Bonjfaenh ngoenz ndaej mbouj ndaej gwn nohmou dauq mbouj miz maz youqgaenj, gyoengq hagseng lumj faexrangz nei hoengh gwn hoengh maj, swhgeij caiq baenzlawz sinhoj hix aeu ganqhoh gyoengqde ndei bae. Veiz Linz naemj.

Veiz Linz moix aen singhgiz cungj aeu byaij loh bya bae baihrog cawx nohmou, cawx gaeuq gwn aen singhgiz ndeu couh ndaej lo. Cawx baenzlai noh lau ce mbouj ndaej nanz, Veiz Linz youh yut cienz cawx aen binghsiengh iq he, cuengq youq hagdangz aen ranzdajcawj gaebgeb.

Yingzyangj gaen ndaej hwnj, ndang cangq youh miz rengz, gyoengq hagseng youh saet youh diuq, boux- boux haeujsim doegsaw, Veiz Linz riu lo.

Haemh ndeu, Veiz Linz gaij cozyez sat le, youh daj gwnz gaq saw dawz bonj saw daeuj yawj. Mbouj rox mbouj nyinh, gaenq dwg gyanghwnz cib’it diemj cung lo, Veiz Linz muengz swiq ndang haeuj mbonq ninz. Rox- nyinh ndangdaej naetnaiq raixcaix, de gig vaiq couh ninz ndaek lo.

“Veiz lauxsae, Veiz lauxsae, hwnqdaeuj hai dou ha!” Cingq ninz ndaej buenq ndaek buenq ndiu, Veiz Linz dingqnyi miz vunz bongx dou heuh de. Nyengrwz baez dingq, dwg sing geij boux hagseng, youq baihrog heuhcaca.

Aiq dwg miz maz saeh lo, Veiz Linz naemj. Veiz Linz gipmuengz hwnqdaeuj hai dou. Gyoengq hagseng lwnh Veiz Linz nyi, naeuz dah hagseng he mbouj rox vihmaz, daengx haemh daejnyinyi mbouj siengj ninz, cam de miz maz saeh, de hix mbouj gangj.

Veiz Linz riengz gyoengq hag- seng daengz suzse, raen dah hagseng haenx naengh youq gyaeuj congz caenh uet raemxda, henz ndang cuengq miz geij mbaw siengq.

Dah hagseng neix bineix ngamq ndaej caet bi, doeg it nienzgaep. De bingzseiz bak caem vah noix, caemh mbouj gyaez gangj riu geijlai, gyoengq doengzhag baez roengzdangz couh doxgyaep guh’angq, de cix naengh youq gizhaenx dinghdingh yawj saw roxnaeuz sij cozyez.

Raen lauxsae caeuq gyoengq doengzhag humx gvaqdaeuj, dah hagseng dauq miz di mbouj ndei eiqsei lo, mbouj caiq daej, aeu fwngz baez mad song aen lwgda, ngaem- gyaeuj roengzdaeuj, song fwngz doxrub.

Veiz Linz youq henz naengh roengzdaeuj, cam de miz maz saeh? Veiz Linz vah baez ok bak, dah hagseng youh cuengq sing daej lo, daej ndaej beij haxbaenh engq haenq lo.

Laxlawz dah hagseng neix dwg caeuq daxbuz gag youq ranz, daxboh daxmeh daiq dahnuengx bae baihrog dajgoeng song bi lo, lij caengz raen dauqranz. Haxbaenh dwg loqraen daxboh caeuq daxmeh daiq dahnuengx dauqranz lo, de angq ndaej iet fwngz buet bae coh gyoengqde…… Siengj mbouj daengz dwg ciengz loq gyaeundei he, de caiq hix ninz mbouj ndaek lo, raih hwnjdaeuj naengh youq gyang congz, daj gyaeuj swiz mbon geij mbaw siengq daengx ranz caez ingj okdaeuj yawj, yied yawj yied ngeix bohmeh caeuq dahnuengx.

“Daxboh daxmeh rom ndaej ngaenz lai le, mbouj geij nanz couh daiq dahnuengx caez dauqranz, daengz seizde sou daengx ranz vunz couh ndaej doxcomz lo.” Veiz Linz nai dah hagseng neix naeuz.

Veiz Linz caen mbouj rox doiq dah hagseng gangj maz ndei, gij saeh neix youq lajmbanj hix lai raen lo. Gyoengq bouxcoz boux gaen boux ok rog bae dajgoeng ra ngaenz, ce bouxgeq caeuq lwgnyez youq ranz- mbanj, bi daengz haemh nanz ndaej doxraen. Loeklak ndaej dauqranz saek baez, lwgnyez mbouj nyienh bae gyawj bohmeh, lumj muengh boux vunzseng nei.

Caj dah hagseng haenx sim menh onj lo, caeuq gyoengq doengzhag caez netsim haeuj ninz le, Veiz Linz cij byaij roengz laeuz bae.

Seiq

Haemhneix ronghndwen rongh youh luenz, Veiz Linz muengh coh gij bya sang haenx, naemj: Aen bya rungh neix reih noix rin lai, siengj lai ndaem saekdi doenghgo cungj nanz, dangh- naeuz bungz mbwnrengx doenghgo dairoz caez, couh muengh ndwi lo, gyoengq bouxcoz hix mbouj nyienh youq neix souj geij go haeuxyangz geij go duh gvaq ndwenngoenz. Hoeng raggoek youq neix, lwglwg lanlan ciuh dem ciuh cungj youq neix, dangh- naeuz miz saek ngoenz ndaej buen deuz couh ndei lo.

Veiz Linz gwq naemj gwq naemj, mbouj rox seizlawz couh ninz ndaek bae lo. Veiz Linz loqraen swhgeij youh byaij diuz loh bya haenx. Sawqmwh, de roxnyinh diuz loh lajdin yied byaij yied gvangqlangh caemhcaiq bingz- rwd, de doeksaet ndaej muengh yawj seiqlengq. Aeya! Gij bya sang haenx mbouj rox seizlawz gaenq mbouj raen lo, seiqlengq dwg baenz baiz baenz baiz ranzlaeuz hausaksak、sangvidvid, lij ndaem miz haujlai gofaex gova dem. Faex heu va hoengz doxingj, gyaeundei raixcaix, gyoengqvunz bouxboux naj riunyumnyum.

Ninz ndiu le, Veiz Linz cij rox dwg ciengz loq he. De gwq riu, mboujlwnh daengzcog baenzlawz yiengh, de nyienh haemhhaemh guh gij loq neix, roxnyinh gij loq neix youq ndaw ndwenngoenz baefoedfoed haenx doxliz gig gyae, mizseiz hix roxnyinh gig gyawj, gyawj ndaej hawj vunz roxnyinh lumj dwg caen nei.

Ngoenzhaenx banringz, ndit ronghsagsag, baihgwnz miz geij boux- daeuz byaij haeuj Runghfaiz daeuj, naeuz seizneix guekgya gizgiz bang- gungz daengz lajmbanj, lumj Rungh- faiz caeuq gij mbanjrungh wnq yienghneix, goj ndaej cienzbouh buen ok rog bae, guekgya guh ranz hawj youq, lij anbaiz hong hawj gyoengq vunzmbanj guh dem.

Runghfaiz miz ngeihcib ngeih hoh, dingqnaeuz ndaej buen okbae, dingzlai vunz angq ndaej hwnzngoenz cungj lwnh gij saeh neix. Miz di cix naeuz, youq Runghfaiz gvaq ndaej baenz ciuhvunz lo, vut gizneix okrog bae, sij mbouj ndaej.

Veiz Linz baez bungz vunzmbanj couh gienq naeuz:“Roeg mbin bae coh bya, raemx lae bae coh dah, raeuz hix aeu vih ciuhlaeng naemjnaemj ha, gizneix doekgungx mbouj doeng ci, daih lwg daih lan byaij loh gemh, lwgsai aeu mbouj ndaej yah, lwgsau hix mbouj nyienh haq youq neix, daengz seizhaenx vunz couh yied daeuj yied noix lo. Buen ok baihrog bae, maz cungj ndaej gaijbienq, ndwenngoenz hix yied gvaq yied ndei.”

Veiz Linz gangj daengz ndawsim gyoengqvunz bae, gyoengqvunz cungj naeuz:“Veiz lauxsae gangj ndaej deng, dangj caeuq cwngfuj gvansim raeuz lwgminz gwn imq youq ndei, raeuz baenzlawz mbouj dingq ne.”

Boux ndeu haibak, bak boux riengz laeng, Mbanjrunghfaiz laux iq angqfwngfwng doenghfwngz hwnjdaeuj.

Miz vunz fwngz riuj mbaq rap, miz vunz aeu max doz, nauhnauh yiedyied dawz doenghyiengh buen ok rog bya, buen daengz gij ranz cwngfuj guh ndei haenx bae.

Couh lizhai Runghfaiz lo, Veiz Linz ngeuxgyaeuj caiq muengh mbat da he, gag youq ndawsim naeuz: Caiqraen lo, Runghfaiz, dou mbouj buenx mwngz caez youq neix lo, ok baihrog bae, dou gvaq ndaej engq ndei engq vuenyungz.

Biek le Runghfaiz, Veiz Linz ndaej anbaiz youq gwnz haw aen cunghyoz ndeu laebdaeb sonhag, caeuq gyoengqvunz caez daj Mbanj- runghfaiz buen okdaeuj youq gij ranzlaeuz, doxliz gig gyawj, baez muengh couh raen.

Haemh he singhgizroek gwn caeuz gvaq, Veiz Linz okdou bae sanqsim.

“Veiz lauxsae, mwngz haemhneix hix okdaeuj youzbyaij ha!” Raq sing lwgnyez goksad he cienz haeuj rwz Veiz Linz daeuj.

Veiz Linz riengz sing muengh gvaqbae, dwg geij bouxcoz Mbanj- runghfaiz caeuq mbanj rungh wnq daiq lwgnyez okdaeuj youzbyaij.

“Veiz lauxsae, baez baenqndang raeuz youh doxraen lo. Seizneix ndaej buen daeuj gwnz haw youq, lwgnyez doegsaw fuengbienh, cwngfuj hix ra hong hawj dou guh, dou mbouj yungh biek lwg biek bohmeh bae gizgyae dajgoeng lo.” Miz bouxcoz ndeu riu doiq Veiz Linz naeuz.

“Gaxgonq laihnaeuz ciuhvunz youq mbanjrungh daengz geq daengz dai, seizneix ndwenngoenz yied gvaq yied ndei, guh loq cungj riu ok sing daeuj ne.” Lingh bouxcoz he naeuz.

Gyoengqvunz mwngz coenz gou coenz gangj mbouj dingz mbouj liux. Veiz Linz bingzseiz aen bak raeuzrad, seizneix dauq mbouj rox gangj maz ndei, de dinghdingh dingq gyoengq- vunz gangj gij saeh angq neix.

（2 sat）