Gunghcwngz Yauzcuz Swciyen youq laeng baihdoengbaek Gvangjsih, daengx yienh miz 2149 bingzfueng goengleix, dieg bo ciemq 22.91%、dieg bingz ciemq 27.4%. Dieg de bi ndeu miz 319 ngoenz mbouj roengz mwi, mbwnheiq ndei, gig habngamj ndaem lwgndae.

Gunghcwngz ndaem lwgndae gaenq ndaej 500 lai bi lo. Cib’it nyied, rumzbaek ngamq daeuj daengz, baihnamz guek raeuz hainduj bienq liengz bienq nit, gij mbaw go lwgndae caemh menhmenh reuqrat loenq roengz namh. Deq gij mbaw de loenq liux, gag lw aenmak venj youq gwnz go. Seizde, mwngz byaij youq diuz roennou lajmbanj Gunghcwngz, yawj coh baihgyae, aenmbwn heunaunau, mbouj miz saek benq fwj, baihlaj, caenh raen baenz ndoi lwgndae hoengzfwgfwg, lumj doengh aen daengloengz iq venj youq gwnz nye, ndeiyawj dangqmaz. Daengz seizde, gwnz haw couh miz lwgndae gai lo. Aenaen henjbyomh、naeng mbang、noh na youh mbouj miz vaed. Caeuq gij lwgndae wnq unqnemnem mbouj doengz, gij lwgndae Gunghcwngz gwn hwnjdaeuj byotbwd, cix van cix hom, noh cix saed cix na, raemxmak lai, feihdauh ndei raeuh. Vunzmbanj mboujdan gai gij mak moq ngamq mbaet roengz de, lij guh bingjlwgndae bae gai dem, aenvih bingjlwgndae ce ndaej nanz. Seizhaenx, gak ranz gak hoh cungj swnh mbwn ndit ndei, coemj mbaet mak、gai mak、dat mak、dajlangh. Gyanghongh、dieg hoengq henz ranz、gwnz dingjranz daengj, dauqcawq cungj langh miz lwgndae, cungj mbouj miz saek gok hoengq bae. Daj gwnz sang yawj doxroengz, couh lumj fuk veh nei. Vunzmbanj yienznaeuz nyaengq- foedfoed, hoeng caemh guh dwk sim’angq najriu, aenvih cungj mak neix mboujdan ndaej mak lai caemhcaiq gai ndaej bae、gai ndaej ndei. Vunzlai yienh de gig gyaez hek, caenh raen bouxhek couh dawz bingjlwgndae okdaeuj caih de cimz.

Vunz Gunghcwngz daengz seizneix lij aeu gij dinfwngz cienzdoengj ciuhgonq guh bingjlwgndae: Mbaet mak、genj mak、swiq cengh、dat naeng、dak ndit、cawz heiq saep、nyaenj ok hingz、coux gang bae oemq daengj. Deq gij dangz ndaw mak iemq ok baihrog giet baenz caengz dangzhau le, bingjlwgndae couh guh baenz lo. Gij bingjlwgndae Gunghcwngz van lai, caengz dangz baihrog hausak lumj ronghndwen nei, ndigah vunz couh heuh lwgndae Gunghcwngz guh “lwgndae ronghndwen”.

Minzgoz ngeihcib ngeih nienz, 《Yienh Ceiq Gunghcwngz》geiq miz “dangznding、youzndip、 youzcaz、youzfaex、lwgndae、duhhenj、ngveihgva hoengz dwg gij huqdoj mizmingz Gunghcwngz, ndaej gai daengz rogguek bae”“Sam cien sig lwgndae dij seiq fanh maenz ngaenzhau”. Bi 1989, aen cwngfuj Gunghcwngz Yauzcuz Swciyen gujli vunzmbanj youq gyanghongh henz ranz dajndaem lwgndae, seizde daengx yienh cungj hwngq “ciengx mou、guh caujgi、ndaem lwgndae”. Geij cib bi gvaqdaeuj, Lenzvah Cin、Sihlingj Yangh、Gyahvei Yangh couh miz baenz ndoi baenz ndoi lwgndae, dwg rangh dieg yienh de ok lwgndae haemq lai ndeu. Vihle bang vunzlai demsou, conhgyah dieg de dazyinx vunzmbanj dawz lwgndae ronq baenz benq roxnaeuz baenq gaiq iq gyagoeng baenz makrengj gai. Bi 2003 doxdaeuj, Gunghcwngz aeu doengh ndoi lwgndae neix hwngfat lijyouz, youq ndawco cib nyied daengz ndawnyied cib’it nyied guh cietlwgndae Gunghcwngz, guh ok diuz canjnieblienh lwgndae swnghcanj、gaicawx、gyagoeng、daehyinh、lijyouz、nungzcangh guhcaemz doxcaemh ndeu.

Youq Gunghcwngz, mboujlwnh dwg saehndei guekgya roxnaeuz saehhoengz gak ranz, vunzlai cungj maij soengq lwgndae. Aenvih lwgndae gangj Vahgun caeuq cihsaw “事”“世” daengj yaem doxdoengz, soengq lwgndae couhdwg nyienh mwngz “saehsaeh hab’eiq”“seiqseiq an’onj”daengj. Lwgndae caeuq gij vwnzva、ndwenngoenz vunz Gunghcwngz dox- gyau doxyungz, caemhcaiq bienqbaenz aen geiqhauh Gunghcwngz. Lwgndae hoengz lo, saedceij vunzlai Gunghcwngz caemh hoengh lo.