It

Veiz Linz riuj aen daeh hung he, ndwn youq bakdou hagdangz.

Aen ranzlaeuz gaeuq sam caengz he daengj youq baihnaj, gwnz dingj- laeuz sij miz “Gij Gunghcwngz Yivu Gyauyuz Ranghdieg Guekgya Gungz- hoj”, gyoengq hagseng doegsaw sing goksadsad cienz haeuj rwz daeuj.

Seiqlengq byasang goengq dem goengq sangvidvid, gij ranzyouq cax- cagcag, deng rin dat roxnaeuz faex heu cw haeuj, loh ok saekdi ngaeuz, muengh bae yaek raen mbouj raen.

Boux lauxsae hajcib geij bi he, mbouj sang mbouj daemq, hwet miz di gungj, byoemgyaeuj miz di raizva, gipmuengz gvaqdaeuj caeuq Veiz Linz gaem fwngz.

Boux lauxsae neix riu doiq Veiz Linz naeuz:“Angqcoux Siujveiz laux- sae daeuj daengz, gou singq Dangz, dwg vunz mbanjrungh neix, gizneix yaucangj dwg gou, lauxsae hix dwg gou.”

Dangz lauxsae ciepdwk naeuz:“Gizneix heuhguh Runghfaiz, gou youq neix doekseng, youq neix maj- hung, caeux couh gvenq lo. Mbangj boux lauxsae ngamq daeuj it、ngeih aen haggeiz, naeuz gizneix baez hai dou couh raen bya, youh fwz youh caem, dingj mbouj ndaej couh deuz lo. Hix mbouj ndaej gvaiq gyoengqde, seizneix lwgnyez noix, dingzlai dwg lwgdog, bohmeh gyaezcungh lai, majhung miz hong guh hix dij mbouj ndaej dwgrengz.”

Cuengq daeh ndei le, Veiz Linz doiq Dangz lauxsae naeuz:“Dangz lauxsae, mwngz daiq gou bae gyausiz yawjyawj ba.”

Aen laeuzsonhag neix miz sam caengz, moix caengz miz song aen gyausiz, caengz daih’it caeuq caengz daihngeih guh sonhag, caengz daihsam ce hoengq ndwi, cuengq di doxgaiq wnq.

Veiz Linz caeuq Dangz lauxsae byaij haeuj gyausiz, Dangz lauxsae hawj gyoengq hagseng gaisau Veiz Linz, gyoengq hagseng gwnz naj yienh ndaej gig doeksaet, caez yawj coh Veiz Linz, naeuz:“Veiz lauxsae ndei!”

Veiz Linz doq riunyumnyum caeuq gyoengq hagseng gangj vah doq haeujsim daengz gokciengz baihlaeng gyausiz, haujlai aen habngaiz caez- cupcup baiz youq gizhaenx.

Dangz lauxsae lwnh Veiz Linz nyi:“Hagdangz gungh miz it nienzgaep daengz sam nienzgaep, miz samcib haj boux hagseng, gyoengqde daj gak aen mbanjrungh gyonj daeuj neix doegsaw. Mbangj boux hagseng liz ranz gyae, baedauq sam seiq aen cungdaeuz, moix ngoenz aeu daiq ngaiz byaek daeuj hagdangz gwn.”

Veiz Linz muengh gij faj naj ndeigyaez neix, sim naemj: Gou youq net gizneix lo, gou buenx sou caez majhung ba.

Ngeih

Veiz Linz ngamq ndaej sam bi, daxmeh couh baenz bingh gvaqseiq lo. Maj daengz haj bi, daxboh youq rog guhhong sawqmwh deng saehhux, youh vut Veiz Linz bae, ce de caeuq daxgoeng daxbuz gvaq saedceij.

Ranz roh youh bungz fwn lienz hwnz, Veiz Linz doeg daengz cuh- cungh, daxgoeng caeuq daxbuz youh laebdaeb biek de bae. Ndaw mbanj gyoengq beixnuengx caez ok cienz daeuj soengq Veiz Linz doegsaw, cig daengz de daihhag bizyez.

Veiz Linz ngamq ndaej ngeihcib sam bi, daihhag bizyez lo, de naemj bae naemj dauq, gietdingh dauqma mbanjranz sonhag, dang boux lauxsae ndeu.

Miz vunz riu naeuz, Veiz Linz doegsaw lai le, aen uk dauqfanj bienq huk bienq ngawz lo, bouxwnq muengh dai muengh lix cungj naemj bae ndaw singz guhhong, de cix gwq euq dauq lajmbanj, noix raen lo.

Veiz Linz naeuz:“Raggoek gou youq lajmbanj, mbanjranz miz gyoengq beixnuengx simsienh simndei gou, gou aeu ma mbanjranz guhhong.” Vunzwnq dingq le, bibi gyaeuj caiq hix mbouj miz vah gangj. Gyoengq beixnuengx ndaw mbanj dingq le, naeuz:“Lwg ha, raeuz gizneix lij suenq ndei, gizlawz engq gungzhoj mwngz couh bae gizde ba.”

Gij vah gyoengq beixnuengx, hawj aen sim Veiz Linz roxnyinh raeujrubrub, de mbouj caiq lawq saekdi, boux ndeu aemq daeh daeuj Runghfaiz sonhag.

Miz haet ndeu, doek raq fwn hung he, gyoengq hagseng boux gonq boux laeng daengz hagdangz lo, lij miz daeg hagseng he caengz daengz.

Veiz Linz longz geu buhfwn he, dajsuenq okbae ciep daeg hagseng, de byaij coh diuz lohgemh ngutngeuj lingqlangq. Seizneix lij doek fwn- moenq, gizgiz mbaeqsubsub youh wenqgywggywg, cik din Veiz Linz seiz mbouj seiz loemq roengz geh rin bae.

Veiz Linz doq byaij doq muengh, doq muengh doq heuh aen coh daeg hagseng haenx. Ndaw bya fwzrwgrwg, hix mbouj nyi sing duzroeg sing duznyaen heuh. Sawqmwh, Veiz Linz dingqnyi lajdat miz aen sing unqnyieg he han naeuz:“Veiz lauxsae, Veiz lauxsae, gou youq gizneix.”

Veiz Linz swnh sing heuh muengh roengz lajdat bae, raen daeg hagseng haenx boemzhoemj ninz youq ndaw caz oen, diuz gavaq baihswix miz lwed iemq okdaeuj.

Daeg hagseng lwnh Veiz Linz nyi:“Loh raeuz lai, gouh haiz lajdin daenj nanz le, deng muz ndaej youh bingz youh wenq, byaij loh mbouj onj lo, mbouj haeujsim couh doek roengz laj- dat bae.”

Veiz Linz duet geu buhfwn roengzdaeuj, hawj daeg hagseng daenj, menhmenh fuz de hwnjdaeuj, aemq de bae veiswnghyen.

Byaij le song aen cungdaeuz loh bya, cij daeuj daengz aen veiswnghyen bien goengloh. Seizneix, Veiz Linz gwnz ndang deng raemxfwn caeuq raemxhanh cimq ndaej dumzswdswd, faj naj hix bienq ndaej hoengzgyaemq, diemheiq baegfefe.

Veiz Linz naemj: Gij loh bya neix nanz byaij lai lo, Runghfaiz ciuh neix mbouj rox daengz seizlawz cij ndaej bienq ndei.

Mbat saeh neix le, Veiz Linz doiq Dangz lauxsae naeuz:“Gyoengq hag- seng mbanjrungh gyae haenx, ngoenz- naengz byaij baenz gyae lohbya daeuj hagdangz, youq gwnz loh miz maz saeh cungj mbouj miz vunz rox. Mboujnex raeuz caeuq bohmeh gyoengqde doxyaeng, heuh hagseng liz ranz gyae haenx singhgizit daengz singhgizhaj daeuj hagdangz gwn youq.”

Dangz lauxsae dingq le, naeuz:“Siujveiz lauxsae ha, mwngz daeuj gizneix sonhag gaenq dwgrengz lo, lij aeu guenj gyoengq hagseng gwn youq dem, sinhoj lai bw.”

Veiz Linz naeuz:“Gou gaenq dawz hagdangz dangq aen ranz swhgeij, hix dawz gyoengq hagseng dangq lwg swhgeij.”

Gyoengq bohmeh hagseng dingz- lai youq rog dajgoeng, Veiz Linz caeuq Dangz lauxsae cug ranz cug ranz dwk dienhvah, caeuq gyoengqde doxyaeng. Gyoengq bohmeh hagseng dingq le, cungj gig angq, naeuz docih gyoengq lauxsae lo.

Aen laeuzsonhag caengz daihsam hoengq ndwi, couh aeu daeuj guh suzse. Gyoengq hagseng roen gyae haenx cungj angqfwngfwng buen daeuj hagdangz youq lo.

Ranz caengz rongh seuq, Veiz Linz couh hwnqcongz cawj ngaizromh lo. Veiz Linz doq cawj ngaizromh doq swiq byaek cuengq ndei, banngaiz cuengqhag couh ndaej roengz rek cawj byaek lo, gyoengq hagseng mbouj nguh seiz gwn hix mbouj nguh seiz yietnaiq.

Gyoengq hagseng daengz donq couh ndaej gwn, yietnaiq ndaej gaeuq, hwnjdangz hix hag rox ndaej vaiq, gij cingzcik gyoengq hagseng gak aen nienzgaep youq ndaw yanghcin baiz mingz cungj dwg daih’it, ndaej lingj- dauj haenh mbouj daengx bak, Veiz Linz simhai dangqmaz, roxnyinh swhgeij guh ndaej dij raixcaix.

Sam

Ngamq daengz hagdangz mwhde, Veiz Linz ndaem gaiq reihbyaek iq he, gaeuq cihgeij gwn, lij ciengx geij duz gaeq lwg gwn di ngaiz lw byaek lw. Seizneix dem baenzlai hagseng caez gwn ngaiz, Veiz Linz youh youq baihlaeng hagdangz haifwz, naemj lai ndaem di byaekheu, de ngoenz baez ndaejhoengq couh gwed gvak bae guhhong. Gyoengq hagseng raen le, hix caeuq de caez bae gvak reih, mbouj nanz gaiq reih byaek hung he couh guh baenz lo. Caiq gvaq mboengq he, gaiq reih byaek couh bienq ndaej heuswdswd lo.

Duenh seizgan ndeu, Veiz Linz roxnyinh hwnjdangz seiz, mbangj hagseng lwgda mbouj dwg muengh neix muengh haenx, couhdwg raninz boemz gwnz daizsaw, mbouj haeujsim hwnjdangz.

Veiz Linz fwt naemj daengz, dwg mbouj dwg gyoengq hagseng yingz- yangj gaen mbouj hwnj lo, cij bienq ndaej baenzneix?

Mboengqneix, gizgiz duzmou baenz binghraq, baenz buek baenz buek dai bae, gyoengqvunz aeu ci rag bae haem cungj mbouj ndaej gib, canghdoz hix mbouj raen dawz nohmou daeuj mbanjrungh gai, yaek cawx couh deng byaij ok rog bya bae. Baihrog miz saekdi nohmou gai, hix bengz ndaej hawj vunz da biengj, gaen ngeihcib geij samcib geij maenz, cawx ndaej saekdi gaijngah couh mbouj loek lo. Nohbit、nohgaeq caeuq nohbya yienznaeuz mbouj suenq bengz, hoeng gwn lai hix mbwq, lumjnaeuz nanz mbouj ndaej gwn nohmou, gwn maz cungj mbouj miz feih, vunz hix unq- nyieg lumj gomungz nei, mbouj miz rengz. Gaxgonq, ngoenz boux hagseng ndaej boujdiep seiq maenz ngaenz, Veiz Linz lij ok cienz swhgeij daeuj cawx haeux caeuq noh dem, seizneix nohmou baenzneix bengz, engq mbouj ndaej gwn geijlai lo.

（1）