It

Luz Swnh saemxsaemx saxsax rex Hij Gangh daengz bakdou hekdiemq seiz gaenq gvaq gyanghwnz cibngeih diemj lo.

“Daeg viz neix gwn mbouj ndaej laeuj hix angjmaenh! Gwn fizfaeng lumj bongz nei, naek dai bae! Hw!” Luz Swnh nam ndaq Hij Gangh. Yienznaeuz de hix gwn laeuj fiz lo, daengx ndang ndatfwdfwd, song da moengzloengz, hoeng de vanzlij haenqrengz yungh gij rengz gwn cij okdaeuj rex doihndei.

Caj de cuengq Hij Gangh roengz sahfaz daihding hekdiemq bae le, de youh saemxsax bae hai aen fuengz ndeu. Songde seizneix cungj byaij mbouj baenz, mbouj gamj dauqranz lo, lau baema gangj mbouj cingcuj, dauqfanj boihseiz, haemhneix cijndei caez youq gizneix lo.

“Dung” sing he, Luz Swnh dik dou haeuj ndaw rug bae. Baez cuengq Hij Gangh hwnj congz, mup daengz gij heiq laeuj fiz doengzdoih, de hix dungxfan mbouj dingz, nyaenx mbouj ndaej “o……o……” geij baez, cadi rueg okdaeuj. De ganjvaiq cung haeuj veiswnghgenh bae……

Songde caemh bi he okseng, song ranz dwg ranznden. Songde daj iq caez guhcaemz, caez doegsaw, ngoenz- naengz angq dangqmaz. Seizcin rumz raeuj va hai seiz, songde caez langh vaiz hwnj bya; seizhah ndit ndat- fwdfwd seiz, songde caez roengz raemx dajcaemx; seizcou mbwn sang heiq sangj, songde caez seiqlengq bae ra mak ndoi; seizdoeng gyoetnit ceiq miz yinxdaeuz lo, songde caeuq doengz- doih caez youq laj gorenh rog bakgvaengh byoqfeiz、boek maenz、gwn ceiz……

Gorenh! Couhdwg go faex neix, cauhbaenz geijcib bi daeuj song ranz vunznden neix fanjnaj baenz caeuz.

Ngeih

Geij bi gaxgonq, ngoenz ndeu, miz canghdajdoq he gvaq ndaw mbanj raen gorenh sangnengneng、sohrwdrwd neix, de couh siengj cawx bae doq gvih hawj daxmeh de. Yienznaeuz ndaw ranz de miz gij gvih gyaeundei baenzboengj, hoeng meh de ceiq gyaez gvih faexrenh. Aenvih faexrenh doq gvih, youh nyangq youh fuengz cumx, mbouj deng dek caeuq bienqyiengh, gij raiz faex youh cingx youh gyaeu.

Ndigah canghdajdoq couh roq dou Luz Swnh, dwg Laux Luz boh Luz Swnh haidou. Canghdajdoq ngamq gangj mingz gij eiqsei, dingjlingz Laux Hij bae guhhong dauqma dingq daengz miz vunz siengj cawx gorenh bakdou. De couh sikhaek diuq hwnj- daeuj hemq naeuz:“Ndaek lawz gamj gai go renh neix, gou caeuq de buekmingh!” De gangj ndaej myaiz sinz, youh da daengj swenj cangh- dajdoq, “go renh neix dwg boh gou ndaem youq bakgvaengh ranz dou, gou gaenq leix baenz geijcib bi cij maj ndaej baenz hung. Mwngz aeu cawx hix dwg ra gou!”

Laux Hij dwg daxboh Hij Gangh, yienznaeuz gaenq ndaej roekcib bi, miz di laenggungq, hoeng ndang maengh, beizheiq de yakrwix. Ngoenznaengz cungj haengj duet haiz loh din roengz naz bae reih. Gij lwg din de lumj lwgbiek nei youh co youh ndaem, daemh daengz dieg boengz bae cungj camz ndaej aen gumz faj din de. Mboujguenj raen byawz cungj naj ndaem da doed, daihgya gyaegyae yawjraen de cungj heux loh byaij.

Laux Luz ndang byom, vunz lauxsaed. Songde hix caez majhung, lij gap baengzyoux. De rox Laux Hij heiqgaenj, hoeng de mbouj lau.

De miz leix gangj yiengj:“Laux Hij, guh vunz aeu gangj liengzsim. Gorenh doiq bakgvaengh mwngz mbouj loek, hoeng, faex iq seiz mwngz set nyouh youh cax raemj siengj aeu mingh de geijlai baez? Caeklaiq gou lanz dawz mwngz, vanzlij rwed raemx、buenz doem, itcig henhoh, go renh neix cij maj ndaej baenz hung. Caiq gangj go renh neix dwg maj youq henz ciengzcab gou, lwnh gyae’gyawj, engq duh go gou! Seizneix mwngz raen faex hung gai ndaej cienz, youh damsim dajlaih duh go mwngz, lij gangj leix lwi?”

“Lauxdoengz miz laeuj ndoet, gou dingh bae gwn! Mwngz gaej lwnh gij vah baenz gyae! Gorenh couhdwg baengh gij nyouh gou rwed baenz faex hung, duh faex gou!” Laux Hij nga’ngangq dangqmaz. De fwngz swix bad youq gwnz gaenz gvak ndaemndwtndwt bae, fwngz gvaz gaem dawz ganjien raez cap haeuj bak bae cit ien bubbub. De ciz da yawj coh gyoengqvunz, yiengh lumj mou dai mbouj lau rwed raemxgoenj nei.

Song ranznden neix bakgvaengh doxgaenh, gap baenz ciggak. Ranz Luz Swnh haeuj bakgvaengh seiz, baihswix dwg bakgvaengh Hij Gangh, gorenh couh maj youq henz ciengzcab baih- gvaz Luz Swnh. Couh vih neix, Laux Luz naeuz gorenh nem ciengz de duh go de cij deng, Laux Hij naeuz go renh cingq doiq bakgvaengh de suenq go de cij ngamj. Songde doxceng doxnyaek, byawz cungj mbouj haengj doxnyiengh.

Sawqmwh, Laux Hij ceng mbouj naihfanz le, heiqgaenj vut faggvak bae, lumj duzguk nei coemj coh Laux Luz bae nyaenj hoz de. Laux Luz mbouj haeujsim, deng gaemh roengz namh le, doeksaetyat, din fwngz luenh vad mbouj dingz. Yaep he cij vax dawz aen rwz gvaz Laux Hij, Laux Luz baez yungh rengz rag, Laux Hij in ndaej swenjveve. Vunzmbanj cungj humx gvaqdaeuj yawj nauhyied, gangj- nyaengnyaeng.

Canghdajdoq raen daengz gij ciengzmienh neix, hix doeksaet dangqmaz, de yungh rengz bae rag Laux Hij. De lau songde doxmoeb, baegfofo gienq naeuz:“Sou miz saeh caemciek ndei gonq, gaej doxmoeb bw. Sou baenz laux vih go faex neix doengh fwngz, ndang sieng caen mbouj dij bw! Gou mbouj cawx go renh neix lo, sou gag haeuj ranz bae bw.” De lau vunzmbanj ndaq de yinx saeh, gangj sat couh buet deuz lo.

Siengj mbouj daengz, saeh neix caengz gvaq geijlai nanz, Laux Hij couh youq haemh laepndwen caegcaeg bae gawq go renh bae, youh doenh baenz haujlai gaet, lienzhwnz goq vunz doz bae gai hawj aen cangj ndeu.

Gizsaed, go renh neix caeux couh coegda Laux Hij lo. Aenvih dwg go renh neix dangj bakgvaengh de, cij cauh vaih funghsuij ndaw ranz de. Guh maz cungj mbouj swnh, vanzlij haih de hwnq mbouj ndaej congz dem. Caeklaiq yah de ra daengz cangh- suenqmingh daeuj cazyawj cij rox dwg yienghneix. Canghsuenqmingh naeuz faex neix dingj ranz, mboujdanh doiq ndang bouxcawj mbouj ndei, vanzlij hawj lwglan fouzyauq dem.

Laux Hij baez anj: Caeklaiq caeuxdi rox gij saeh youqgaenj neix, aenvih de laebdaeb seng le seiq dahsau, doeklaeng cij gouz ndaej Hij Gangh lwg dog neix, daengzcog lij muengh de miz okcot dem.

“He he……” De nyaenx mbouj ndaej riunyaen geij sing, gag siengj: Mwh gou cingq ra gyaij raemj go renh neix, dingjlingz bungz canghdajdoq daeuj bang rengz.

De cab fwngz haeuj daehbuh mbon daengz gij ngaenz gai faex renh, sim engq angq lo: Seizneix ndei lo, go renh ngaiz gou gawq bae gai liux, ndawranz funghsuij hix ndaej gaij- ndei, cienzcaiz youh yo haeuj daehbuh, doeklaeng haengjdingh guh maz cungj ndaej eiq! Ha ha ha……”

Vah naeuz Laux Luz raen Laux Hij mboujdanh dangqnaj vunzlai hangz swhgeij, vanzlij caeg gawq go renh bae gai, baez siengj gij ndatheiq couh gaz ndaw hoz, sim in dangqmaz. De daj iq daengz hung cungj nyiengh Laux Hij, songde cij gap ndaej baenz nanz. Hoeng, siengj mbouj daengz, Laux Hij ndaej conq youh siengj aeu cik, vanzlij daekeiq fwngfwng. Seizneix de cungjsuenq yawjbyoengq aen sim Laux Hij lo. Gorenh mbouj dij maz ngaenz, ndaek vunz haenx engq mbouj dij saek faen ngaenz! Daj neix hwnj naeuz gyoengq lwglan nyi, ciengxlwenx gaej caeuq ranz vunz rwix neix doxgyau!

Aenvih go renh neix, song ranz vunz couhcinj haeuj ok doxbungz, hix caep lumj ndaek nae, byawz cungj mbouj swt byawz.

Bihaenx Luz Swnh caeuq Hij Gangh ngamq ndaej cibcaet bet bi, cingq doeg gauhcungh. Raen song boh guh buenq ciuh lauxdoengz, gingq- yienz vih go renh fanjnaj lo. Ndawde byawz deng byawz loek, daihgya cungj mbouj ndei gangj. Hojsik song boux hauxseng hix aenvih saeh neix gig mbouj cwxcaih. Doenghbaez cungj ngumh mbouj liz ngaeuz, seizneix hwnjhag、cuengqhag siengj doxcomz youh mbouj gamj. Ndawsim gig hojsouh, lumj ngaiz cien fanh duz moed haeb nei, daengx ndang mbouj biuh. Cungj hojsouh neix itcig lienz- daemh daengz doeg gauhcungh sat.

Doeklaeng, Hij Gangh roxnyinh dauqdaej dwg daxboh swhgeij caux saeh, yienghneix, de couh gag cingj Luz Swnh bae bouqlaeuj gwn donq he, ndoet laeuj、caimax、boizleix……

Luz Swnh menhmenh siengj ndaej hai lo. Ngoenzlaeng saedceij lij lai, seiqvunz dinjdet, mbouj wngdang vih go renh ndeu vut gij cingzngeih song ranz vunz. Ndigah, song boux coz muenz bouxlaux hozunq najriu byaengq dungx gwn laeuj, gangj- goj——Ndigah couh miz aen cingz- gingj haidaeuz lo.（1）