Bet singz haeuxhenj cib singz sou,

Cib singz haeuxhenj caet singz aeu,

Bajaek seizgei aeu habdoh,

Saet bae seizgei caiq mbouj miz.

Nienzlingz seiqcib geij,

Daengz seizneix,

Cij maeuz ngeix bae haq,

Ciuh gyaeundei gaenq gvaq,

Gangj bae haq,

Miz ndaek naj lawz dem.

Siengj swhgeij gaxgonq,

Dangq valienz,

Ndaw raemx sien dingjlaeb,

Gaxgonq gig gyaqciq,

Ndaej baenz ik,

Ndaej habsik gyoengq mbauq.

Siengj cibbet dangnienz,

Va hoengzsien,

Hix cienz doh bak leix,

Roeggacak bauqheij,

Sim hab’eiq,

Daeg daeuj neix gyaepgouz.

Haujlai daeg cinghnienz,

Sai lai ngaenz,

Siengj daeuj yien fwngz gou,

Hix mbouj lau naj couj,

Sien haibak,

Nyienh ciengx gou ciuhvunz.

Seizhaenx gij gyaqciq,

Caiq dauqngeix,

Lawz ndaej cig baenzlai,

Nyinhnaeuz swhgeij gvai,

Ngwn laihdai,

Gou youq ndai mbouj haq.

Genj bae youh genj ma,

Da hix va,

Rox guh baz bouxlawz,

Yied bae naj yied caeuz,

Lw mingzdaeuz,

Vunz daeuj gouz cix siuj.

Couh bae naj couh euq,

Engq yak neuh,

Nyimh baihrog lawz cang,

Cungj dwg mbouj caixhangz,

Gangj ra moiz,

Deng baehbongz daihbuek.

Siengj daeuj hix gag gvaiq,

Caen fouznaih,

Hix laihdai deng haq,

Seiz coz youh lae gvaq,

Dang mehlaeng,

Hix deng haq okbae.

Gag ngeix youh gag vei,

Gvaq seizgei,

Caiq mbouj miz doxdauq,

Bae haq bouxlaux de,

Gwn vujbauj,

Souj daengz laux caj dai.

Gou ciuh vunz neix,

Cihgeij gag ngeix gag loeng,

Caen siengj mbouj doeng,

Bonjlaiz ndaej soeng mbouj eiq.

Gag saj beizheiq,

Bohmeh mbouj eiq saekdi,

Doeklaeng gwn vei,

Mbouj miz saekdi ndeicawq.

Mbouj miz muzdiz,

Lajmbwn dan cix gou gvai,

Geijlai bouxsai,

Gyoengqde youh gvai youh siengq.

Mbauq miz gij yiengh,

Youh dwg yienjda cingz caen,

Nyengh dwg mbouj gaen,

Lij cam mehmbwn vihmaz.

Saedcaih geizheih,

Gou gingq fouzfeih baenzlai,

Seizneix rox dai,

Caen mbouj wnggai euqsingq,

Gangj mbouj ndeidingq,

Boux vunz diuz mingh gag gaem.

Youq ndwi fouz muzdiz,

Mbouj miz eiq saekdi,

Bonjlaiz seng daeuj ndei,

Miz yienzfaenh baenzboengj.

Seizneix gag ienq haenh,

Gaem mbouj cinj seizgei,

Gihvei byaij gvaqbae,

Cij caux miz ngoenzneix.

Danghnaeuz ndaej dauq gvaq,

Caiq mbouj caj seizgei,

Haenqrengz bae doegsaw,

Baengh rengz gaeq ra gwn.