Dahhoengz daj Yinznanz Swngj Dah- nanzbanzgyangh con gvaq bya gvaq ndoeng, daj Yinz Gvei Gauhyenz cung doxroengz, riuz daengz Gveicouh Swngj Vangmoz Yen le couh caeuq Dahbwzbanzgyangh dox- gyonj, daengz gizde, raemxdah menhmenh bienq hoemz、bienq nding, vunz couh hainduj heuh de guh Dahhoengz.

Youq Gvangjsih, diuz de sien riuz daengz Bwzswz Si Lozyez Yen, henz hamq bya dem bya daengjsoengz, ndoengfaex mwncupcup. Haetromh fwjmok heuxgeuj, daj gwnzsang yawj doxroengz, couh lumj aen diegsien nei, Dahhoengz cix lumj diuz saihwet nyawh heuxgeuj goengqbya ndoengfaex, youh lumj duz lungz hung youq ndawlueg ngutnyeuj bongh baenaj. Doeklaeng diuz de caiq riuz daengz Denhngoz Yen, yienh de aen Lungzdanh Suijdencan couh lumj duz guk hung hen youq ndawlueg laengz diuz Dahhoengz, gyaeng ok aen huz gvangqlangh ndeu. Dahhoengz caiq youq Dunghlanz Yen ut le aen van hung ndeu, cauzlueg laeg- ngaungau, goengqbya daengjsoengz camz haeuj mbwn bae, neix couhdwg Gungxdah Daih’it Dahhoengz. Gizde miz baenz manj diegcumx, seiq geiq cungj miz haujlai roeg douh youq. Gau ruz gvaq baihhenz, seiz mbouj seiz caiq dingqnyi sing duzlingz daj song hamq cienz gvaqdaeuj.

Cienzgangj Dahhoengz bonjlaiz saw- dikdik、yawj ndaej raen bya. Daj gwnz mbwn yawj doxroengz, bya dab bya couh lumj duz lungz heuswdswd ndeu, ngutngut ngeujngeuj iet coh baihgyae. Cienznaeuz coij bya neix gaxgonq dwg go gaeu hung ndeu, raez bak lai mij, gvangq cibngeih mij, go de hunghung sangsang, ngafaex mwncup、ragfaex cangqcwt camca, gij mbaw de hunggvangq dangq aendungh. Baez daengz seizcou, mbaw de reuq le couh hainduj loenqsoso. Loenq daengz aen guenfuj laj dinbya bae, goemq dwk baenz gyanghongh cungj dwg mbawfaex, sauq deuz caiq dauq miz, caenh sauq mbouj rox liux. Nanz le, mbawfaex naeuhnad, moed benz non raih, gyoengq guenbing gig mbwq go gaeu neix. Ndigah, gyoengqde couh naeuz yaek raemjrak go de bae.

Ngoenz ndeu, gyoengqvunz ra daeuj cib boux hauxseng. Gyoengq hauxseng aeu faggawq gawq le cib ngoenz cib hwnz, cij gawq gogaeu raek liux. Hoeng ngamq gvaq song ngoenz, go de youh gag hob ndei. Baksieng caiq dauq did mbaw, caemh hungloet lumj aendungh. Raq rumz baez ci de, gij mbaw caiq loenq daengz gyang- hongh guenfuj bae, gyoengqvunz caen gyaeujdot lai. Doeklaeng, bouxlaux ndaw- mbanj naeuz gyoengqde nyi, duzlungz ceiq lau raemxluengz, heuh gyoengqde sawq- sawq youq bakgawq cat di raemxluengz. Gyoengqvunz ciuq bouxlaux gangj, cat le haujlai raemxluengz roengz bakgawq bae. Mbat neix, faggawq baez gawq, gogaeu couh biu ok haujlai lwed, laecece, faggawq gawq daengz gizlawz, gizde couh naeuhbyoed, couh yienghneix, baksieng cix mbouj rox hab lo. Lwednong riuz le caet ngoenz caet hwnz, dawz diuz dah henzgyawj cungj nyumx nding liux. Daj seizde doxdaeuj, vunzlai couh heuh diuz dah de guh Dahhoengz lo.

Dahhoengz saedsaeh raemx bae gip, ciengzseiz dumh ranz dumh reihnaz. Miz saw geiq naeuz, Cingciuz Gyahcing nienz doxdaeuj, mwh seizfwn yaek daengz, vunzmbanj henz dah couh gvenq bae buiz- caeq “bouxhozsaenz”Dahhoengz, mbaenj- gouz bi de mbouj dumh mbouj rengx、seiq geiq bingzan. Cungguek moq laebbaenz le, gih raeuz guh le Dava、Yenzdanh song aen suijdencan hung, gyoengqvunz henz Dah- hoengz caiq mbouj hoj youheiq baenzlai lo. Diuz fai gyaeng ok aen huz hung daeuj, raemxdah baeznaengz hoemznoepnoep de bienq ndaej sawdikdik, song henz bya heu faex mwn, gyaeundei dangqmaz. Diuz Dahhoengz gaenq bienq lo, hoeng vunzlai lij gvenq saxcaeq diuz de. Vunzlai Dava henz Dahhoengz youq moix bi sam nyied sam cungj gag doxcomz henz dah caeqbaiq Dahhoengz, mbaenjgouz fwnraemx yinzfwd、daengx bi mbouj miz nanh.

Gyawj geij bi neix, aen cwngfuj Dava dawz caeq dah lied haeuj buek hozdung ciet sam nyied sam bae. Caeq Dahhoengz cawjdaeuz miz seiq bouh dingh ndei haenx: Hai caeq（cingj bouxhozsaenz）、gingq caeq（gingq bouxhozsaenz）、aen caeq（soengq bouxhozsaenz）、aeu fwen foux caeq（langh- baij minzsug gwnzbiengz）daengj. Moix bouh cungj gig swnzswngq, yienh’ok gyoengqvunz coengzgingq swhyienz, caeuq daihswhyienz huzndei caemhyouq. Seizde, vunzlai seiq henz gak yienh cungj foenfoen bae gizde itheij caeq dah, ndigah couh miz aen ciengzmienh fanh vunz caez caeq dah lo, gig nauhyied.

（Swhliu caeuq doz daj gwnz muengx aeu）