It

Sam bi gonq ndwencaet, Daeg- bauj gauhcungh bizyez. Ndwenbet ngoenzhaenx——

“Boh, gou bauqmingz dangbing lo, dijgenj caemh habgek lo.” Daeg- bauj angqvauvau dawz aen siusik ndei neix lwnh hawj daxboh, daxboh de youq Guengjdoeng dajgoeng.

“Gauj mbouj hwnj daihhag, doeg daconh hix baenz ya, vihmaz bae dangbing ni?” Daxboh cam.

“Gou daj iq couh baiqfug boux- bing, gyaezniemh budui. Dangbing dwg aen loqsiengj gou, mwngz hawj gou bae ba!”

“Mwngz bae dangbing hawj gou sim mbouj onj, cungj lau mwngz aeu bae hoenxciengq.”

“Boh, seizneix dwg nienzdaih doxhuz, gyawz miz hoenxciengq ne?”

“Couhcinj mbouj miz hoenx- ciengq, hoeng, gij cainanh raemx- dumh、feizremj、binghraq daengj- daengj, noix yiengh lawz mbouj aeu bouxbing bae? Yungyiemj seizseiz mizyouq. Lij dwg doeg daconh ba, hag di gisuz, ngoenzlaeng ra gwn yungz- heih di.”

“Seizneix bae dangbing couhdwg bae hag gisuz, aeu ndaej bonjsaeh. Vunzlai ciengz naeuz, budui dwg aen luzdiet hung sevei.”

“Couhcinj gou doengzeiq mwngz bae dangbing, daxbuz mwngz haengj- dingh mbouj ei.”

“Cijaeu mwngz doengzeiq, raeuz caiq gienq daxbuz.”

“Baenzbaenz coenz vah ndeu, gaej hawj daxbuz mwngz cabheiq.”

Ngeih

Haemh ndeu, gwn caeuz gvaq le, Daegbauj daek bat raemxraeuj ndeu daeuj hawj daxbuz ceh din. Gaen- riengz de hawj daxbuz dub mbaq. Daxbuz fouqda yaek laep mbouj laep, naeuz cwxcaih dangqmaz. Daxbuz bineix ndaej caetcib haj bi, ndang lij cangq, gwn ndaej ninz ndaej, guh ndaej hongranz.

“Buz, mwngz ndiep gou lwi?”

“Baenzlai bi daeuj, buz ndiep mbouj ndiep mwngz, mwngz mbouj rox ha?”

“Rox, rox. Daxbuz ceiq ndiep gou. Ganq gou lumj aen gyaeq ndaw rungj nei, gou siengj aeu maz ndaej maz, siengj guh maz ndaej maz.”

“Cij ca aeu mbouj ndaej ronghndwen ndaundeiq hawj mwngz ndwi.”

“Ha! Deng, buz gangj ndaej deng. Buz, seizneix gou miz gienh saeh ndeu, aeu mwngz haeujcoengh.”

“Maz saeh ni?”

“Gou siengj bae dangbing.”

“Mbouj ndaej! Dangbing yung- yiemj lai!”

“Buz, seizneix dwg nienzdaih doxhuz, bouxbing mbouj yungh bae hoenxciengq. Bae budui dwg bae hag gisuz, hag ndaej bonjsaeh, ngoenz- laeng vei ra gwn.”

“Bae hagdangz hix hag ndaej gisuz, hix aeu ndaej bonjsaeh. Caiq naeuz, coit mbouj miz hoenxciengq, byawz rox cibngux miz mbouj miz ni? Daengz seizhaenx, gyoengq bouxbing cungj ngaiz laeh hwnjbae, mboujguenj dwg bing moq roxnaeuz bing gaeuq, cungj aeu bae seuq. Miz hoenxciengq, bouxbing mbouj bae hawj byawz bae ne? Byawz heuh sou dwg bouxbing!”

“Buz, seizneix cienz seiqgyaiq doxhuz caezyouq, mbouj miz hoenx- ciengq ne.”

“Mwngz gaej yaeuh daxbuz, densi haemhhaemh naeuz guek neix caeuq guek de hoenxciengq.”

“Neix dwg guek rog, caeuq raeuz mbouj miz gvanhaeh. Vunz guek raeuz gangj dauhleix, souj gij yenzcwz doxhuz caezyouq, mbouj luenh caeuq guek wnq miz ngaekngeu.”

“Couhcinj guek raeuz mbouj bae hangz guek wnq, hoeng, danghnaeuz guek wnq daeuj hangz raeuz, raeuz mbouj boizfwngz ha? Nanzdauh caih vunz hangz ha? Baez boizfwngz couh miz hoenxciengq lo, deng mbouj deng?”

“Buz, gou daj iq siengj dangbing, gyaez daenj buhbing, mwngz hawj gou bae ba!”

“Cijaeu mwngz heuh ndaej dax- goeng mwngz dauq hawj gou, gou couh doengzeiq mwngz bae dangbing.”

“Daxgoeng dai bae baenzlai bi lo, gou baenzlawz heuh ndaej dauq hawj mwngz ni? Mwngz yienghneix dwg luenh nauh luenh guh.”

“Danghnaeuz bihaenx de mbouj bae hoenxciengq, baenzlawz dai ndaej?” Daxbuz gangj daengz neix hozndat lo.

Sam

Bi 1979, Yeznanz daeuj ciemq Cungguek, Cungguek mbouj ndaej mbouj boizfwngz, cancwngh couh yienghneix fwtfat lo.

Bide daxgoeng Daegbauj ndaej samcib sam bi, dwg minzbingh duicangj ndaw mbanj. Seizhaenx, de gaenq baenz boh, miz song dah lwg caeuq daeg lwg he. Baihgwnz heuh bae hoenxciengq, baez bae couh mbouj dauq lo.

Cancwngh sat le, baihgwnz dawz geu buhrwix deng bikmax roxnaeuz soujliuzdan dwk byoengq ndeu dauq hawj daxbuz, naeuz soengq daxgoeng maranz lo.

Dingqnaeuz seizhaenx daxbuz daej ndaej yaek dai yaek lix, ngunh bae geij baez. Seizhaenx dahdaih ndaej roek bi, dahngeih ndaej haj bi, daeglwg (couhdwg daxboh Daegbauj) ngamq ndaej sam bi, ndawranz sam boux lwgnyez aeu gwn. Seizhaenx daxbuz boux ndeu ceng’aeu goeng- faen ciengx ranz, gij haemzhoj geq mbouj liux. Miz coenz vah ndeu ciengz venj youq bak daxbuz—— “Ciuh neix daengq ciuh laeng, ciuh laeng daengq ciuh naj, gaej hawj vunzranz dangbing, dangbing couh vut mingh.”

Guh boh youh guh meh sinsin hojhoj ciengx sam boux lwg majhung, gonqlaeng baenzranz lo, daxbuz dauqdaej ndaej soeng gaemz heiq ndeu lo.

Bi 1999, Daegbauj okseng, rim bi seiz, daxboh naeuz youq ranz baengh geij faen reihbya hex neix, nanz ndaej gwn imq daenj raeuj, couh bae Guengjdoeng dajgoeng lo.

Daegbauj ndaej bet bi seiz, daxmeh de daibingh. Daj seizde hwnj, de caeuq daxbuz doxing doxbaengh gvaq ndwenngoenz. Daxboh ciengz- nienz youq rog dajgoeng ciengx ranz.

Daxbuz dawz Daegbauj dang baujboiq, ndiep de、in de. Daegbauj caemh roxyiuj, ndiep buz, miz doxgaiq ndeigwn cungj hawj buz gwn gonq, buz gwn lw le de cij gwn. Baez cuengqhag, haeuj ranz mbouj raen buz, couh rox buz bae doengh, gaenjgip buet bae ra, caen raen buz daxraix, buz lan caemh guhhong, naiqbaeg hix simvuen. Buzlan couh yienghneix angqyangz gvaq ndwen- ngoenz haujlai bi.

Hoeng, gienh saeh dangbing neix, hawj buzlan gak boux gag uk in. Byawz cungj mbouj nyiengh byawz.

Seiq

Ngoenz ndeu, Daegbauj nengh cunhcangj daeuj ranz, cingj de daeuj gienq daxbuz.

Cunhcangj gienq naeuz:“Buz Daegbauj, Daegbauj gaenq bauq- mingz, dijgenj hix habgek lo, gak cungj saemjhaed caemh doenggvaq le, neix couh gangjmingz Daegbauj dwg bouxcoz maenhndei ndeu. Bouxcoz maenhndei mbouj bae dang- bing saisaengq lai lo. Danghnaeuz bae dangbing dauqdaeuj engq maenhndei, doiq sevei gunghawj engq daih.”

Buz danqheiq naeuz:“Mbouj itdingh bae dangbing cij doiq sevei miz gunghawj hung.”

Cunhcangj youh naeuz:“Dang- bing miznaj. Boux ndeu dangbing, daengx ranzvunz miznaj.”

Buz dap:“Cungj miznaj neix, byawz siengj aeu byawz aeu ba, gou lau aeu lo.”

Cunhcangj caiq naeuz:“Dangbing miz cienzbouj bw, geij fanh maenz nw. Geij fanh maenz doiq vunzmbanj runghbya raeuz daeuj gangj mbouj dwg soq siuj nw.”

Buz naeuz:“Geijlai cienz hix cawx mbouj ndaej diuz mingh he!”

……

Haj

Daegbauj cijndei heuh daxboh dauqma ciemsaw hawj de bae dang- bing.

Daegbauj dauqdaej ndaej saed- yienh aen loqsiengj de lo.

Daegbauj okdou ngoenzde, dax- buz mbouj gangj maz lai, cij dwg haeujaw. Daxboh nai daxbuz:“Meh, caih de bae ba, bouxcoz gag miz siengjfap de. Mwngz cuengqsim, de haengjdingh bingzbingz anan dauq- ma.”

Daxbuz danqheiq naeuz:“Ai! Vunz geq vah mbouj hom lo.”

Daj ngoenzde hwnj, daxbuz vah noix lo, hix mbouj haengj gvaeh luengq cunz ranz gangjgoj guh’angq lo, ciengzseiz boux dog youq bakdou dinghdingh naengh dwk, ngaezngaez yawj gizgyae.

Song bi gvaqbae, Daegbauj dauqma lo.

Baez yamq haeuj ranz, raen dax- buz, de cadi nyinh mbouj ok. Daxbuz beij song bi gonq geq haujlai, ndang nyieg raixcaix, ronghda gaengjbanj. Raen daengz neix, Daegbauj ndaeng soemjsep, bongh haeuj ndaw rungj daxbuz bae, naeuz:“Buz, doiq mbouj hwnj, gou hawj mwngz souh ging souh lau lo. Buz, mwngz yawj, gou daengx ndang mbouj mbinq saekdi.”

Daxbuz daj gyaeuj daengz din cim daeglan, nanz raeuh cij naeuz:“Mwngz naj fonx liux lo.” Gangj sat cuengq sing daej hwnjdaeuj……