“Haemhlwenz caeggeq hai le sam mbat cungq!” Vunzmbanj gangj.

Caih Lungz Byauh baenzlawz gangj, baenzlawz mieng, cungj mbouj miz yungh!

Gij sing daxmeh de youq bakdou hung aen miuh daejfwtfwt, lumj fagmid nei gvej de, hoeng bang bing neix mbouj hawj daxmeh de haeuj- daeuj.

Neix dwg maz cingzgingj? Dwg loqdwglau? Roxnaeuz dwg caen? Gou Lungz Byauh simndei yaek gouq vunz, cix deng bouxwnq dangguh caeggeq!

Caen dwg loek hung lo! Byawz loek lo? Dwg Cinz Dayenz? Dwg bingbaujanh? Roxnaeuz dwg gou?

Lungz Byauh ukgyaeuj mbouj singjsak lo, nyenghnyengh baengh laj daizcaeq naengh, gaiq gyaep gwnz gahengh mbouj rox seizlawz gaenq deng bungq doek lo, gij baksieng youh lae lwed moq, in lwi? De di he hix mbouj roxnyinh lo, cij roxnyinh swhgeij lumj youq ndaw fwjmok fan- foedfoed, yaep ndeu fouzvedved, yaep ndeu youh caem doxroengz……

Banringz ngoenzde, de couh deng gaiq haeuj ndaw singz bae lo.

Ciepdwk, deng saemjcam、yunghhingz, ngunh le youh singj, singj le youh ngunh, Lungz Byauh gaenq mbouj dwg bonjfaenh doenghbaez lo, de caeuq baihrog gekduenh lo, hix caeuq swyouz caeuq vuenyungz gek- duenh lo.

Doeklaeng, de deng gyaeng haeuj ndaw lauz bae, gwnz din daep lienh- gazdin.

Boux caeggeq ndaw bya! Byawz gamj dawz de soeng?

Mbouj miz vunz daeuj yawj, lienz daxmeh de hix mboujcaengz daeuj gvaq.

Mbouj miz vunz doengzcingz de.

Mbouj miz vunz daeuj bang de.

Mbouj miz vunz rox de.

De youq ndaw lauz, hainduj baenzngoenz swenjoen ien’uengj, bek aek loek byoem, menhmenh de mwnhdwddwd lo, ndaw uk lumj deng duznon maz gaet ndaej hoengqvatvat nei, gij saeh caeuq bouxvunz doengh- baez, de ca mbouj geijlai cungj geiq mbouj hwnjdaeuj lo. Baenzneix, de cungjsuenq caem roengzdaeuj, mbouj daej, mbouj hemq, mbouj nauh, mbouj ndaq, hix mbouj swenjoen ien’uengj lo.

Menhmenh, de gvenq baenz hawj bonjfaenh daengx roengzdaeuj mbouj caiq ngeix, gvenq youq ndaw lauz laepngau cumxdumz, gvenq yawj gij lanz diet caeuq daenj lienhgazdin, gvenq bouxdawzlauz yakdoeg, hix gvenq ndwnj gij doxgaiq yakgwn……

(caengz sat)