Sawqmwh, baihnaj miz sing dwkcungq yiengj, de deng hwk baez he, vuengmuengz boemzhoemj.

“Bung!”

Youh yiengj sing ndeu.

Lungz Byauh gwq boemz dwk, raen baihnaj henz roen miz vunz cingq bomzbax humx de.

“Mbouj ndaej ning! Ndwn hwnj- daeuj!”

“Yaengx fwngz hwnjdaeuj!”

De nyenghnyengh yaengx hwnj fwngz, ndwn hwnjdaeuj raen gyoengq vunz baihnaj daenj buhbaujanh, cij cuengqsim roengzdaeuj.

“Gou dwg Lungz Byauh, sou gauj loeng lo!”

“Mbouj ndaej ning, ning couh aeu cungq nyingz mwngz!”

Haj roek boux bing lumj bungz vunzdig nei menhmenh byaij gaenh, Lungz Byauh sing hung gejnaeuz:

“Gou dwg vunzmbanj ha, gyang- haet hwnj bya bae gyaep caeg- geq……”

“Gaej gangj vah!”

Song boux bing bongh gvaqdaeuj, umj dawz de, daj gwnz hwet de saeuj ok fag cungqdinj, maz cungj mbouj dwen, dawz cagndaij okdaeuj couh cug de lo.

“Sou baenzlawz vunzndei caeuq vunzrwix cungj baen mbouj ok ne——”

“Lij euq dem!”

Song boux bing aeu bokcungq dub ndaej de laemx youq gwnz namh, roengzrengz baez rag cagndaij, youh rag de hwnjdaeuj lo.

“Caeggeq gizyawz ne?”

Lungz Byauh gyaeuj ngunh vixvix roennou hwnj bya haenx, caet bet boux bing doq bongh hwnjbae lo.

Song boux bing gaiq dwk Lungz Byauh, buenq rag buenq gaex gaiq de daengz miuhsaenzvangz ndaw mbanj bae, ndaw miuh gaenq bienqbaenz le giz banhgoeng camhseiz baujanhdui.

Lungz Byauh doq daej doq caeuq gyoengqde youh euq youh hemq, cungj mbouj miz yungh.

Gij vah Cinz Dayenz doiq de daiq mbouj leih lo.

“Ngoenzlwenz gyanghaet de couh daengz ndaw ranz gou daeuj, muengz- fwdfwd, mbouj lumj gij yiengh bingzciengz, caemhcaiq lij gangj maz cungqraez、cungqdinj……”

“Guh neisen!”

“Caen siengj mbouj daengz……”

“Ai!”

“……”

Engq youqgaenj dwg gwnz ndang de miz fag cungqdinj ndeu, caiqlij ndaw doengzcungq miz gij riz ngamq dwk gvaq.(caengz sat)