Luz Lanzginh dwg boux- saucangj Cenhfunghlingj Sausoj laeng Fangzcwngzgangj Si Fangz- cwngz Gih Dungcungh Cin. Ranz de sam daih roek boux vunz gungh hen henzguek 42 bi. Bi 1979 ndwen 3, Cenhfunghlingj Sausoj laebbaenz, Luz Cihfangh daxboh de、Luz Lanzdingz go’ngeih de gonqlaeng guh le bouxsaucangj daih’it、daih- ngeih. Bi 1990, Luz Lanzginh caemh miznaj guh le bouxminzbingh sausoj. Bi 1996, de daj Veizdanj Sausoj diuh bae Cenhfunghlingj Sausoj guh bouxsaucangj daih’sam. Daj mwh guh bingdawzneuz daegbied dwg dang saucangj doxdaeuj, Luz Lanz- ginh couh genhciz “baenzseiq guh gienh saeh dog”, couhdwg aeu hen ndei henzguek.

Moix ndwen Luz Lanzginh aeu liebbyaij diuz sienq henzguek seiq baez, baedauq baez ndeu aeu byaij 49 goengleix, samcib it bi doxdaeuj, de gungh byaij le 7 fanh goengleix. Hen henzguek couhdwg henhoh gyaiqbaiz caeuq diegguek. De rox- yiuj gyaiqbaiz gig youqgaenj, mbouj ndaej hawj vunz ciemq aeu saek conq diegguek raeuz. Bi 2008 ndwen 6, Cungguek caeuq Yeznanz dauq hamq gyaiq laeb bei. Liz Cenh- funghlingj 10 goengleix gyae miz gyaiqbaiz gaeuq ndeu, Luz Lanzginh raen baih Yeznanz dawz gaiq de nod gvaq baih raeuz ngeih diemj haj mij, de doq bauq hawj baihgwnz rox, caiq dauq nod gaiq de boiz. Bi 2012 ndwen 3, vunzlai henzguek baih Yeznanz youq liz gyaiqbaiz 1326 hauh it mij gyae de coih roen, mauhgvaq gyaiq raeuz sam mij, Luz Lanzginh doq daiq bing bae giz de, gangj leix cegnaeuz baih Yeznanz hamj gyaiq lo, heuh gyoengqde doq doiq dauqlaeng sam mij.

Mbanjsangyi dwg aen mbanj Luz Lanzginh, gungh miz 400 hoh vunz, miz 350 vunz dwg bing- dawzneuz. Diuz gyaiq henzguek Luz Lanzginh henhoh neix, daengj miz 26 baj gyaiqbaiz, aenvih miz bing- dawzneuz caeuq vunzlai henzguek henhoh, bajbaj lij daengj dwk ndeilaeklaek.

（Gvangjsih Minzcuz Yenzgiu Cunghsinh hawj gauj）