Denzlinz Yen haiguh “hag lizsij dangj、gyo’mbaiq dangj、 riengz dangj byaij” bae lajmbanj yienj heiq nem vwnzva roengz mbanj leih beksingq yienjok hozdung doxdaeuj, Aen Cungsim Swnjcienz Langhbaij Baujhoh Guekgya Gaep Feihvuzciz Vwnzva Yizcanj Denzlinz Yen, faenbied bae daengz daengx yienh 14 aen yanghcin 84 aen mbanj, yienj Heiqcuengh daihgeq、Heiq- cuengh iq daihneix、siujbinj、ciengq go diuq foux daengj soengq ciengz dem ciengz heiq ndeiyawj bae hawj vunzlai, moix yienj ciengz heiq cungj ndaejdaengz bouxyawj dopfwngz haenh, mwh yienj heiq lij gyahaeuj ciengjdap gij cihsiz lizsij dangj caeuq cihsiz fungsug dem, bouxyawj yienhciengz gaenxmaenx ciengjdap, yienhciengz nauhyied dangqmaz, ndaejdaengz vunzlai dangdieg haenhndei. Neix dwg aen yienh neix yawjnaek yungh vwnzva maenhndei bae son vunz bangrengz lajmbanj saenqhwng.

Geij bi neix daeuj, aen yienh neix youq mwh doicaenh lajmbanj saenqhwng, mbouj- duenh guhndei aen dijhi fugsaeh vwnzva gihcwngz, cungfaen fatok gij cozyung 118 aen duenzheiq seizhoengq 14 aen yanghcin, genhciz yungh vwnzva hozdung lai cungj lai yiengh coi vunz guh ndei, yungh gij doxgaiq vwnzva cingsaenz maenhndei son vunz guh sienh, yungh vwnzva gungganq vwnzmingz funghsang moq, doicaenh lajmbanj saenqhwng.

(Yenj Cinbyauh)