyiz mingzloeg. Gyawj geij bi neix doxdaeuj, Lingzyinz Yen caemh yawjnaek haivat caeuq henhoh gij vwnzva siujsoq minzcuz. Seizneix gaenq gyoebcomz okbanj le roek bonj saw geiq miz gij daegsaek minzsug vwnzva yienh de, ndawde couh miz bonj saw 《Gij Cangzhau Yisuz Lingzyinz》.

Singsing cangzhau coux hek daeuj, cenjcenj laeujvan gingq beixnuengx. Ngonzyawj beixnuengx Yauzcuz boq cangzhau、ndaeknyenz、diuq foux couh lumj yawj raen doenghbaez cojgoeng Yauzcuz boq cangzhau, ndaeknyenz hemq dwk caenh duznyaen hoenx vunzdig nei. Cangzhau yienh’ok gij cingsaenz vunzlai Lingzyinz doxgiet buekguh、ceiqheiq sang gvaq mbwn de, dwg gij daibyauj lijyiz vwnzva Yauzromj Lingzyinz.

（Lingzyinz Yenveij Senhconzbu hawj doz）